JUDHA 1

1Eni, Judha, khumbi ya Jesu Kristo nyi gu ndruye wa Jakobe, nyi ngu lovela ava va ranidwego khu Nungungulu, va vbanyago lihaladzoni ga Nungungulu Babe, va vhikedwago khu Jesu Kristo. 2Wuhindzi, ni gurula ni lihaladzo si na tale ngudzu ngudzu ga enu. 3Sigodwa sangu, eni nyi di gira tshivba nya gu mi loveleni khu mahungu nya guvbanyiswe hi gu nago gumogo nanu. Nyi di dzipwa gu kheni i tshukwana nyi mi lovela olu gasi gu mi tiyiselani litungani mu li dwanago khu kotani nya gukhodwe gu ningidwego vathu vaye kala gupindruga. 4Kholu vambe vathu nyamba khodwa va bede vbakari gwathu nyamba tidwa. Avo va gu vbindrugedza mahungu ma ganelago khu wuhigo wa Nungungulu wathu, vafela gu vhikela mavbanyelo yawe nya guvivbe. Va nyenyide gambe Jesu Kristo a gu uye basi Muhevbudzi ni Pfhumu yathu. Gale ngudzu Milowo nya gu Age yi tivisidego gumbembiswa va gu hakhidego. 5Ambari ulo mu matigo gwadi mahungu yaya, nya gu vbweta gu mi dundrugisa gu kheni Pfhumu hwane nya gu na tshude vathu va na Israeli, a va dusa tigoni ga Egipito, a di mbembisa vatshavbo ava va nga mba khodwa. 6Dundrugani dzingilozi dza Nungungulu si nga mba kodza gu sayisa wurendra wawe, dzi hungidwe khu makhetshe nya gupindruge, phalani nya gidema, omu Nungungulu a dzi vegidego dzi virela litshigu nya gulamudwe. 7Alakanyani Sodhoma ni Ghomora ni mambe madhoropa ya vbafuvbyana mule, a nga girago nga sirumwa sile, va gira wubhayi, ni gu bhayana khu wama wawe, va manide tsayiso nya nilo nya gupindruge. Esi si nga va dugelelago, si khade gidundrugiso ga vathu vatshavbo. 8Avo navo va na ni mawonelo ma va girago va ghohela sivili sawe; va gu yeyisa Mufumu wa Nungungulu, va gu vala vathangeli vaye nya vakhongolo. 9Ambari ngilozi nya yikhongolo, Migeli, kha gya gira isoso nya guvale, gikhati gi nga ganedzisana ni Sathane khu gu vbweta guti khu mani a na khalago ni girumbi gya Mosi. Migeli gima kha tiya gulamula Sathane khu gu mu vala. Aholu, a di mu embela khuye: "Pfhumu a na gu kawuke uwe." 10Vathu vovo va gu vala esi va si si pimigo. Silo va sitigo khu tumbunuko nya mavbanyelo nga sirengo nyambana mapimo khiso si va pfhungumulago. 11Libango lawe! Va gu bela khu ndzila ya Kayimi. Khu kotani nya lidora ni dzitsapawu va dzi ningede gighohoni nya mithumo ya Bhalahama; va dzi mbembisa khu gu ganedza nya nga ogu ga Kore. 12Va gu manega mitshanganoni gwanu nya wundruye, va gu leva malevelo nya dzitshoni, nya gukhunguvanyise. Avo va gu dzi wonela avo wurumba wawe basi. Va gu khala nga mapfhi nyambana ndzadzi ma pengiswago khu phuvbo; va gu khala nga misimbo yile nya gu, ambari vbamatshigatunu yi si velegigo mihandro; va khade nga misimbo yi sigudwago ni mikhamba yaye, yifa yi banga. 13Va khade nga mavimbi nya guvbenye ya linene, ma gugumugago ma pupuma liguvi nya dzitshoni dzawe; nga dzinyeledzi dzi legalegago, dzi vegedwego wulanga gidemani nya guthise ngudz, kala gupindruga. 14Khu Henoki, gitugulwana nya livbandre na sivili ga Adhamu, a profetide khu kota yawe khuye: "Wonani, Pfhumu yi ni mazanazana nya dzingilozi dzaye, gasi, 15guta lamula vatshavbo. Yi bayisa vatshavbo va nyamba khodwa khu kotani nya mithumo yawe yatshavbo nya guvivbe, ni magana yawe yatshavbo nya guthise ma ganedwego khu sighohi si ngamba khodwa si Mu vala." 16Vathu vovo va gu ngurangura gikhati gyatshavbo ni gu singedzela vakwawe, va gu landrisela gudogorela nya myonyo yawe, va dzi khusedza, va pfhadza vakwawe. 17Aholu, enu, sigodwa sangu, dundrugani esi si nga ganedwa khu vapostoli va Pfhumu yathu Jesu Kristo. 18Avo va nga khavo: "Gikhati gu na vbohago matshigu nya guhegise, va na manega vathu va na gu mi poyilago; vathu va landrago gudogolela gwawe nyamba khodwa." 19Khavo avo va girisago mihambano kholu va fumedwe khu gudogolela gwawe. Va mwalo Liphuvbo. 20Aholu, enu sigodwa sangu, simamani mu andra ni gukhodwa mu gu nago; khugo gukhodwa nya lisine ngudzu guvbindra gwatshavbo. Lombelelani khu tshivba nya Liphuvbo nya gu Age. 21Dzi vegeni lihaladzoni la Nungungulu, na mu gu lirela gu khenu, Pfhumu yathu Jesu Kristo, khu wuhindzi waye a mi ninge guvbanya nya gupindruge. 22Pwelani wusiwana ava va kanakanago, 23vambe va vbanyiseni, mu va dusa niloni; khu tshivba tsetselelani. Aholu dzi wonelani, vengani ambari guambala gwawe gu kunedego khu sivili sawe. 24Aholu wule a gu na ni tshivba nya gu mi vhikele, gasi mu si thegi; ga uye a agidego, a dzi kodzago gu mi emisani na mu tiyide mbeli gwaye nya wudhumo muri mwalo gihoso, na mu tade khu gutsaka wudhumoni gwaye; 25Uye a gu Nungungulu moyo basi, Muvbanyisi wathu, a ngu yela gu hakha khu ga Pfhumu yathu Jesu Kristo: Wuzundzo, wudhumo, tshivba, wufumo gukhugela guhegulani ga mimela yatshavbo ni olu, kala gupindruga! Amen.

will be added

X\