LUKA 10

1Khavbo avbo, Pfhumu a di hatha vambe livbandre na mavili magumi ni vavili vapizane, a gu va rumela vavili vavili gu thanga, va bela khu mitalalani a nga bani a gu vbweta gu vbindra khumo. 2A di va embela, khuye: "Dzimbewu dzingi, aholu vavbweri vadugwana, khu kharato, lombani ga mune lithembwe a rumela vabweri nya vangi thembweni gwaye. 3Indrani na mu gu dziti nya gukhenu nya gu mi rumelani kha nga dzinvuta vbakari nya masolwa. 4Mu nga dzegi kwama, mwendro mirava nya dzimbuva, mwendro silato; mu nga losi vathu ndzilani. 5Ni yevbi ndranga mu na gu belago, phelani khu gu khenu: 'Gurula gu na manege ndrangani momu!' 6A gu bani aromo muthu nya gurule ndrangani, gurula gwanu gu naya gwaye; a gu bani ari mwalo, gu na wuya gambe gwanu. 7Mu nga legalegi khu ndranga ni ndranga. Khalani ndrangani mweyo, mu hodza ni gu sela iso va gu naso, kholu githumi gi na ni fanelo nya guhakhiswe. 8Ni levbini lidhoropa mu na belago, va gu mu hakha, hodzani iso mu na ningwago, 9hawulugisani vadwali mu na va manago, na mu gu embela vathu vatshavbo, khenu: 'Mufumu wa Nungungulu womo vbafuvbi gwanu.' 10Gasi mwagu bela dhoropani nya gukari va si mi hakhi, dugani na mu gu huwata ni dzindzila dzatshavbo nya lidhoropa, khenu: 11'Wonani, hi ngu phuphuta ni kudzudzwane nya lidhoropa lanu, wu nga bani wu dandramede migondroni gwathu, hi mi tshiyelani. Aholu dzitini nya gu khenu mufumu wa Nungungulu womo vbafuvbi.' 12Nyi ngu mi embelani nya gukheni litshigu nya gulamudwe gu na tsetseledwa Sodhoma guvbindra lidhoropa lolo. 13"Libango lago Khorozayine! Libango lago, Bhetisayida! Kholu nari pwani Tiro ni Sidhoniya va di wonide siliwugiso nya nga iso mu nga si wonago enu, na va dzi sodziside gale khu kota nya siwono sawe, va gu ambala dzisaku ni gu phorola nguma. 14Khu kharato, litshigu nya gulamule gu na tsetseledwa Tiro ni Sidhoniya gu vbindra enu. 15Ahati uwe, Khafarnawume! U di vbweta gu khusedzwa kala ndzadzini? Hulo, u tandregide! Una reledzwa kala vbavbatshi." 16Jesu a di va embele, khuye: "Uye a yingisago enu, kheni a nyi yingisago; gasi uye a nyenyago enu kheni a nyi nyenyago. Kholu wule a nyi nyenyago, a gu nyenya wule a nga nyi rumelago." 17Vapizane vale nya livbandre na mavili magumi ni vavili va di wuya na va tade khu gunengela, vata khavo: "Pfhumu, ambari maphuvbo nya guvivbe ma di hi yingisa khu lina lago!" 18Jesu a di va embela, khuye: "Eni nyi di gu mu wona Sathane na gu thega khu ndzadzini kha nga nyangafula. 19Dzitini nya gukhenu nyi mi ningide tshivba nya gugandre dzinyoga ni dzihume, gumogo ni tshivba nya gupale wuhungu watshavbo wa nala. Gi mwalo gi na gu mi girago gilo. 20Gasi enu, mu nga tsakini basi khu gu yingiswa khu maphuvbo. Aholu tsakani kholu malina yanu ma lovidwe ndzadzini." 21Gikhati gyogyo, Liphuvbo nya gu Age li di tadza Jesu khu litsako a gu ganela khuye: "Nyi ngu gu rungudza, Baba, Pfhumu nya ndzadzi ni mafu, kholu u sihede silo sesi va nya guti ni vagengeli, u si yeyedza ga va nya gusolega. Ina, Baba, kholu khiso si nga gu nengedzisago. 22Satshavbo nyi ningidwe khu Babe wangu. Mwalo a mu tigo khu mani Mwamana vbavbandze ga Babe ekha, gambe mwalo a mu tigo khu mani Babe vbavbandze ga Mwanaye ekha ni wule Mwamana a dzinago gu mu tivisa." 23Khavbo avbo, a di thendregedza a gu khedza vapizane vaye, a gu va embela khu tsawana wawe, khuye: "Ma kategide maho ma wonago iso mu si wonago. 24Kholu nyi ngu mi embelani nya gukheni: vaprofeti nya vangi ni vafumeli va dzinide gu wona esi mu si wonago, kha va si wona; ni gupwa iso mu si pwago, gambe kha va si pwa gilo!" 25Khavbo avbo, a di khuga muhevbudzi moyo nya Nayo a mu wudzisa, na gufela gu mu linga, khuye: "Muhevbudzi, ginani nyi fanelago gu gira gasi gu mana guvbanya nya gupindruge?" 26Jesu a di mu hakha, khuye: "Gasi ginani gi lovidwego omu nya Nayo? Ahati uwe wa gu hevbula kharini?" 27Muhevbudzi nya Nayo a di khuye: "U na haladza Pfhumu Nungungulu wago, khu monyo wago watshavbo, khu hefemulo wago watshavbo, khu tshivba yago yatshavbo ni mapimo yago yatshavbo; u gola gambe muthu kwanu kha nga idzo u dzi haladzago khidzo uwe mune." 28Jesu a di mu embela, khuye: "U hakhide gwadi. Gira kharato, u na vbanya." 29Aholu muhevbudzi nya Nayo khu gu vbweta gu dzi vhikela, a di wudzisa, khuye: "Gasi khu mani muthu khwathu?" 30Khavbo avbo, Jesu a di mu phindrula, khuye: "Mwama moyo a di gu relela khu Jerusalema na guya Jeriko. A di tshangana ni sighevenga si nga mu phangago satshavbo a nga bani naso, si mu khinyela ni gu mu gandredzela, si mu diga vbakari nya ndzila na dzimide. 31Gu di kotsana na gu vbindra muphasi nya mhamba khu ndzila yile. Na mu wone, a di leya, nyamba thela kota. 32A di vbindra nuye mulevhi khu vbale. Na mu wone, a di leya nuye. 33Aholu a di vbindra Musamariya, a nga bani ari ni lipfhumba laye, na mu wone, a di mu pwela gisiro, 34a gu hidzimela, a mu thela mafura ni wadwa dziphandzani, a gu dzi hungelela. Khavbo avbo, a di mu khiledza vbaburutunu gwaye, a gu mu yisa ndrangani nya vaendri; a mu sayisa. 35Gandra ni dzimindru a di dusa singerengere sivili a ningela mune ndranga, a gu mu embela, khuye: 'Nyi sayisele muthu yoyu. Gikhati nyi na gu wuyago nyi nata gu livba satshavbo u na gu bani u mu girede, sa gu lomba dzitsapawu nya guvbindre edzi.' " 36Khavbo avbo, Jesu a di wudzisa muhevbudzi nya Nayo, khuye. "Khu mawonelo yago, khu wevbini nya ava va vararu a nga wonago wule a nga thegela mandzani nya sighevenga kha nga muthu kwawe?" 37Muhevbudzi nya Nayo a di khuye: "Khu wule a nga mu girelago mithumo nya wuhindzi." Jesu a di mu embela khuye. "Indra uya gira nuwe kharato." 38Na va gu hongola, Jesu a di bela ni vapizane vaye talalani nya gukari. Nyamayi moyo nya gupwani khu Marta, a di mu hakha ndrangani gwaye. 39Uye adiri ni ndriyaye nya gupwani khu Mariya, uye a ngata khalago vbafuvbi gwa Pfhumu, gasi gupwa magana yaye. 40Aholu Marta, a nga bani a gu gamwa khu mithumo nya mingi, a diya ga Jesu aya khuye: "Pfhumu, khu theli kota kholu ndriyangu a nyi ditshedzago mithumo yatshavbo, gani? Nga mu embela ata nyi phasa." 41Pfhumu a di mu hakha, khuye: "Marta, Marta, wa gu garadzega ni gu dzi hita khu silo nya singi, 42narigu gimwegyo basi gi vbwetegago. Mariya hathide gipandre nya gyadi, igyo nya gu gima kha na dzegedwa khu muthu."


Copyright
Learn More

will be added

X\