LUKA 15

1A di yedwa khu vahengisi vatshavbo nya mikhupho ni vawoni, gasi guya mu pwa. 2Vafarisi ni vahevbudzi nya Nayo va di ngurangura, khavo: "Oyu mwama a gu hakha sighohi, a gu hodza naso." 3Khavbo avbo, Jesu a di va ninga gipimaniso gegi: 4"Khu wevbi, vbakari gwanu uye nya gu nari ni lizana dzinvuta, a gu dzimeledwa khu mweyo, a si digigo idzo nya livbandre na mana magumi ni livbandre na dzina panini, a gu hongola a gimbila a vbweta iyo yi nga dzimela, kala a yi mana? 5Na yi mane, a ngu yi vbagara na tsakide; 6na vbohide gaya, a ngu rana dzipari ni vaakelane, a va embela, khuye: 'Nyi phaseni gu tsaka, kholu nyi manide nvuta yangu yi nga bani yi dzimede.' 7Nyi ngu mi embelani kheni: gu na manega gunengela nya gukhongolo ndzadzini khu kotani nya gighohi gimwegyo basi gi dzi layago guvbindra avo nya livbandre na mana magumi ni livbandre na va na vathu nya ndruda va si vbwetigo gu dzi laya." 8A di engedza gambe, khuye: "Khu wevbini nyamayi, nya gu, nari ni likhumi dziphera nya ndralama a dzimedza mweyo, a si rothigo kandriya, a vbiyela ndrangani gwatshavbo, na gu khedzisa gwadi, kala a yi mana? 9Na yi mane, a ngu rana dzipari ni vaakelane, a va embela khuye: 'Nyi phaseni gu tsaka, kholu nyi yi mane phera yangu yi nga bani yi dzimede.' 10Nyi ngu mi embelani kheni: kharati nugo, gomo gunengela vbakari nya sirumwa sa Nungungulu khu kotani nya gighohi gimwegyo basi gi vbindrugedzago mavbanyelo." 11A di engedza gambe, khuye: "Babe nya gukari a diri ni sanana sivili nya madzaha. 12Uye nya nandra a di embela babe waye, khuye: 'Baba, nyi ninge thomba yi nyi lumbago.' Babe wule a di va kabanisa thomba va vavili. 13Na ma vbindride matshigwana, mwama nya nandra a di donga lipfhumba, a gu dzega silo saye satshavbo, a pepetseka ni mayigo, aya phalalegisa thomba yaye yatshavbo ni mibhedzwa. 14Na vbedzide thomba yaye yatshavbo, gu di manega ndzala nya yikhongolo tigoni mule, a gu phela gu saniseka. 15A diya khoza ga moyo wa tigoni mule, a nga mu rumela guya havisa dzikhumba petoni gwaye. 16A di dogorela gu tadza girumbu khu marigiri nya dzikhumba, aholu kha nga ningwa khu muthu. 17Khavbo avbo, a di wuyisa mapimo, a gu hingigedza, khuye: 'Olu gaya, sithumi sa babe wangu si ngu hodza si khura, eni avba nyi ngu fa khu ndzala! 18Nyi na bwelela ga babe wangu nyiya kheni: Baba, nyi ghohide mahoni ga Nungungulu ni mahoni gwago. 19Nyi mwalo gambe fanelo nya gu ranwe gyanana gyago, nyi phare kha nga moyo nya sithumi sago!' 20A di phara ndzila aya ga babe waye."Na nga guta khu hwindzo, a di wonwa khu babe waye, a nga pwago gisiro, a mu khinga khu mazambo, aya mu wugarela ni gu mu bejari. 21Mwamana wule a di khuye: 'Baba, nyi ghohide mahoni gwa Nungungulu ni mahoni gwago, nyi mwalo gambe fanelo nya gu ranwe gyanana gyago.' 22Aholu babe wule a di ruma sithumi saye, khuye: 'Resani khu guvbiredza ngandzu yile nya gumbure ngudzu muta mu ambagisa; mu ambagiseni phera nyalani ni silato migondroni gwaye. 23Resani gimombyana nya gu none muta gi songa, hi hodza, hi nengela, 24kholu mwamana yoyu wangu a di fude, olu a ngu vbanya; a di dzimede, olu manegide.' Khavbo avbo, buzo wu di phela. 25"Mwama nya koma a di romo mahangeni. Na gu wuya, nari vbafuvbi ni gu vboha gaya, a di pwa vathu na va gu embelela ni gu hana ndrangani. 26A di rana githumi gimwegyo a gi wudzisa, khuye: 'Gasi mahungu muni?' 27Gi di mu embela, khigyo:'Khu ndriyago a widego. Babe wago a di songa gimombyana nya gunone, gasi gu mu wuyedza khigyo, kholu wide khu mawundru ni mawogo.' 28Mwama nya koma a di goroga, a si dzini ni gu bela. Aholu, babe waye a diya mu khongotela gu bela. 29A di embela babe waye, khuye: 'Nyi na ni myaga nya gulaphe na nyi gu gu thumela nyamba hosisa ni nayo moyo wago; gima u si nyi ningi giphongwana, gasi nyi hodze ni dzipari dzangu. 30Olu gi nga vboha gyanana gegi gyago gi nga phalalegisa thomba yago ni mibhedzwa, u gi songede gimombyana nya gunone.' 31Babe wule a di khuye: 'Mwanangu, uwe nyi nago matshigu yatshavbo; satshavbo si gu sangu tshago nuwe. 32Aholu hinani fanelo nya gugire buzo, hi tsaka, kholu ndriyago a di fude, olu a ngu vbanya; a di dzimede, olu manegide.' "


Copyright
Learn More

will be added

X\