JAKOBE 3

1Vandriyangu, mu nga dwaneli mwatshavbo gu khala vahevbudzi, kholu, kha nga mu dzitigo, ethu hi hevbudzago hi na mana gulamudwa nya gugaradze ngudzu guvbindra vambe. 2Kholu ethu hatshavbo hi ngu hosisa. Oyu nyamba hosisa muthu a vbeledego, a na ni tshivba nya gu dzi phare wurumba waye. 3Ethu hi ngu thela matomu kanani nya mahaxi gasi ma hi yingela, hi kodza guruma givili gyaye gyatshavbo. 4Hongoleni hi khedze gambe mataro, ambari ma gu makhongolo ngudzu, ma vetwa khu dziphuvbo nya dzikhongolo, ma gu rumwa khu lemi, a gu gilwana gidugwanana, ma gu hongola umo mugimbidzisi a gu vbwetago. 5Khidzo gambe kharato, lidimi gipandre gidugwanana nya givili, aholu, li ngu dzi gugumisa khu silo nya sikhongolo. Wonani, likhabi nya likhongolo ngudzu li ngu dzi kodza gu rothwa khu tshahe nya nilo! 6Lidimi li khade nga nilo. Litigo nya guvivbe li gu na ni wulanga givilini gwathu, li ngu nyenyezisa wurumba wathu watshavbo. Na li khondrisidwe khu nilo wa Sathane, li ngu dzi kodza guvbisa guvbanya gwathu gwatshavbo. 7Muthu a ngu dzi kodza gu fumela sivangwa satshavbo, sirengo nya likhabi, ni sinyoni, ni sirengo si khwirirago khu lididi mafuni, ni sa matini. 8Aholu, mwalo na moyo a dzi kodzidego gufumela lidimi laye. Li vivbide, li tade khu wuhungu nya gusonge, mwalo a dzi kodzago gu li phara. 9Khu lidimi, hi ngu rungudza Nungungulu ni Pfhumu yathu, khu ilo gambe, hi ngu vala vathu va giridwego khu mufananiso wa Nungungulu. 10Khu kanani ga gumogo, hi ngu dusa magana nya gurungudze ni magana nya guvale. Vandriyangu, kha gu vbwetegi kharato. 11Ina gi ngu dzi kodza gifefe gya gimwegyo gu dusa mati nya dosi ni mati nya guvave gani? 12Vandriyangu, mu di nga wonani nguyu wu gu velega dzikhure, mwendro ndzowe wu velega maguyu, gani? Khidzo gambe kharato, gifefe nya mati nya guvave kha gi dzi kodzi gu dusa mati nya dosi. 13Womo muthu, vbakari gwanu, a gu ni guti ni mapimo! A na dzi yeyedze khu mavbanyelo yaye nya yadi, ni mithumo nya yadi, khu gu dzi nogisa ni guti. 14Aholu, mwa gu khala lidiwo, likhulo ni wugundreli myonyoni gwanu, mu nga liphi gu khenu mu na ni guti. 15Guti nya ugogo kha guti khu ga Nungungulu, aholu, khwa mafuni momu. Girengo nya Sathane. 16Kholu avba gu manegago lidiwo ni wugundreli, gu na manega pfilupfilu ni silo satshavbo nya guvivbe. 17Guti gutago khu ga Nungungulu khu gule gu tengidego, nya gurule, nya gwadi, nya gutale khu wuhindzi. Wa gu ninga mihandro nya mithumo nya yadi. Guti gogu gu mwalo maalakanyo nya guvivbe, mwendro gu pfhadzedzela. 18Vale va vbahago gurula, va gu yala gurulani, va gu vbwera mihandro nya guvbanye nya gululame.

will be added

X\