JOHANE 21

1Khavbo avbo, Jesu a di dzi wonegisa gambe ga vapizane siwoni ga Tiberiyade. A dzi wonegiside kharati: 2Va di romo vatshavbo Simoni Pedro, Tomasi nya gupwani khu Mavbaha, ni Natanaeli, givelegwa gya Khanani gwa Galileya, gumogo ni sanana sa Zebhedhewu, ni vapizane vavili. 3Simoni a di va embela, khuye: "Nyi nga gu hongola nyi ya goga." Va di mu hakha, khavo: "Ethu nethu hi na hongola nago." Va di khuga, vaya bela ngalavani, aholu, kha va nga mana gilo wutshigu watshavbo. 4Na gugya, Jesu a di dzi wonegisa gwawe na emide funguni, aholu, vapizane kha va nga mu tugula khavo khuye. 5Khavbo avbo, Jesu a di khuye: "Vanavangu, mu na ni ndzandzi nya guhodze, gani?" Va di mu hakha, khavo: "Ahihi." 6A di va embela, khuye: "Thesani dzikhoga kha guya phuvbo ga nyamudye nya ngalava, mu na mola." Na va dzi theside, kha va nga dzi kodza ni gu dzi ndrindrela, kholu dzindzandzi dzidiri dzingi. 7Khu vbale, mupizane wule nya gigodwa gya Jesu a di embela Pedro, khuye: "Khu Pfhumu!" Pedro na pwide gupwani khu Pfhumu, a di ambala ngandzu a bvumula matini, kholu adiri wumbwiri. 8Gasi vambe vapizane va di wuya siwoni ni ngalava, na va gu ndrindrela dzikhoga, nya gutale khu dzindzandzi, kholu adiri vbafuvbi, pfhuka nya guningane lizana dzimetru (100m) khu ngalavani. 9Va di wona ndzandzi yi na gu vawudwa vbagikhotunu, gumogo ni gibaba. 10Jesu a di khuye: "Nga resani dzindzandzi mu nga molago." 11Khavbo avbo, Simoni Pedro a di bela ngalavani, a ndrindrela dzikhoga dzi nga bani dzi tade khu lizana ni livbandre magumi ni ndzandzi tharu (153) nya dzikhongolo; ambari dzi nga bani dzi tade, dzikhoga kha dza nga pferuga. 12Jesu a di va embela, khuye: "Deluni muta hodza." Mwalo a nga tiyela gu mu wudzisa khuye:"Khuwe mani?" Kholu va di gu mu ti khavo khu Jesu. 13Khavbo avbo, Jesu a di hidzimela, a gu dzega gibaba a va ninga, a gira kharato gambe ni ndzandzi. 14Khiyo eyi nyondro nya wuraru Jesu a nga dzi wonegisa ga vapizane vaye, whane nya gu bani a wugide khu ga vafudego. 15Na va hodzide, Jesu a di wudzisa Simoni Pedro, khuye: "Simoni, mwamana wa Jona, u ngu nyi gola guvbindra ava, gani?" Uye a di khuye: "Ina, Pfhumu, gale nu gu dziti nya gu khuwe nyi ngu gu gola." Jesu khuye: "Havisa dzinvuta dzangu." 16Jesu a di engedza gambe, khuye: "Simoni, mwamana wa Jona, u ngu nyi gola kamwe gani?" Uye a di khuye: "Ina, Pfhumu, uwe u ngu dziti khuwe nyi ngu gu gola." Jesu khuye: "Havisa dzinvuta dzangu." 17A di mu wudzisa nya wuraru, khuye: "Simoni, mwamana wa Jona, ina kamwe u ngu nyi gola uwe?" Pedro a di garadzega, kholu a nga mu wudzisa nya wuraru, khuye: "U ngu nyi gola, gani?"A di mu hakha, khuye: "Pfhumu! U nguti satshavbo; u ngu dziti gwadi khuwe nyi ngu gu gola." Jesu a di mu embela, khuye: "Havisa dzinvuta dzangu. 18Khu lisine, nyi ngu gu embela, kheni: nu ngari gikhwathana u di dzi ambalela, u gu hongola umo u nga bani wu guna. Gasi gikhati u na gumbago, u na thawuludza mawogo yago, va gu ambagisa, gasi va gu yisa umo u si gunigo." 19A di ganela kharati na gu thula mafelo Pedro a nga hadza gu dhumisa khayo Nungungulu. Khavbo avbo, a di mu embela, khuye: "Nyi landre." 20Pedro, na thendregedzide, a di wona nya gukhuye va di gulandrwa khu mupizane wule a nga bani a godwa khu Pfhumu, wule, vbakari nya gilalelo a nga hidzimelago ga Jesu, a mu lembela, khuye:"Gasi khu mani a vbwetago gu gu ningela?" 21Na mu wone, Pedro a di wudzisa Jesu, khuye: "Oyu ke, ginani gi na gu mu dugelelago?" 22Jesu a di hakha, khuye: "Nya gu dzina gu kheni a vbanye kala nyi gu wuya, ginani gi gu garadzago? Uwe nyi landre basi." 23Khavbo avbo, ma di phalalega, vbakari ga vandriyaye, malipha nya gupwani mupizane wule kha na ngafa. Jesu khandri a di khuye: kha nafa, aholu, "Nya gu dzina gu kheni a vbanye kala nyi gu wuya, ginani gi gu garadzago?" 24Mupizane yoyu khuye a fakazago silo sesi, khuye gambe a si lovidego. Hi ngu dziti gu khethu wufakazi waye khwa lisine. 25Somo simbe silo nya singi Jesu a si giridego. Nari pwani si di lovidwe khu gimwegyo ni gimwegyo, nyi ngu tiyisa gu kheni ambari litigo latshavbo lidiri lidugwana gasi guvegedzela umo mabhuku yakone.

will be added

X\