JOHANE 8

1Jesu a diya Gigomoni nya Miolivha. 2Ni dzimindru dzikhongolo a di manega gambe Nyumbani ya Nungungulu. Vathu vatshavbo va di mu yela. Khavbo avbo, a di khala vbavbatshi a va hevbudza. 3Nari vbakari nya guhevbudze, vahevbudzi nya Nayo ni Vafarisi va di mu resela nyamayi moyo a nga manwa na gu bhaya. Na va mu vegide vbakari gwawe, 4va di embela Jesu, khavo: "Muhevbudzi, nyamayi yoyu a di manwa na gu bhaya. 5Mosi, a hi hevbudzide Nayoni gu khuye vanyamayi nya nga oyu va ngu yela gu pfarwa khu siwindri. U ngu khuwe ginani?" 6Va di ganela esi gasi gu mu riya, vafela gu mana gilo nya gu mu kone khigyo. Aholu Jesu a di noga, a gu lova vbavbatshi khu nyala. 7Kha nga ulo va nga simama gu mu wudzisa, a di ololoka, a ganela khuye: "Uye a dzitigo nya gukhuye mwalo gighoho, a na phele khuye a mu rinyela giwindri!" 8Khavbo avbo, a di noga nya luphye a lova gambe vbavbatshi. 9Na va pwide magana yaya, va di phalalega khu moyo ni moyo, gu phela khu vakhongolo, gu tshala basi Jesu ni nyamayi wule a nga bani a emide vbakari. 10Jesu, na ololokide, a di mu wudzisa, khuye: "Nyamayi, gasi vomo hayi? Mwalo a gu konidego gani?" 11A di hakha, khuye: "Mwalo, Pfhumu." Jesu a di ganela khuye: "Eni neni kha nyi gu giri gilo. Indra basi, aholu gu khugela muhuno u nga engedzi gambe gughoha."] 12Jesu a di va embela gambe, khuye: "Eni kheni wenengedzo nya litigo. Uye a nyi landrelago kha na gimbila gidemani, aholu a na bani ari ni guwonegela nya guvbanye." 13Vafarisi va di mu embela, khavo: "Wa gu dzi girela wukustumunyu wabune. Wufakazi wago khandri wa lisine!" 14Jesu a di va hakha, khuye: "Ambari nya gu dzi fakazela nyabune, wufakazi wangu khwa lisine. Nyi ngu guti umo nyitago khumo niyo nyi hongolago! Gasi enu kha mu guti umo nyitago khumo, niyo nyi hongolago. 15Enu mwa gu lamula khu mavbanyelo nya muthu, gasi eni kha nyi lamuli muthu. 16Ambari nya gulamula, gulamula gwangu khwa lisine, kholu khandreni nyenga basi; kheni ni Babe a nga nyi rumelago. 17Umo nya Nayo wanu gu lovidwe pwani wufakazi nya vathu vavili khwa lisine. 18Eni nyi ngu dzi girela wufakazi; Babe, a nga nyi rumelago, a ngu nyi girela nuye." 19Khavbo avbo, va di mu wudzisa, khavo: "Womo hayi Babe wago?" Jesu a di va phindrula, khuye: "Ni eni kha mu nyiti, ni Babe wangu kha mu muti. Nari pwani mu di nyitide, na mutide nuye Babe." 20Jesu a di ganela magana yaya vbamezatunu nya miningelo, na gu hevbudza Nyumbani ya Nungungulu. Aholu, mwalo a nga mu molago, kholu gikhati gyaye gi di si gu vbohi. 21Jesu a di va embela gambe, khuye: "Eni nyi ngu hongola, mu na nyi vbweta, aholu mu na fela gighohoni gwanu. Iyo nyiyago kha mu dzi kodzi guya." 22Khavbo avbo, Vajudha va di wudzisana, khayo: "A gu vbweta gu dzi songa gani, ulo a gu khuye: 'Iyo nyiyago kha mu dzi kodzi guya!' " 23A di engedza gu va embela, khuye: "Enu mu va vbavbatshi momu; gasi eni nyi wa vbatshani; enu mu va tigoni, gasi eni kha nyiri wa tigonimu. 24Khu kharato nyi nga mi embelago nya gukheni mu na fela giwononi gwanu, kholu mwa gumba khodwa nya gukhenu eni kheni kamwe, mu na fela giwononi gwanu." 25Khavbo avbo, va di mu wudzisa, khavo: "Gasi khuwe mani?" Jesu a di va phindrula khuye: "Nyi mi embedeni gu khugela guhegulani gu: kheni mani! 26Nyi na ni mahungu nya mangi nya guganele ni gulamula vbakari gwanu. Kholu wule a nyi rumedego khwa lisine. Iso nyi hevbudzago tigoni khiso nyi si pwidego gwaye." 27Gasi avo kha va nga pimisa nya gukhavo a gu ganela isoso na gu thula Babe waye. 28Khavbo avbo, Jesu a di khuye: "Gikhati mu na khusedzago Mwamana wa Muthu, mu na dzitini gu khenu kheni mani. Mu na wona nya gukhenu gimwalo nyi girago khu gu gi khugela, aholu mu na dziti gu khenu nya gu ganela kha nga idzo a nyi hevbudzidego khidzo Babe. 29Wule a nyi rumedego anani eni; kha nyi diga nyenga, kholu gikhati gyatshavbo nya gu gira esi si mu tsakisago." 30Khu gupwa magana yaya, nya vangi va di khodwa gwaye. 31Jesu a di embela Vajudha vale va nga khodwa gwaye, khuye: "Mwa gu simama guvegedza magana yangu, mu na khala vapizane vangu khu lisine, 32mu natini lisine, gambe ilo lisine li na mi gira vathu nya gutshulege." 33Va di mu phindrula, khavo: "Ethu hi melego wa Abrahama, gima hi si gu khali dzikhumbi dza muthu, khu ginani ugu khuwe mu na tshulega?" 34Jesu a di va hakha, khuye: "Khu lisine, nyi ngu mi embelani kheni: muthu watshavbo a ghohago, khumbi nya gighoho. 35Khumbi kha yi khali ndrangani gikhati gyatshavbo, gasi gyanana khya ndrangani. 36Khu kharato, mwa gu tshudwa khu gyanana, mu na bani mu tshulegide khu lisine. 37Nyi ngu dziti nya gukheni mu melego wa Abrahama, aholu mwa gu vbweta gu nyi songa, kholu magana yangu kha ma beli myonyoni gwanu. 38Eni nya gu mi embela iso nyi si wonidego ga Babe wangu; gasi enu mwa gu gira iso mu si pwidego ga babe wanu." 39Va di mu phindrula, khavo; "Babe wathu khu Abrahama!" Aholu, Jesu khuye: "Nari pwani mu sanana sa Abrahama na mu gu landra mithumo ya Abrahama. 40Gasi enu mwa gu vbweta gu nyi songa, eni nyi mi embedego lisine nyi li pwidego ga Nungungulu. Abrahama kha gira kharato! 41Enu mwa gu gira mithumo ya babe wanu." Avo va di khavo: "Kha ha velegedwa wubhayini. Hi na ni Babe moyo basi a gu, Nungungulu." 42Jesu ava hakha khuye: "Nari pwani Nungungulu Babe wanu, na mu nyi gola, kholu eni nya guta khu gu rumedwa khu Nungungulu. Kha nyata khu gudzina gwangu, aholu khuye a nyi rumedego. 43Khu ginani mu si ma tigo maganelelo yangu? Kholu mu si dzinigo gu hakha magana yangu! 44Babe wanu khu Sathane, khu kharato mwa vbweta gugira guhaladza gwaye. Uye gighevenga gukhugela guhegulani, gima a si gu emeli lisine, kholu gwaye limwalo lisine. A gu lipha khu gu landra tumbunuko nya makhalelo yaye, kholu uye muliphi gambe babe nya malipha. 45Gasi eni nya gu mi embela lisine, pima kholu mu si khodwigo. 46Khu mani nya enu a dzi kodzago gu nyi kona khu gighoho? Nya gu mi embela lisine, khu ginani mu si khodwigo? 47Uye a gu wa Nungungulu a ngupwa magana ya Nungungulu; kha nga olu mu si mapwigo, giyeyedzo nya gupwani kha muri va Nungungulu." 48Vajudha va di mu hakha, khayo: "Khandridzo edzi hi gu khethu u Musamariya, ni gu khethu u na mi liphuvbo nya guvivbe, gani?" 49Jesu a di va phindrula, khuye: "Nyi mwalo liphuvbo nya guvivbe, aholu nya gu rungudza Babe wangu; gasi enu mwa gu nyi nyenya. 50Eni kha nyi dwaneli gidhumo gyangu, Babe khuye a nyi ningago wudhumo, kholu khuye mulamuli wangu. 51Khu lisine, nyi ngu mi embelani, kheni: uye a vegedzago magana yangu, gima kha na ngafa." 52Vajudha va di mu embela khayo. "Olu khavbo hi gu wonago khethu u na ni mandriki nya guhandruge. Abrahama fude, vaprofeti navo; nulo u gu khuwe: 'Uye a vegedzago magana yangu gima kha na ngafa.' 53Ina uwe u khongolo guvbindra babe wathu Abrahama, a ngafago? Ni vaprofeti va fudego navo? Gasi wa gu dzi gira mani uwe?" 54Jesu a di va hakha, khuye: "Nya gu dzi dhumisa nyabune, wudhumo wangu khandri wa gilo. Aholu Babe wangu khuye a nyi dhumisago, wule mu gu khenu Nungungulu wanu. 55Aholu, kha mu mutini; eni kheni nyi mu tigo. Nari pwani nyi di ganede kheni kha nyi mu ti, na nyi liphide kha nga enu. Eni nyi ngu mu ti ni guvegedza magana yaye. 56Babe wanu Abrahama tsakide khu gulirela guwona litshigu langu; na li wone a di nengela" 57Khavbo avbo, Vajudha va di khayo: "U ngari mwalo livbandre magumi myaga, ni gu khuwe u wonide Abrahama?" 58Jesu a di va hakha, khuye: "Khu lisine, nyi ngu mi embelani kheni: na si gu velegwi Abrahama, nyi di romo eni." 59Khavbo avbo, va di rola siwindri gasi gu mu rinyela, aholu Jesu a di sihala, a gu duga Nyumbani ya Nungungulu.

will be added

X\