JOHANE 2

1Whane nya matshigu mararu, wu di manega mutshadho tigoni ga Khanani ga Galileya. Mayi wa Jesu a di romo nuye avbo. 2Jesu a di ranidwe nuye ni vapizane vaye mutshadhotunu. 3Gu di kenelela wadwa. Mayi wa Jesu a di embela mwanaye, khuye: "Va mwalo wadwa." 4Jesu a di hakha, khuye: "Nyamayi! Khu ginani u nyi angulago? Gikhati Gyangu gi si gu vbohi." 5Mayi waye a di embela sithumi, khuye: "Girani satshavbo iso a na gu mi rumago." 6Gu di romo avbo livbandre na moyo misungwa nya siwindri, va nga bani va gu hamba umo mandza Vajudha; moyo ni moyo adiri ni gipandre nya mipimo mivili mwendro miraru. 7Jesu a di va embela, khuye: "Tadzani misungwa yoyo khu mati." Va di dzegela gu mi tadza khu lihofu. 8Khavbo avbo, a di khuye: "Regani muya ninga muthangeli nya buzo." Va di gira kharato. 9Muthangeli nya buzo, na lingide mati ma nga vbindrugedzwa ma khala wadwa, kha nga olu a nga bani a si guti umo wu nga ta khumo, vbavbandze nya sithumi si nga regago mati, a di rana mwane, 10khuye: "Vathu vatshavbo va gu phela khu gu dusa wadwa nya wadi, hwane nya gu vathu vatshavbo, na va sede gwadi, khavbo va ningago wadwa nya huto. Gasi uwe u di vega wadwa nya wadi kala olu!" 11Khigyo egi giliwugiso nya guphele gya Jesu a giredego tigoni ga Khanani ga Galileya a gu wonegisa kharati gidhumo gyaye; vapizane va di khodwa gwaye. 12Hwane nya esi, a di relela Khafarnawume ni mayi waye, ni vandriyaye, gumogo ni vapizane, iyo a ngaya khalago matshigwana. 13Na yiri vbafuvbi Phasika nya Vajudha, Jesu a di gwela Jerusalema, 14Nyumbani ya Nungungulu a diya mana varengisi nya dzimombe, nya dzinvuta ni matuva, navo vanya gu turukari dzitsapawu. 15A di dzega dzingodzi a luga gisephu, a gu va tutumisa khigyo vatshavbo Nyumbani ya Nungungulu, ni dzinvuta dzawe ni dzimombe. A di vbaladza dzitsapawu dza va nya wugwewo wawe, a gu thesela dzimeza dzakone. 16A di embela varengisi nya matuva, khuye: "Dusani satshavbo sesi avba. Mu nga dzegini nyumba ya Babe wangu mu yi gira nyumba nya wugwewo wanu." 17Vapizane va di dundruga milowo yi gu khiyo: "Gukhathala nyi gu nago khu nyumba yago gu ngu nyi pwisa wuvi." 18Khavbo avbo, Vajudha va di mu wudzisa khayo: "Giyeyedzo muni u hi ningago gasi hi khodwe nya gukhethu u na ni fanelo nya gugire esi?" 19Jesu a di khuye: "Pfhungumulani Nyumba yeyi eni nyi na yi vbahedza khu matshigu mararu." 20Vajudha va di khavo: "Nyumba yeyi yi dzegide magumi mana na livbandre na moyo myaga na yi gu vbahwa uwe u na yi vbahedza khu matshigu mararu basi?" 21Aholu uye a di gu thula nyumba nya givili gyaye. 22Khu kharato, gikhati a nga wugago khu ga vafudego, vapizane vaye va di dundruga iso a nga ganelago, va gu khodwa khu Milowo ni magana ya Jesu. 23Gikhati gile nya Phasika a nga bani aromo Jerusalema, vathu nya vangi va di khodwa khu lina laye khu kota nya siliwugiso a nga bani a gu gira. 24Aholu, Jesu kha nga va tumba, kholu a di gu va ti vatshavbo. 25Kha nga vbweta guembedzedwa mavbanyelo ya moyo ni moyo, kholu uye mune a di gu yiti myonyo yawe.

will be added

X\