JOHANE 7

1Khavbo avbo, Jesu a di gimbilagimbila tigoni ga Galileya. Adisi goli gu gimbila tigoni ga Judheya, kholu vakhongolo nya Vajudha va di gu vbweta gu mu songa. 2Wudiri vbafuvbi buzo nya Vajudha, wule wu ranwago pwani i buzo nya mitshatsha. 3Khu kharato, vandriyaye va di khavo: "Khuga khavba, indra Judheya, gasi vapizane vago va wone navo mithumo u yi girago, 4kholu muthu watshavbo a vbwetago gu tidwa kha thumi khu gisihaledza. Kha nga olu u girago silo nya nga esi, dzi yeyedze tigoni." 5Khu lisine, ambari vandriyaye va disi khodwi gwaye. 6Khavbo avbo, Jesu a di khuye: "Gikhati gyangu gisi gu vbohi, aholu ga enu gikhati gyatshavbo khyadi. 7Litigo kha li dzi kodzi gu mi zondra, aholu eni li ngu nyi zondra, kholu nya gu li tugudzisa mithumo yaye nya guvivbe. 8Indrani enu buzotunu. Eni kha nyiyi, kholu gikhati gyangu gisi gu vbohi." 9Na va embede esi, a di tshala Galileya. 10Whane nya gu vandriyaye na va hongode, a di landra nuye khu gisihaledza, nyamba dzi wonegisa. 11Vajudha va di gu mu vbweta vbakari nya buzo, na va gu wudzisana, khayo: "Gasi womo hayi uye?" 12Gu di romo guganedzisana nya gukhongolo vbakari nya gidzemo khu kota yaye. Vambe va di khavo: "Muthu nya wadi," gasi vambe, khavo: "Eye! A gu kanganyisa vathu." 13Ambari ulo, mwalo a nga bani a ganela khuye mwandrani, khu hwanga nya Vajudha. 14Aholu vbakari nya buzo, Jesu a di hongola Nyumbani ya Nungungulu aya hevbudza. 15Vajudha va di liwuga khayo: "A gu yiti kharini Milowo gima na sa hevbula?" 16Jesu a di va hakha, khuye: "Gihevbudzo gegi khandri gyangu, khya wule a nga nyi rumelago. 17Uye a vbwetago gugira gugola gwa Nungungulu a na dzi wudzise gu khuye gihevbudzo gyangu gya guta khu ga Nungungulu, mwendro nya gu gi khugela. 18Uye a dzi fakazelago abune a gu vbweta gidhumo gyaye, aholu oyu a vbwetago gu dhumisa uye a nga mu rumelago, muthu nya lisine, a gu mwalo malipha. 19Gasi Mosi kha mi ningani nayo, gasi? Aholu mwalo ni moyo wanu a wu landrisago! Khu ginani mu vbwetago gu nyi songa?" 20Gidzemo gi di phindrula, khigyo: "U handrugide. Khu mani a vbwetago gu gu songa?" 21Jesu a di va hakha, khuye: "Khegi gya gimwegyo basi nyi giridego, mwa gu liwuga mwatshavbo. 22Mosi a mi ningideni wugwera - khandri Mosi a nga wu phela, aholu khu vakokwe - enu mu ngu bedza wugwera khu Sabhado. 23Kha nga olu mu dzumedzisago gu muthu a bele wugwera khu Sabhado, gasi gulandrisa Nayo wa Mosi, khu ginani mu nyi zangarelago kholu nyi nga vbanyisa muthu khu Sabhado? 24Gulamulani mu nga khedzi khu khovbe, aholu lamulani khu lisine." 25Vambe Vajudha va Jerusalema va di wudzisa, khayo: "Ina khandruye oyu va mu vbwetago gasi gu mu songa, gani? 26Nga wona, a gu ganela mwandrani, na tshulegide, ne gilo kha va mu giri! Ina vafumeli vathu va khodwe gu khavo khu lisine khuye Kristo, gani? 27Ethu oyu hi ngu guti umo atago khumo; aholu, gikhati anatago Kristo, mwalo ni moyo a na gutigo umo atago khumo." 28Gasi Jesu, gikhati gyogyo, a di gu hevbudza Nyumbani ya Nungungulu, a di khusa lito, khuye: "Ina, mu ngu nyitini gumogo ni guti umo nyitago khumo! Aholu kha nyata khu gudzina gwangu; uye a nga nyi rumelago, mu si mutigo enu khuye a gu ni lisine. 29Eni nyi ngu muti, kholu nya guta khiyo gwaye, ni gu gambe khuye a nyi rumedego." 30Khavbo avbo, va di vbweta gu mu mola, aholu mwalo a nga mu khuhago, kholu gikhati gyaye gi di si gu vbohi. 31Vbakari nya gidzemo, nya vangi va di khodwa gwaye, va gu wudzisa khavo: "Ina aguta Kristo anata gira siwoniso nya sikhongolo nya guvbindre esi a giridego, gani?" 32Vafarisi va dipwa guganedzisana nya gidzemo khu kota ya Jesu; vakhongolo nya vaphasi nya mhamba ni Vafarisi va di rumela dzindruna gasi guya mu mola. 33Jesu a di khuye: "Nyi ngari nanu gikhati gidugwana, kholu nyi ngu vbweta gu hongola ga oyu a nyi rumedego. 34Mu na nyi vbweta, aholu kha mu na nyi mana; iyo nyiyago kha mu dzi kodzi guta." 35Vajudha va di wudzisana, khavo: "Hayini a vbwetago guhongola avbo nyamba mu mana ethu? Mwendro a gu vbweta guya patana ni ava va phalalegidego tigoni nya Vagreki, gumogo ni guya hevbudza Vagregu? 36A gu vbweta khuye ginani khu magana yaya nya gukhuye: 'Muna nyi vbweta, aholu kha mu na nyi mana; ni gu khuye avbo nyiyago kha mu dzi kodzi guta?' " 37Khu litshigu nya guhegise, a gu litshigu likhongolo nya buzo, Jesu, na emide, a di khusa lito khuye: "Uye a gu ni lidora anate gwangu ata sela! 38Kha nga yi ganelago Milowo: khu monyoni ga wule a khodwago gwangu, gu na duga mitsongo nya mati nya guvbanye." 39Jesu a di gu thula Liphuvbo, lile li nga bani li vbweta guhakhwa khu vale va khodwago gwaye; Liphuvbo li di si gu tshigi, kholu Jesu adisi gu khusedzwi wudhumoni gwaye. 40Vbakari nya gidzemo, vambe nya vale va nga mu pwago, va di khavo: "Khu lisine uye muprofeti!" 41Vambe va di khavo: "Khu Kristo!" Gasi vambe va di khavo: "Kristo nya gute khu Galileya? 42Ina kha yi ganeli Milowo khiyo Kristo a na dugela nyumbani ya Dhavide, tigoni ga Bhetlehema, a gu umo a nga velegedwa umo Dhavide, gani?" 43Khu kharato, gu di manega gu hambana vbakari nya gidzemo khu kota Yaye. 44Vambe va di vbweta gu mu mola, aholu mwalo a nga mu khuhago. 45Dzindruna dzi di bwelela ga vakhongolo nya vaphasi nya mhamba ni Vafarisi; khavbo avbo, dzi diya wudziswa pwani: "Khu ginani mu ngamba wuya naye?" 46Dzindruna dzi di phindrula, khidzo: "Gima a si gu manegi muthu a ganelago kha nga uye!" 47Vafarisi va di khavo: "Enu nenu mu di dzumela gukanganyiswa? 48Ina, mu di nga wona moyo nya madhota mwendro Vafarisi va khodwa gwaye, gani? 49Dzitini gu khenu vathu vale va si wutigo Nayo va vadwe khu Nungungulu." 50Nikodemo, moyo nya Vafarisi, wule a nga hongola aya bhula ni Jesu, a di va wudzisa, khuye: 51"Ina nayo wathu wu ngu dumedzisa gumola muthu nyamba hegula khu gu mu wudzisa, gasi guti gighoho gyaye, gani?" 52Va di mu phindrula, khavo: "Uwe nuwe u wa Galileya? Khedza gwadi, u na wona nya gukhuwe mwalo muprofeti a dugelago Galileya." [ 53Khavbo avbo, va di phalalega: muthu ni muthu a gu hongola gaya gwaye.

will be added

X\