JOHANE 3

1A di romo moyo nya Mufarisi, nya gupwani khu Nikodemo, a nga bani ari linganagana nya Vajudha. 2A di hongola ga Jesu ni vbakari nya wutshigu, aya khuye: "Rabi, hi ngu dziti nya gukhethu u dzude khu ga Nungungulu kha nga Muhevbudzi, kholu mwalo a kodzago gu gira siliwugiso nya nga iso u girago, a gu bani ari mwalo tshivbani ya Nungungulu." 3Jesu a di phindrula, khuye: "Khu lisine, nyi ngu gu embela, kheni: oyu a na gu mba velegwa nya luphye, gima kha na wona mufumu wa Nungungulu." 4Nikodemo a di mu wudzisa, khuye: "Ina gu ngu kodzega kharini guvelegwa muthu a gumbidego? Ina a na dzi kodza gubela nya luphye ndrani ga mayi waye, gasi guvelegwa nya luphye, gani?" 5Jesu a di phindrula, khuye: "Khu lisine, nyi ngu gu embela, kheni: oyu a na gu mba velegwa khu mati ni Liphuvbo, kha na dzi kodza gubela mufumuni wa Nungungulu. 6Igyo gi velegidwego khu tshivba nya muthu, muthu kamwe, gasi igyo gi velegidwego khu Liphuvbo, Liphuvbo. 7U nga liwugi kholu nyi nga kheni: guvbwetega mu velegwani nya luphye. 8Phuvbo ya gu furugedza avbo yi gunago; uwe u gupwa ligwaha laye, aholu, u si guti umo yitago khumo, numo yiyago. Khidzo kharato vatshavbo va velegidwego khu Liphuvbo." 9Nikodemo a di wudzisa, khuye: "Si na girega kharini kharati?" 10Jesu a phindrula, khuye: "Uwe u gu Muhevbudzi tigoni ga Israeli, khu mati mahungu yaya gani? 11Khu lisine, nyi ngu gu embela, kheni: ethu ha gu ganela esi hi si tigo, ni gufakaza esi hi si wonego, gasi enu mwa gu nyenya wufakazi wathu. 12Olu mu si khodwigo nya gu ganela khu silo sa mafuni, mu na khodwa kharini nya gu ganela khu silo sa ndzadzini? 13Mwalo a litidego ndzadzini, vbavbandze ga ule a nga tshigago khu ndzadzini, a gu Mwamana wa Muthu. 14"Kha nga Mosi a nga khusedzago nyoga giwulani, Mwamana wa Muthu gu vbwetega a khusedzwa nuye, 15gasi muthu watshavbo a khodwago gwaye a mane guvbanya nya gupindruge. 16"Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge. 17Kholu Nungungulu kha rumela Mwanaye mafuni gasi guta mbembisa litigo, aholu guta li vbanyisa. 18Uye a khodwago gwaye kha mbembi; aholu, uye a si khodwigo a na mbemba, kholu kha khodwa linani la Mwamana wa moyo wa Nungungulu. 19"Igyo gina va mbembisago khegi: guwonegela gu dzude mafuni, aholu vathu va di gola ngudzu gidema guvbindra guwonegela, kholu mithumo yawe yi vivbide. 20Kholu muthu watshavbo a girago guvivba a ngu venga guwonegela, gambe kha hidzimeli vbafuvbi, gasi mithumo yaye yi si tugudwi. 21Gasi ule a landrago ndruda, a gu hidzimela guwonegelani, gasi gu wenengedzwa mithumo a yi giredego tshivbani ga Nungungulu." 22Hwane nya esi Jesu, gumogo ni vapizane, adiya tigoni ga Judheya, iyo a ngaya khala navo a gu bhapatisa. 23Johane nuye a di gu bhapatisa tigoni ga Enoni, vbafuvbi ni Salime, kholu iyo ma di romo mati nya mangi; va diya vathu nya vangi, gasi guya bhapatiswa. 24Johane a di si gu khothedwi. 25Gu di manega guganedzisana khu kota nya guagiswe vbakari nya vapizane va Johane ni Vajudha nya gukari. 26Va diya ga Johane vaya khavo: "Rabi, wule u nga bani uri naye tshatugo ga Jordhani, wule u nga mu fakazelago, womo a bhapatisa, vathu vatshavbo va guya gwaye." 27Johane a di phindrula, khuye: "Mwalo a dzi kodzago gu hakha gilo a gu bani a sa ningwa khu ndzadzini. 28Enu kamwe mu dzifakazi nya iso nyi ganedego, kheni: khandreni Kristo; nyi di rumedwa basi guthanga mbeli gwaye. 29Buzoni nya mutshadho mudzegi khuye a gu ni mwangadzi gasi phelegedzi ya mudzegi, a gu iyo yi mu bangaladzago ni gu mu yingisa, ya gupwa lito la mudzegi ya gu tsaka ngudzu. Khilo eli litsako langu nya guvbelele. 30Uye a ngu yela gudandra, gasi eni nyi vbunguga." 31Uye atago khu vbatshani khusegide vbatshani guvbindra vatshavbo; gasi uye a gu wa mafuni a gu lumba mafu, gambe a gu ganela khu silo sa mafuni. Oyu atago khu ndzadzini, 32a gu fakaza iso a nga si wonago ni gu si pwa, aholu, mwalo a hakhago wufakazi waye. 33Uye a hakhago wufakazi waye a ngu tiyisa nya gukhuye Nungungulu kwa lisine. 34Kholu wule a nga rumedwa khu Nungungulu a gu ganela mahungu ya Nungungulu, Nungungulu kha mu ningi Liphuvbo khu gu mu pimela. 35Babe a ngu gola Mwanaye, gambe vegide silo satshavbo mandzani gwaye. 36Uye a khodwago ga Mwanaye a na ni guvbanya nya gupindruge. Gasi uye a si mu yingisigo kha na mana guvbanya, gambe a na tsayiswa khu likhulo la Nungungulu.

will be added

X\