JOHANE 12

1Na gu nga tshade livbandre na limwedo matshigu, gasi guhodzwa Phasika, Jesu a diya Bhetaniya, iyo a nga bani a gu vbanyela iyo Lazaro, wule a nga mu wusago khu gufani. 2Va di mu girela guhodza. Lazaro a di romo nuye vbamezatunu ni Jesu, gasi Marta adiri uye muphumeli wakone. 3Khavbo avbo, Mariya, a di dzega gigasi nya mafura nya gunungele ngudzu, ayo ma nga bani ma rengwa khu dzitsapawu nya dzingi, a todza migondro ya Jesu, bwelo khavbo a yi bavbulela khu ndzudzu waye; nyumbani gwatshavbo gu di nungela mafura yale. 4Judha Sikarioti, moyo nya vapizane vaye, wule a nga bani a gu vbweta gu mu ningela, a di khuye: 5"Khu ginani ma ngamba rengiswa mafura yaya khu mazana mararu nya dzitsapawu nya prata, gasi guphasa sisiwana?" 6Khandri a di ganela kharati khu gu thela kota khu sisiwana, aholu, khu kota nya wuvafa waye, kholu, adiri uye muphari nya gikhwama, a di gutala guba iso si nga bani si gu thedwa umo. 7Jesu a di khuye: "Mu digeni. Uye a ma vegedzile gasi gu nyi todza litshigu nya gudzingwe gwangu. 8Sisiwana mu na bani muri naso kala gupindruga; gasi eni kha nyi na khala nanu gikhati gyatshavbo." 9Vajudha nya vangi, na va dzitide gu khavo Jesu womo vbale, va di mu yela, nasi khu kota yaye basi, aholu ni guya wona Lazaro, wule a nga mu wusago khu gufani. 10Vakhongolo nya vaphasi nya mhamba va di hunga gikungu nya gusonge nuye Lazaro. 11Kholu, khu kota yaye, Vajudha nya vangi va di gu pambuga ga vahevbudzi vawe, va gu khodwa ga Jesu. 12Gandra ni dzimindru, vatshavbo va nga bani va dzude buzotunu, na va pwide nya gupwani Jesu a ngu vbweta gu vboha Jerusalema, 13va di dzega matamo nya migindru, va mu khinga, na va gu emba, khu lito limwedo, khavo: "Hosana!A na rungudzwe uye atago khu lina la Pfhumu!A na rungudzwe Pfhumu ya na Israeli!" 14Jesu, na mane giburwana, a di gi khilela, kha nga guganela nya Milowo: 15"U nga thavi, nyamahegyane wa Sioni.Khu mu woni mufumeli wago; wule atago na khilede giburwana!" 16Guhegulani, vapizane vaye kha va nga muti tshamuselo nya satshavbo sesi, aholu gikhati Jesu a nga dhumiswago, va di dundruga gu khavo esi si lovidwe na si gu mu lumba, gumogo ni gu wona gu khavo khiso si nga tadzisega gwaye. 17Gidzemo gi nga mu wonago na gu rana Lazaro thowoni, gumogo ni gu mu wusa khu gufani, gi di ya tivisa mahungu yoyo. 18Gidzemo nya vathu nya vangi gi di mu khinga, kota gi ngapwago gu pwani khuye a nga girago giliwugiso gile. 19Vafarisi va di embedzelana khavo: "Mu ngu wonani nya gukhenu gimwalo gilo nya gugire! Vathu vatshavbo va gu landra uye." 20Vbakari nya vale va ngaya Jerusalema gasi guya khozela litshigu lile nya buzo, va di romo navo Vagreki. 21Va diya ga Filipi, givelegwa gya Bhetisayida gwa Galileya, vaya mu lomba, khavo: "Hi di gu vbweta gu wona Jesu." 22Filipi a diya embela Andreya; khavbo avbo, Andreya ni Filipi va diya tivisa Jesu. 23Uye a di va hakha, khuye: "Givbohide gikhati nya gudhumiswe Mwamana wa Muthu. 24Khu lisine, nyi ngu mi embelani, kheni: mbewu nya trigu ya gu thega mafuni yisifi, yi na khala yenga basi; aholu ya gufa, yi na ninga mihandro nya yingi. 25Uye a dzi garadzago ngudzu khu gu sayisa womi waye, a na dzimeledwa khuwo; aholu, uye a nyenyago womi waye a ngu wu vegedza, gasi guya wu mana guvbanyani nya gupindruge. 26Uye a vbwetago gu nyi thumela, a na nyi landre; ni avbo nyi na gu manegago, gi na bani giromo nigyo githumi gyangu. Uye a na nyi thumelago, a na rungudzwa khu Babe wangu. 27"Olu hefemulo wangu womo gutshanisekani. Nyi na kheni ginani? Baba, nyi vbulugise ga gikhati gegi nya sitshaniso? Olu a gu iso nyi nga si telago, ke! 28Baba, dhumisa lina lago!" Khavbo avbo, li dita lito khu Ndzadzini, khilo: "Gale na nyi li dhumiside, gambe nyi nguna gu li dhumisa." 29Gidzemo gi nga bani giromo vbale, na gi pwide lito leli, gi di khigyo: "Ndzadzi yi dzumago." Vambe va di khavo: "Girumwa gya Nungungulu gi nga ganelago naye." 30Jesu a di khuye: "Lito leli kha la pwala khu kotani yangu, aholu khu kotani yanu. 31Olu gi vbohide gikhati nya gulamudwe litigo leli; ni gututumiswa mufumeli waye. 32Gasi eni, gikhati nyi na khusedzwago vbatshani, nyi na ndrindra vathu vatshavbo va ta gwangu." 33A di ganela esi na gu vbweta gu yeyedza mafelo yaye. 34Gidzemo gi di mu hakha, khigyo: "Nayo wu ngu hi hevbudza nya gukhuye Kristo a na vbanya kala gupindruga. Khu ginani u gu khuwe Mwamana wa Muthu a na ni fanelo nya gu khusedzwe? Khu mani Mwamana yoyo wa Muthu?" 35Khavbo avbo, Jesu a di va embela, khuye: "Gikhati gegi mu ngari ni guwonegela; gimbilani na mu ngari ni guwonegela gasi mu si manwi khu gidema. Uye a gimbilago gidemani kha guti umo a yago. 36Na mu ngari ni guwonegela, khodwani guwonegelani, gasi mufela gu khala sanana nya guwonegele." Jesu, na ganede esi, a di khuga, a gu mwalalega vbakari gwawe. 37Ambari ulo a nga gira siliwugiso nya singi mahoni gwawe, gima kha va khodwa gwaye, 38gasi gu tadzisega magana ya muprofeti Isaya, nya gu khayo: "Pfhumu, khu mani a khodwago khu magana yathu?Tshivba yaye Pfhumu a yi wonegiside ga mani?" 39Iso si nga va gira va si khodwi, khu magana a nga ganela gambe Isaya, khuye: 40"A di va sega maho,a gu bangisa myonyo yawe,gasi va si woni khu maho,ni gumba pima khu myonyo yawe,gufela gu va si vbindrugedzi mavbanyelo,nyi va vbanyisa." 41Isaya ganede esi kholu a di tuledwe gu wona gidhumo gya Jesu. 42Ambari ni vathangeli nya Vajudha va di gu khodwa ga Jesu; aholu, va di gira khu gisihaledza, khu hwanga nya Vafarisi, gasi va si tutumiswi nyumbani nya nombelo. 43Kholu va di gola ngudzu gudhumiswa khu vathu guvbindra gudhumiswa khu Nungungulu. 44Jesu a di khusedza lito, khuye: "Uye a khodwago gwangu, khandri gwangu khodwago, a ngu khodwa ga wule a nyi rumedego. 45Ni wevbi a nyi wonago, a ngu wona uye a nga nyi rumelago. 46Eni nyi dzude tigoni kha nga wenengedzo gasi muthu watshavbo a khodwago gwangu a si khali gidemani. 47Uye apwago magana yangu, a si ma vegisi, khandreni nyi na mu lamulago, kholu kha nyatela guta lamula litigo, aholu guta vbanyisa. 48Uye a nyi dangago ni gumba hakha magana yangu, a na ni mulamuli waye. Magana nyi hevbudzidego khayo ma na mu lamulago litshigu nya guhegise. 49Kholu esi nyi nga ganela khandri nyi di si khugela. Babe a nga nyi rumelago khuye a nga nyi embela iso si vbwetagago gu ganela ni guhevbudza. 50Eni nyi ngu dziti gu kheni nayo waye guvbanya nya gupindruge. Khu kharato, esi nyi ganelago, nya gu landrisa magana ya Babe wangu."

will be added

X\