LUKA 1

1Kha nga olu vathu nya vangi va dzi garadzidego khu gu lova, va gu sasamedza silo si dugeledego, vbakari gwathu, 2kha nga idzo va hi hevbudzidego khidzo vale va nga si wonago khu maho, gu khugela gu hegulani nya silo sesi; a gu avo va nga khalago vahevbudzi nya Mahungu yaya; 3eni neni, hwane nya gu bani nyi si hevbude gwadi, gasi guti idzo si nga dugelelago khidzo guphelani, nyi wonide nya gukheni adiri gwadi gu gu lovela nuwe, Teofilo, gigodwa gyangu, na nyi si sasamedza khu dzindrima dzakone, 4gasi u gu wuti gwadi longoloko nya lisine u hevbudzidwego. 5Gikhati gya Herodhi a nga bani ari mufumeli wa Judheya, a di romo muphasi moyo nya mhamba nya gupwani khu Zakariya, a nga bani a gu lumba gikwata gya Abhiya. Mwangadzi waye a diri Elizabheta. Uye nuye a di gu dugela nyumbani ga Aroni. 6Vatshavbo va vavili va di lulamide mahoni ga Pfhumu; vadigu landrisa milayo ni siguruvedzo sa Pfhumu khu ndruda yatshavbo, guvbanyani gwawe, gima kha va manwa vari ni gihoso. 7Aholu vadiri mwalo sanana, kholu Elizabheta adiri ngon'wa, narigu gambe, va vavili va di gumbide. 8Zakariya a di gu thuma thumo waye nya wuphasi nya mhamba ya Nungungulu. Kha nga gi nga bani gi vbohide gikhati nya gulumbe tsawa waye, 9kha nga giolovedzo gi landrwago khu vaphasi, Zakariya a di hathwa khu vaphasi vakwawe gu ya bela makhuvini nya Nyumba ya Pfhumu a gu vbisa libani. 10Vathu vatshavbo va di tshala vbavbandze va gu lombelela. 11Khavbo avbo, a di tumbulugedwa khu ngilozi ya Pfhumu, gi nga ya emago khu nyamudye nya giluvelo nya libani. 12Zakariya, na wone ngilozi, kha nga giti ni gilo nya gugire khu hwanga. 13Aholu ngilozi yi di khiyo: "Zakariya, u nga thavi, kholu nombelo wago wu pwidwe khu Nungungulu. Mwangadzi wago, Elizabheta, a na velega gyanana nya gikhwathana u na gi thangisago lina la Johane. 14Uwe u na tsaka ni gu nengela. Nya vangi va na tsaka khu guvelegwa gwaye, 15Kholu gi na bani giri muthu khongolo mahoni ga Pfhumu. Kha gi na sela vhinya; gi na tala khu Liphuvbo nya gu Age gukhugela mu girumbuni ga mayime waye. 16Khu kotani nya igyo, sanana nya singi sa na Israeli si na wuya ga Pfhumu Nungungulu wawe. 17Igyo gi na rumedwa mbeli nya liendro la Pfhumu khu liphuvbo nya tshivba nya nga ya muprofeti Eliya, gasi a rudzise myonyo ya vavelegi ni sanana sawe, ni gu hevbudza gu yingisa sanana nyamba yingisa. Gi na dongisela kharati vathu, gasi va hakha Pfhumu khu ndruda." 18Zakariya a di wudzisa girumwa gya Pfhumu khuye: "Gu na girega kharini kharato, olu hi gumbidego, eni ni mwangadzi wangu?" 19Girumwa gya Nungungulu gi di khigyo. "Eni kheni Gabriyeli, wule a guromo mbeli ga Nungungulu; nyi di rumedwa gasi guta gu tivisa mahungu yaya nya gutsakise. 20U na khala gidudu; u si ganeli, kala si gu girega satshavbo sesi, kholu khwa khodwa khu magana yangu, ayo ma na giregago khu gikhati gyakone." 21Gasi vathu vatshavbo va di gu lindrela Zakariya, gumogo ni gu liwuga guhwela gwaye gu duga khu makhuvini nya Nyumba ya Nungungulu. 22Na dugide, kha nga kodza gu ganela navo; avo va di dzegela gu dziti khavo gyomo gi mu dugeledego makhuvini mule. A di ganela navo khu gu nonedzela, kholu a di khade gidudu. 23Na ma vbede matshigu nya thumo waye, a di bwelela gaya. 24Hwane nya matshigu, mwangadzi waye, Elizabheta, a di khura mimba, a si dzi wonegisi vbakari nya vathu gipimo nya livbandre migima. 25A di ganela, khuye: "Khu gu dzina gwaye Pfhumu a nyi girede silo sesi, gasi gu nyi tshula dzitshoni mu vathuni." 26Khu ngima nya livbandre na moyo, Gabriyeli a di rumedwa khu Nungungulu dhoropani ga Galileya nya gupwani Nazareta, 27ga gyagadzyana nya mbiri nya gupwani khu Mariya, gi nga bani gi tumbisidwe khu mwama nya gupwani khu Josefe, wa nyumbani ga Dhavide. 28Nagi vbohide avbo a nga bani a romo, girumwa gya Nungungulu gi di mu losa, khigyo: "Sewe, uwe nya gutale khu wuhigo, Pfhumu yi na ni uwe." 29Na pwide magana yaya, Mariya a di thuruga, a gu dzi wudzisa, khuye: "Ma gu tshamusela ginani maloselo yaya?" 30Girumwa gya Nungungulu gi di khigyo: "Mariya, u nga thavi, u manide wuhigo mahoni ga Nungungulu. 31U na khura mimba u velega gyanana nya gikhwathana u na gi thangisago lina la Jesu. 32A na bani ari muthu khongolo, a na ranwa pwani Mwamana wa Nungungulu a guromo vbatshani ngudzu. Pfhumu Nungungulu a na mu pharisa ndronga nya wufumu wa babe waye Dhavide. 33A na fuma ndranga ya Jakobe kala gupindruga; mufumu waye gima kha wu na nga vbela." 34Mariya a di embela girumwa gya Nungungulu khuye: "Si na girega kharini isoso ulo nyi si mu tigo mwama?" 35Girumwa gya Nungungulu gi di mu hakha, khigyo: "Liphuvbo nya gu Age li na gu tshigela; tshivba ya Nungungulu a guromo vbatshani ngudzu yi na gu fenengedza. Khu kharato, Gyanana nya gukatege gi na velegwago gi na ranwa Mwamana wa Nungungulu. 36Wona, nongo wago Elizabheta khuride nuye mimba wukhosaneni gwaye. Oyu khu ngima nya livbandre na moyo na khuride mimba, wule a nga bani a ranwa pwani ngon'wa, 37kholu ga Nungungulu gi mwalo gi si kodzegigo." 38Khavbo avbo Mariya, a di khuye "Eni nyi githumi gya Pfhumu, gu na girege gwangu kha nga idzo u ganedego khidzo." Girumwa gya Nungungulu gi di mu diga gi gu hongola. 39Khu matshigu yale, Mariya a di donga lipfhumba a hongola khu guvbiredza dhoropani ga Judha, gu nga bani gu khalela mu gigomoni. 40Na bede nyumbani ga Zakariya, a di losa Elizabheta. 41Elizabheta, na pwide gulosa ga Mariya, gyanana gi di ndragandraga khu gu nengela ndrani gwaye. Khavbo avbo, Elizabheta, na tade khu Liphuvbo nya gu Age, 42a di khusedza lito, a gu ganela, khuye: "U kategide, uwe, vbakari nya vanyamayi; kategide melego wa ndrani gwago. 43Wuhigo wangu wukhongolo! Kheni mani, eni, nya guta holedwe khu mayi wa Pfhumu yangu? 44Kholu, me ni gupwa gulosa gwago, gyanana gi di ndragandraga khu gutsaka ndrani gwangu. 45Kategide uye saye a nga khodwago kholu ma na tadzisega magana a nga embedwago na ma guta khiyo ga Pfhumu." 46Khavbo avbo, Mariya a di khuye: "Hefemulo wangu wu ngu rungudza Pfhumu, 47ni monyo wangu wu ngu nengela ga Nungungulu, Muvbanyisi wangu, 48kholu wonide gusolega ga githumi gyaye.Khu lisine, gukhugela muhuno mimela ni mimela yina khiyo nyi kategide, 49khaguva nya dzitshivbe a nyi girede silo sikhongolo. Li kategide lina laye. 50Wuhindzi waye wu ngu thaphela mimela ni mimela nya vale va mu ningago githawo. 51Giride silo sikhongolo khu mandza yaye, phalalegiside va nya matshandza. 52Tshiside vafumeli mu sikhaloni gwawe nya wufumu a gu khusedza va nya gu soleka; 53khuriside vandzale,a gu phalalegisa ni ndzala sitetema. 54Endredzide Israeli, githumi gyaye,khu gu dundruga wuhindzi waye. 55Kha nga idzo a nga bani a sambanyide khidzo ga vakokwe vathu,ga Abrahama ni ngamo yaye." 56Mariya a di khala ni Elizabheta gipimo nya migima miraru. Hwane nya isoso a di bwelela gaya. 57Na ma vbohide matshigu yaye, Elizabheta a di hefemula. 58Valongo ni vaakelane, na va wonide nya gukhavo Pfhumu yi mu tshude dzitshoni, va di tsaka naye. 59Na ma vbindride livbandre na mavili matshigu, khilo nya livbandre na mararu va dita hanisa wugwera gyanana; va di vbweta gu gi ninga lina la Zakariya, babe waye. 60Aholu mayi wakone a di ganedza, khuye: "Ahihi, gi na ranwa pwani khigyo Johane." 61Gasi avo va di khavo: "Mwalo nongo wago a gu ni lina lolo!" 62Khavbo avbo, va di wudzisa babe wakone, khu gu nonedzela, khavo: "Lina muni u vbwetago gu thangisa gyanana?" 63Uye, na lombide gipulanguana a di lova khuye "Johane khilo lina laye." Vatshavbo va di liwuga. 64Khavbo avbo, khana yaye yi di tulega, ni lidimi laye, li nga bani li tsharamede, li di tshulega nilo, a gu phela gu ganela a rungudza Nungungulu. 65Vaakelane vatshavbo va di tala khu githawo, ni ndruma yakone yi di pwala mu gigomoni gwatshavbo gwa Judheya. 66Vatshavbo va nga pwago silo sesi, va di si vegedza myonyoni gwawe, va gu wudzisana, khavo: "Gu na bani ari muthu muni gyanana gegi?" Khu lisine gyanana gi di pharidwe khu mandza mavili khu Pfhumu. 67Khavbo avbo, Zakariya, babe wakone, a di tala khu Liphuvbo nya gu Age a ganela, khuye: 68"A na rungudzwe Pfhumu Nungungulu wa Israeli,kholu dzude ata phasedzela ni gu vbulugisa vathu vaye. 69A hi resede Muvbanyisi nya tshivba,a dugelago nyumbani ya githumi gyaye Dhavide. 70Kha nga idzo a nga ganelago khidzo galegaleyo,khu magana ya vaprofeti vaye nya gukatege, 71khuye a na hi vbulugisa ga valala vathu ni ga vatshavbo va hi zondrago: 72a fela gu yeyedza wuhindzi a giredego vakokwe vathu,khu gu alakanya gidzumeledzwano gyaye nya gukatege, 73ni gu alakanya gisambanyo a nga girago ga babe wathu Abrahama, 74nya gu, hi vbulugise ga valala vathu,hi mu thumela nyamba thava gilo, 75na hi agisidwe hi gu lulama mahoni gwaye matshiguni yatshavbo nya guvbanye gwathu 76Gasi uwe, mwamanawe,u na ranwa pwani u muprofeti wa Nungungulu a khusegidego ngudzu, kholu u na thanga mbeli ga Pfhumu, gasi gu dongisela dzindzila dzaye. 77Gufela gu tivisa guvbanyiswa ga vathu vaye,a gu gutsetseledwa nya siwono, 78kholu Nungungulu wathu, khu kota nya lihaladzo ni wuhindzi waye,a ngu hi rumela khu vbatshani wenengedzo wa ndzadzini, 79gasi guta wenengedza avo va vbanyelago gidemani ni gusivbalani nya lufu,gumogo ni gu hi gimbidzisa khu ndzila nya gurule." 80Gasi igyo gyanana gi di gu dandra khu tanga ni wuhigo wa Nungungulu. Aholu gi di vbanyela mu giwulani kala litshigu gi nga dzi wonegisago ga na Israeli.

will be added

X\