LUKA 18

1Khavbo avbo, a di va embela gipimaniso gi yeyedzago giguruvedzo nya gulombelele nyamba garala, khuye: 2"Dhoropani nya gukari a di romo mulamuli moyo a nga bani ari mwalo githawo ni Nungungulu ambari ni vathu vakwawe. 3A di gu vbanya nuye dhoropani mule nyamayi moyo nya noni a nga bani a gu tala gu hongola ndrangani ga mulamuli, aya khuye: 'Nyi lamule eni ni nala wangu.' 4Ma di vbindra matshigu nya gulaphe na gu bomba gu mu lamula; aholu tshigu mwedo a di pimisa kharati: 'Ambari nyi si thavigo Nungungulu nyi si ningigo githawo vathu vakhwathu, 5nyi ngu lamula noni yeyi, yi nyi garadzago, gasi yi nyi dige nyi rula, yi siti nyi garadza gambe.' " 6Pfhumu a di engedza gambe, khuye: "Mu ngu si pwa iso si ganedwago khu mulamuli yoyu nya guvivbedwe khu monyo gani? 7Ina Nungungulu khuye a na gu mba lamula sihathwa saye, si mu ranago wutshigu ni mihani, ambari a gu gira khwatshi a gu hwela, gani? 8Nyi ngu mi embelani, khu lisine, kheni: a na dzegela gu si lamula. Ina gikhati a na wuyago Mwamana wa Muthu, anata mana gukhodwa tigoni, gani?" 9A di va embela gambe gipimaniso gegi, gasi gu hevbudza vale va nga bani va gu dzikhusedza gu vbindrisa, va gu dzi vega kha nga vathu nya gululame, va nyenya vakwawe, 10a di khuye: "Vama vavili va di bela Nyumbani ga Nungungulu vaya gira nombelo. Moyo adiri Mufarisi, mumbe adiri muhengisi nya khupho. 11Mufarisi a di lombelela na emide, khuye: 'Nyi ngu gu bonga, Nungungulu, kholu eni kha nyi fani ni vambe vathu, va gu dzimbafa, va gu mwalo ndruda, va gu sibhayi; gambe kha nyi fani ni mukhuphisi yoyu. 12Eni nyi ngu hala nyondro mbili khu semana, nyi ngu livba gikhaba nya silo sangu satshavbo.' 13Gasi muhengisi nya khupho, a di ema khu hwindzo, nyamba tiyela ni gu khusedza thamo, a di dzipwa nandru, a veta khana na gu, khuye: 'Nungungulu, nyi tsetselele, kholu nyi muwoni.' 14Nyi ngu mi embelani, kheni: oyu muhengisi nya khupho khugide khu vbale a hongola gaya na tsetseledwe, gasi mufarisi khandriso si nga mu dugelago. Kholu watshavbo muthu a dzi khusedzago a na sodziswa; gasi uye a dzi sodzisago a na khusedzwa." 15Va di mu yisela sanana gasi a si kategise. Vapizane vaye, na va wonide esi, va di va kawuka. 16Aholu Jesu a di kawuka vapizane vaye, khuye: "Digani sanana site gwangu, mu nga si himbedzeli, kholu khwawe mufumu wa Nungungulu. 17Khu lisine nyi ngu mi embelani, kheni: uye a si hakhigo mufumu wa Nungungulu kha nga gyanana gidugwanana, gima kha na wu mana." 18Mujudha moyo nya guthavisege a di mu wudzisa, khuye: "Muhevbudzi nya wadi, ginani nyi fanelago gu gira, gasi nyi mane guvbanya nya gupindruge?" 19Jesu a di mu hakha, khuye: "Khu ginani u gu khuwe nyi wadi? Uye a gu wadi khu Nungungulu basi. 20U ngu yi ti milayo yi gu khiyo: 'U nga bhayi, u nga songi, u nga bi, u nga singedzi muthu, mwendro gu gira wukustumunyu nya malipha; rungudza babe wago ni mayi wago.' " 21Gasi uye a di khuye: "Muhevbudzi, nyi ngu landrisa satshavbo soso gukhugela wuphyani gwangu." 22Na pwide esi, Jesu a di mu embela, khuye: "Gimwegyo basi gi nga tshadego. Rengisa satshavbo u gu naso, u kabanisela dzitsapawu dzakone sisiwana, gasi u mane thomba ya ndzadzini. Nu giride isoso, delu uta nyi landrela." 23Na pwide magana yaya, mwama nya gitetema a di garadzega ngudzu, kholu adiri ni dzithomba nya dzingi. 24Na mu wonide kharati, Jesu a di khusa lito, khuye: "Gu ngu garadza ngudzu gu bela mufumuni wa ndzadzini avo va gu ni dzithomba! 25Khidzo nyi mi embelago, gu vbevbugide guvbindra kameli vbatshinganotunu, guvbindra gu dzega gitetema gi bela mufumuni wa Nungungulu!" 26Avo va nga bani va mu pwa va di khavo: "Kharati khu mani a na vbanyiswago?" 27Jesu a di hakha, khuye: "Iso si si kodzigo gu girwa khu vathu, si ngu kodzega ga Nungungulu." 28Pedro a di mu embela, khuye: "Ethu hi digile silo sathu satshavbo hi gu landra." 29Uye a di khuye: "Khu lisine nyi ngu mi embelani nya gu kheni: mwalo a digago ndranga, mwangadzi, vandriyaye, vavelegi mwendro sanana khu kota nya mufumu wa Nungungulu, 30a na gu mba bweledzedwa mafuni momu, bwelo khavbo a mana guvbanya nya gupindruge ga limbe litigo li na tago." 31Na dzegide vale nya likhumi na vavili, a di va embela, khuye: "Mu ngu, wonani, olu ha gu gwela Jerusalema, iyo si naya tadzisegago satshavbo sile si nga lowago khu vaprofeti na si gu lumba Mwamana wa Muthu. 32A na ya ningedwa ga va nya mayigo. A na vadwa, a saniswa ni gu hetshedwa. 33Hwane nya gu bani va mu vetide khu dzimboma, va na mu songa. Aholu khu litshigu nya wuraru a na wuga." 34Gani olu, avo kha va nga si pima a gu vbweta gu khuye ginani. Maganelelo yale ma di si beli mapimoni gwawe, khu kharato, kha va nga bani va dziti a gu thula ginani. 35Na va gu vboha Jeriko, va di mana gikhumu gimwegyo gi nga bani gi khade bambe nya ndzila, na gi gu lomba zomola. 36Na gi pwide ligwaha nya vathu va nga bani va gu vbindra, gi di wudzisa khigyo: gasi ginani. 37Gi di embedwa pwani khu Jesu wa Nazareta a vbindrago. 38Khavbo avbo, gi di khusedza lito, gi lomba, khigyo: "Jesu, Mwamana wa Dhavide, nyi pwele wuhindzi!" 39Avo va nga bani va thangide va di gi kawuka, gasi gu gi degudza. Aholu igyo gi di vbindrisa gu gulumela, khigyo: "Mwamana wa Dhavide, nyi pwele wuhindzi!" 40Jesu a di ema, a gu gi ranisa. Na gi vbohide, a di gi wudzisa, khuye: 41"Wa gu vbweta khuwe nyi gu rini?" Gi di hakha, khigyo: "Pfhumu, nya gu vbweta kheni nyi wone!" 42Jesu a di gi embela, khuye: "Wona. Gukhodwa gwago gu gu vbanyiside." 43Khu vbale, gikhumu gi di dzegela gu wona, gi gu mu landra, na gi gu dhumisa Nungungulu. Vathu vatshavbo, na va wonide esi, va di rungudza Nungungulu.

will be added

X\