LUKA 14

1Tshigu mwedo nya Sabhado, na bede ndrangani ga moyo nya khongolo nya Vafarisi, gasi guya hodza. Vatshavbo va di khusa maho va mu khedza esi a girago. 2A di romo vbale moyo a nga bani a gu dwala khu giwumbwa. 3Jesu, a di wudzisa ga vahevbudzi nya Nayo ni Vafarisi, khuye: "Gu ngu dzumedziswa mwendro gu himbedzedwa gu hawulugisa khu Sabhado, gani?" 4Aholu vatshavbo va di degula. Khavbo avbo, Jesu a di khuha muthu wule, a mu hawulugisa, bwelo khavbo a mu ruma gu hongola gaya gwaye. 5Hwane nya isoso a di va wudzisa, khuye: "Khu mani, vbakari gwanu, nya gu a wona mwamana waye mwendro mombe yaye na yi thegede namboni, a si hongoligo aya yi nula khu gu khuye litshigu nya Sabhado?" 6Mwalo a nga dzi khodzago gu mu phindrula. 7Na gu wona idzo vathu va nga bani va gu tutumela khidzo malanga nya guthange, Jesu a di va embela gipimaniso gegi: 8"Wa gu ranwa mutshadhotunu u nga tutumeli wulanga nya guthange, a nga bani a ranidwe mumbe nya khongolo gu gu vbindra, 9khu kharato, mune ndranga, anata gu embela khuye: 'Nga leya avbovbo u ningela wulanga oyu.' U na khuga khu vbale u na tade khu dzitshoni uya khala wulanga wa hwane. 10Gasi, wa gu ranwa, indra khala wulanga nya guhegise, kholu a gu vboha mune ndranga anata gu embela, khuye: 'Pari yangu, hidzimela kheno.' Avbovbo u na khusega mahoni ga vatshavbo va gomo vbamezatunu. 11Kholu watshavbo muthu a dzi khusedzago a na sodziswa, gasi uye a dzi sodzisago a na khusedzwa." 12Khavbo avbo, Jesu a di embela wule a nga mu ranago, khuye: "Wa gu dongisela buzo nya gukari, u nga rani dzipari dzago, vandriyago, valongo, vaakelane vale nya sitetema; u pima gu khuwe avo navo va gu na rana, gasi va gu bweledzela. 13Wa gu dongisela buzo, rana sisiwana, silima, sikhurubwa ni sikhumu. 14U na bani u kategide, kholu kha va na mana igyo nya gu bweledzele khigyo; u na bweledzedwa khu litshigu nya guwuge ga va nya gululama." 15Na va pwide esi, moyo a nga bani aromo vbamezatunu a di mu embela, khuye: "Kategide uye a na guya khalago vbamezatunu a hodza mufumuni wa Nungungulu!" 16Jesu a di mu hakha, khuye: "Muthu nya gukari a di gira buzo nya khongolo, a ramba vathu nya vangi. 17Na dongisede satshavbo, a di ruma githumi gyaye guya embela vathu, khigyo: 'Deluni, satshavbo si dongisedwe!' 18Aholu vatshavbo va di hengela monyo moyo nyamba wadi. Uye nya guphele a di khuye: 'Nyi ngari gu renga gipeto, nya gu vbweta guya gi wona; u na nyi divalela, kha nyi na dzi kodza gu manega.' 19Mumbe a di khuye: 'Nyi ngari gu renga livbandre mipatwa nya dzimombe nya gulime, nya gu vbweta guya dzi lingedzela; u na nyi divalela, kha nyi manegi.' 20Gasi mumbe a di khuye: 'Nyi ngari gu tshadha, khu kharato kha nyi manegi.' 21Githumi gi di bwelela giya tivisa esi ga mune ndranga. Khavbo avbo, mune ndranga a di goroga, a gu embela githumi gyaye, khuye: 'Indra, olu kamwe, dhoropani gwatshavbo, u gimbila u rana avo u na va manago mu dzindzilani: sisiwana, silima, sikhumu ni sikhurubwa.' 22Githumi gi di wuya gita khigyo: 'Pfhumu, nyi giride kha nga idzo u rumidego khidzo, aholu wu nga tshade wulanga.' 23Khavbo avbo, a di embela githumi gyaye, khuye: 'Indra dzindzilani ni sindzilanani, u gimbila u rana vatshavbo va ta bela, mwendro nyumba yangu yi na tala. 24Nyi ngu mu embelani nya gukheni ni moyo nya vale nyi nga bani nyi va ranide kha na linga buzo wangu.' " 25Vathu nya vangi va di gu mu landrela. Jesu, na khuside maho a va khedza, a di khuye: 26"Uye atago gwangu a mba diga babe, mayi, mwangadzi, sanana, vandriyaye, ni gu dzi diga uye mune, kha dzi kodzi gu khala mupizane wangu. 27Uye a si rwaligo gihambano gyaye a nyi landrela, kha dzi kodzi gu khala mupizane wangu. 28Khu mani, vbakari gwanu, a gu vbweta gu vbaha langwe, a si pheligo khu gu khala vbavbatshi a wona dzitsapawu a gu nadzo, mwendro dzi ngu enela kala gu yi vbedza? 29Gasi gu si giregi gu a kemba gwadi khokhweni, a si dzi kodzi gu yi vbedza, a hegwa khu vathu, khavo: 30'Muthu yoyu phede gu vbaha, aholu kha dzi kodza gu yi vbedza.' 31Ina ka, khu wevbini mufumeli a hongolago a ya dwana nyimbi ni mumbe mufumeli nyamba phela khu gu khala vbavbatshi a wona mwendro a na dzi khodza gu dwana ni mufumeli a tago ni mazana mavili mazana (20.000) nya vama, uye a gu bani ari ni lizana mazana (10.000) nya vama, basi? 32A gu wona khuye kha dzi kodzi, a gu rumela madhota ma khinga mufumeli wule na ngari hwindzo, gasi guya lomba gurula. 33Kharati, ni wevbini, a guromo vbakari gwanu, a si digigo iso a gu naso, kha dzi kodzi gu khala mupizane wangu. 34"Munyu gilo nya gyadi. Aholu wa gu phusa, wu na lungwa khu ginani? 35Kha wu ngu phasa gilo, ambari gu nonisa wulime, mwendro gu wu gira gitoromu. Wa gu dzudzugwa. Uye a gu ni dzindzeve nya guyingise, a na pwe!"


Copyright
Learn More

will be added

X\