JAKOBE 2

1Vandriyangu, enu mu khodwego ga Pfhumu yathu nya wudhumu, Jesu Kristo, mu nga giri gihathela vathu, mu khedza makhalelo. 2Nya nga kharati, vbakari nya tshangano wanu ata bela muthu na ambade phera nya ndralama ni dzingadzu nya gumbure, guta bela nuye mumbe nya gisiwana na ambade dzingadzu nya guhagale; 3enu mwa gu tutumela oyu nya gitetema a ambadego gwadi, khenu: "Khala avba wulanga nya guthavisege", khu hwane, mu embela gisiwana khenu: "Uwe ema avba, wa gu dzina khala vbavbatshi, migondroni gwangu." 4Ina kha mu woni gu khenu mwa gu gira gihathela khu gyanu, mu khala valamuli nya mapimo nya guvivbe? 5Yingisani gwadi, vandriyangu nya sigodwa, kha nga olu mu dzitigo, Nungungulu hathile sisiwana sa mafuni momu a si gira sitetema nya gukhodwe, si khala vahodzi nya thomba nya wufumu a nga tumbisago ga vale va mu golago. 6Aholu, enu mwa gu nyenya sisiwana. Ina khandriso sitetema si mi sololago si mi yisani phathani muya lamudwa, gani? 7Khiso sitetema si ganelago guvivba khu lina nya ladi, eli Nungungulu a mi ningidego. 8Aholu, mwa gu landra nayo yoyu nya Wufumu, mu ngu gira gwadi, owu wu ganedwago khu Milowo nya gu Age khiyo: "Gola muthu kwanu nga edzi u dzi golago khidzo uwe wurumba wago." 9Mwa gu gira gihathela, mu ngu ghoha. Mu na konwa khu nayo, mu mana nandru. 10Khu guralo, oyu a landrisago milayo yatshavbo, a gu ghoha nayo moyo ghohile yatshavbo. 11Kholu oyu a nga khuye: "U nga bhayi", khuye gambe a nga ganela khuye: "U nga songi." Wa mba bhaya, aholu u songa, u na ni nandru ga milayo yatshavbo. 12Enu ganelani, mu vbanye nga vathu va na gu lamudwago khu nayo wu ningago gutshulega. 13Gikhati Nungungulu a na gu lamulago, kha na tsetselela ava va nga mba tsetselela vakwawe, aholu, ava va nga tsetselelago vakwawe, kha va na ningwa nandru Litshigu nya Gulamudwe. 14Vandriyangu, gu ngu phasa ginani muthu a gu khuye a na ni gukhodwa na si yeyedzi khu mithumo? Ina gukhodwa gogo gu ngu dzi kodza gu mu vbanyisa, gani? 15Nya nga kharati, ndriyago nya mwama, mwendro nya nyamayi, nari ni wuhagadzo ni ndzala nya guhodze, 16mwa gumba va ningani esi va si vbwetago gasi va vbanya, kha gu phasi gilo gu ganelani khenu: "Nungungulu a na mi kategise, hodzani, mu ambalani", aholu nyamba va ninga gilo. 17Khu guralo, gukhodwa gwa mba wonegiswa khu mithumo, gukhodwa gogo gu fude. 18Mumbe muthu a na khuye: "Ina, uwe u na ni gukhodwa, eni nyi na ni mithumo, nga nyi yeyedza gukhodwa gwago nyambana mithumo, eni, khu mithumo yangu, nyi na gu yeyedza gukhodwa gwangu." 19Uwe u ngu khodwa ga Nungungulu moyo basi, lisine. Ambari nayo maphuvbo nya guvivbe ma ngu khodwa, ma mu thava. 20Gipumbuwe! Nyi na gu yeyedza gu kheni gukhodwa nyambana mithumo kha gu phasi gilo. 21Kokwe wathu Abrahama a di sayedwa muthu nya gululame khu Nungungulu khu ginani? Khu kotani a nga dzumela gu ningela mhamba khu mwanaye Isaki vbagiluvelotunu. 22Mu ngu wonani nya gukhenu gukhodwa gwaye gu di longoloka gumogo ni mithumo. Khu mithumo, gukhodwa gwaye gu di tadzisega. 23Khu guralo, gu di tadzisega avbo Milowo nya gu Age yi ganelago khiyo: "Abrahama khodwe ga Nungungulu. Khu gukhodwa gwaye, Nungungulu a mu sayede nga moyo nya gululame." Nungungulu a di rana Abrahama khuye pari yaye. 24Kharati khavbo mu wonago nya gukhenu muthu a gu sayedwa gululama khu Nungungulu khu kota nya mithumo yaye, nasiri khu gukhodwa basi. 25Khiso si nga girega ga nyamayi nya gibhayi, Rahabhe. Uye a di sayedwa muthu nya gululame khu Nungungulu khu kota nya mithumo yaye, kholu a di hakha vasoli va na Israeli a gu va phasa gu duga khu yimbe ndzila. 26Nga olu, givili gya gumbana hefemulo gifago, kharato nugo gukhodwa, nyambana mithumo, gu fude.


Copyright
Learn More

will be added

X\