JOHANE 20

1Litshigu nya guphele nya semana, Mariya Madalene a diya thowotunu na gu ngari dzimindru dzikhongolo; a diya mana giwindri gi nga bani gi fenengedzile lithowo na gi tudwe, 2a di tutuma aya ga Simoni Pedro ni mupizane wule a nga bani a godwa khu Jesu, aya va embela, khuye: "Va bide Pfhumu thowoni, kha hi guti umo va mu vegidego." 3Pedro ni mupizane wule va di hongola vatshavbo thowutunu. 4Va di tutuma va vavili, aholu, mupizane wule a di tshiya Pedro hwane, a gu hegula khuye a vboha thowoni. 5Na nogide a holela, a di wona myendra na yi mbambamisedwe vbavbatshi, aholu kha nga bela phalani. 6A di vboha nuye Simoni Pedro khu hwane, a gu bela phalani, a wona basi myendra na yi mbambamisedwe vbavbatshi, 7ni lesu yi nga bani yi fenengedzide khovbe yaye; lesu yeyi yidiri mwalo gumogo ni myendra yile, aholu yi di petidwe yi gu vegwa khu phuvbo. 8A di bela nuye phalani mupizane wule a nga hegula khuye a vboha. Na wonide, a di khodwa. 9Va di si gu yi pimisi gwadi milowo yile, yi gu khiyo: "Uye a na wuga khu ga vafudego." 10Khavbo avbo, vapizane vale va vavili va di bwelela gaya. 11Gasi Mariya a di tshala thowotunu. Na emide bambe nya liphala, a di holela phalani na gulila, 12a di wona sirumwa sivili sa Nungungulu na si ambade myendra nya guage na si khade avbo gi nga bani giromo girumbi gya Jesu, gimbe khu mihungotunu, gimbe khu mawundrutunu. 13Sirumwa si di mu wudzisa khiso: "Nyamayi, wa gu lilela ginani?" Mariya a di hakha khuye: "Kholu va dzegidego Pfhumu yangu, kha nyi gu ti va yi vegide hayi." 14Na ganede esi, a di thendregedza hwane a wona Jesu na emide, aholu kha nga muti khuye khu Jesu. 15A di mu wudzisa, khuye: "Nyamayi, wa gu lilela ginani? Wa gu vbweta mani?" Na gu hingigedza khuye mwendro khu mulimi nya lithembwe lile, Mariya a di khuye: "Pfhumu, wa gu bani uri uwe u mu dzegidego, tshukwana u nyi embela avbo u nga mu vegago, gasi nyiya mu dzega." 16Jesu a di mu rana khuye: "Mariya!" Uye a di thendregedza a hakha khu Gihebheru, khuye: "Raboni!" Gutshamusago pwani: "Muhevbudzi." 17Jesu a di mu embela, khuye: "U nga nyi hungateli, kholu nyi si gu liti ga Babe wangu. Aholu, uwe indra embela vandriyangu khuwe nyi ngu hadza gu lita ga Babe wangu, a gu Babe wanu nenu; ga Nungungulu wangu, a gu Nungungulu wanu nenu." 18Mariya Madalene a diya embela vapizane, khuye: "Nyi wonide Pfhumu!" A gu va tshamusela iso Jesu a nga mu embelago. 19Litshigu lolo, ni silambo, litshigu nya guhegule nya semana, na ma segidwe malimba nya nyumba, umo va nga bani varomo vapizane, khu gu thava vakhongolo nya Vajudha, Jesu a di dzi wonegisa vbakari gwawe, khuye: "Gurula gu na khale ni enu." 20Khavbo avbo, a di va yeyedza mandza ni limbambo laye. Na va wonide Pfhumu, vapizane va di tala khu gutsaka. 21A di va embela nya luphye, khuye: "Gurula gu na khale ni enu. Kha nga idzo a nga nyi rumelago khidzo Babe, eni neni nyi ngu mi rumani." 22Na ganede esi, a di va furugedza, khuye: "Hakhani Liphuvbo nya gu Age. 23Vale mu na gu va tsetselelago siwono, va na tsetseledwa. Gasi vale mu na gumba va tsetselela, kha va na tsetseledwa." 24Tomasi, a nga bani a gu ranwa pwani Mavbaha, a nga bani ari moyo nya vale nya likhumi na vavili, adiri mwalo gikhati Jesu a nga dzi wonegisa. 25Na wide, vambe vapizane va dita mu embela, khavo: "Hi wonide Pfhumu!" Aholu, uye a di va hakha, khuye: "Nyamba wona sivanga nya mandza yaye, nya gu mba vbedza nyala yangu sivangani gwaye ni mandza yangu limbamboni gwaye gima kha nyi na kodwa." 26Na ma vbindride livbandre na mararu matshigu, na varomo gambe nyumbani vapizane gumogo ni Tomasi, va di tedwa khu Jesu, na ma segidwe malimba, a gu dzi wonegisa vbakari gwawe, khuye: "Gurula gu na khale ni enu." 27Khavbo avbo, a di embela Tomasi, khuye: "Hidzimisa avba nyala yago, wona mandza yangu; hidzimisa mandza yago, u vbedza limbamboni gwangu. U nga dzi giri muthu nyamba kodwa, aholu khodwa." 28Tomasi a di khuye: "Pfhumu yangu, Nungungulu wangu!" 29Jesu khuye: "U khodwe kholu u nyi wonidego. Aholu, va kategide vale va khodwago nyamba nyi wona!" 30Jesu a di gira simbe siliwugiso nya singi mahoni nya vapizane, aholu iso kha sa lowa avba. 31Esi si lovidwe gasi mu khodwe gu khenu Jesu khu Kristo, Mwamana wa Nungungulu; gasi khu gu khodwa, mu mane guvbanya linani gwaye.

will be added

X\