LUKA 17

1Jesu a di embela vapizane vaye, khuye: "Sikhunguvanyiso kha si vhikedwi, aholu libango khya wule a si girago. 2Gudiri tshukwana a hungwe thamoni giwindri nya gikhongolo nya gitshindro, a rinywe nondrwani, guvbindra gu khunguvanyisa gimwegyo basi nya sanana sesi. 3Dzi woneleni!Wa gu hosedwa khu ndriyago, mu kawuke. A gu dzi sodzisa, mu tsetselele. 4A gu gu hosela livbandre na dzimbili dzinyondro khu litshigu, a gu tela livbandre na dzimbili dzinyondro ata khuye: 'Nyi ngu dzi laya,' u na mu tsetselela." 5Vapostoli va di embela Jesu, khavo: "Engedzela gukhodwa gwathu." 6Pfhumu a di va hakha, khuye: "Nari pwani mu na ni gukhodwa gu fanago ni thanga nya ginapi, mu di hadza gu embela riva yoyu, khenu: 'Kunuga avba uya dzi tsitsa phwani,' uwo riva wu na gu mi yingisani. 7"Khu mani, vbakari gwanu, a dzi kodzago gu embela githumi gyaye gya gu wuya khu gundze mwendro khiyo nya guhavise sifuyo, khuye: 'Delu khu guvbiredza uta khala u hodza?' 8Ina khandri mwa gu khenu: 'Nyi dongisele guhodza, u nyi ladzela meza gasi nyi hodze, uwe u na hodza gwadi, gani?' 9Ina uye a na ni fanelo nya gubonge githumi khiso gi nga mu girelago, gani? 10Kharato nenu, mwa gu vbedza gu gira iso mu nga rumwago, indrani khenu: 'Hi sithumi nyamba phasa gilo, hi di landrisa giguruvedzo gyathu basi.' " 11Na gu hongola Jerusalema, Jesu a di vbindra khu vbinganoni nya litigo la Samariya ni Galileya. 12Na bede talalani nya gukari, a di tedwa khu likhumi vadwali nya sokono, va nga emago khu hwidzo, 13va khusedza lito, khavo: "Jesu, Muhevbudzi, hi pwele wuhindzi!" 14Na va wone, a di va embela, khuye: "Indrani muya dzi yeyedza ga vaphasi nya mhamba." Na va gu hongola, va di agiswa vatshavbo. 15Moyo wawe, na dzi wone na hawulugisidwe, a di bwelela, na gu rungudza Nungungulu khu lito nya gupwadze. 16A dita dzi thesa khu khovbe migondroni ga Jesu, a mu bonga. Uye adiri Musamariya. 17Jesu a di khusa lito a wudzisa, khuye: "Gasi khandri adiri likhumi va nga hawulugiswago, gani? Ahati vale vambe nya livbandre na vana vomo hayi? 18Mwalo mumbe a nga wuyago gasi guta bonga Nungungulu vbavbandze ga muthu yoyu nya limbe lifumbu gani?" 19A di mu embela, khuye: "Khuga u hongola. Gukhodwa gwago gu gu vbanyiside." 20Na wudzisidwe khu Vafarisi, pwani: "Lini wu na vbohago mufumu wa Nungungulu?" Jesu a di va hakha, khuye: "Mufumu wa Nungungulu kha wu dzi yeyedzi wa gu bani wu guta. 21Mwalo a na dzi kodzago gu khuye: 'Kha mu wu woni owu!' Mwendro khuye: 'Kha mu wu woni wule!' Kholu mufumu wa Nungungulu womo ndrani gwanu." 22Khavbo avbo, a di embela vapizane vaye, khuye: "Gi na vboha gikhati muno vbwetago gu wona litshigu la Mwamana wa Muthu, mu si li woni. 23Va na mi embelani, khavo: 'Kha mu li woni lile!' Mwendro gu khavo: 'Kha mu li woni eli.' Mu nga yini, gambe mu nga va landri. 24Kholu, kha nga gulasa nya ndzadzi, gu wenengedzago damboni gwatshavbo, kharato a na gira nuye Mwamana wa Muthu gikhati li na vbohago litshigu laye. 25Aholu emedwe khu gu phela khu gu saniseka ngudzu ni gu nyenywa khu melana yoyu. 26Kha nga idzo gu nga giregago khidzo matshiguni ya Nowa, kharato nugo gu na girega matshiguni ya Mwamana wa Muthu: 27Va di gu hodza ni gu sela; vama va di gu dzega, vanyamayi va di gu dzegwa, kala litshigu Nowa a nga belago mu litaroni. Wu gu manega talo, wu nga mbembisa vatshavbo. 28Gu na fana niso si nga giregago matshiguni ya Loti: Va di gu hodza ni gu sela, va di gu renga ni gu rengisa, va di gu yala ni gu vbaha. 29Aholu litshigu Loti a nga khugago khu Sodhoma, Nungungulu a di resa nilo khu ndzadzini, wu ngata mbembisago vatshavbo. 30Gu na girega kharato litshigu Mwamana wa Muthu a na dzi wonegisago. 31"Litshigu lolo, uye a na gu bani aromo vbatshani nya nyumba a nga tshigi gasi guta dzega sombo nyumbani, ni uye a na gu bani aromo thembweni a nga wuyi gaya. 32Mu ngu mu dundruga ngadza Loti. 33Uye a vbwetago gu vbanyisa womi waye a na wu luza; gasi uye a wu luzago a na wu vbanyisa. 34Nyi ngu mi embelani, kheni: wutshigu wowo va na bani varomo vathu vavili vbadawutunu: A na dzegwa moyo a tshidwa mumbe. 35Vanyamayi vavili va na bani va gu tshindra. A na dzegwa moyo a tshidwa mumbe. [ 36Vathu vavili va na bani varomo thembweni. A na dzegwa moyo a tshidwa mumbe.]" 37Vapizane va di khusa lito, va mu wudzisa, khavo: "Hayini si na giregago esi, Pfhumu?" Uye a di va hakha, khuye: "Avbo gi na bani gi romo girumbi khavbo avbo makoti ma na hengeledzanago."


Copyright
Learn More

will be added

X\