JAKOBE 1

1Eni Jakobe, githumi gya Nungungulu ni gya Pfhumu Jesu Kristo, nyi ngu losa ga vathu vatshavbo va Nungungulu, va phalalegidego ni litigo latshavbo. 2Vandriyangu, ni gevbini gilingo mu gi manago, tsakani, mu nengela. 3Kholu mu ngu dzitini nya gukhenu, gukhodwa gwanu gwa gu pala silingo gu ngu ninga gutimisela. 4Aholu gutimisela guvbwetega gu manega ni mithumo nya yadi yi vbeledego, mufela gu khala vathu va vbeledego nyambana gihoso. 5A gu bani aromo moyo wanu a keneledwago khu guti, a na gu lombe ga Nungungulu a ningago khu wuhindzi ga vatshavbo nyamba sola, a na ningwa. 6Aholu a na lombe khu gukhodwa, nyamba kanakana, kholu, oyu a kanakanago a gu fanana ni mavimbi ya phwani ma legalegiswago khu phuvbo. 7Muthu nya guralo, a nga alakanyi gu khuye a na hakha gilogyo ga Pfhumu. 8Uyoyo muthu nyamba tiya, kha giti egi a yelago gu gira. 9Ndriyathu nya gisiwana a na nengele a gu ningwa guvbanya nya wutshukwana khu Nungungulu. 10Gitetema nigyo gi na nengele gya gu tshiswa vbavbatshi khu Nungungulu, kholu gi na mwalalega kha nga genge nya mwasi. 11Kholu, nga olu lidambo li dzurago khu tshivba wu banga mwasi khu lihani, gu thega genge, wu vbela wumburi watshavbo, kharalo nugo, gi na wuna gitetema umo nya wugwewo waye. 12Kategile muthu a timiselago gulingwa kholu, hwane nya gu na lingidwe, a na hakha gihugu nya guvbanye gi nga tumbiswago khu Pfhumu ga vale va mu golago. 13Muthu a gu lingwa a nga ganeli khuye: "Khu Nungungulu a nyi lingago." Nungungulu kha dzi kodzi gu lingwa khu guvivba, gambe kha lingi muthu. 14Muthu ni muthu a gu lingwa khu gudogolela nya monyo waye, wu mu ndrindrago, wu mu senga. 15Gudogolela gwa gu bela monyoni nya muthu gu vanga gighoho, gighoho na gi giridwe gya gu vanga gufa. 16Mu nga dzi pfhadzi, vandriyangu nya sigodwa, 17satshavbo nya sadi hi hakhidego ni esi nya gululame sa guta khu ndzadzini. Satshavbo sa guta khu ga Nungungulu, Muvangi nya satshavbo si wenengedzago ndzadzini. Uye kha vbindrugedzi, gambe gi mwalo gwaye gi yeyedzago guvbindrugedza. 18Khu gudzina gwaye, a hi velegile khu tshivba nya lito nya lisine, gasi hi gu khala matiwula ga sivangwa saye satshavbo. 19Dundrugani esi, vandriyangu nya sigodwa; muthu ni muthu a na vbiredze gupwa, a hwela gu ganela, a hwela gu zangari. 20Kholu, likhulo nya muthu kha li giri esi si godwago khu Nungungulu. 21Khu guralo, digani sihena satshavbo nya gunyenyeze, ni mavbanyelo yatshavbo nya guvivbe. Hakhani khu gurula Mahungu ya Nungungulu a yalago myonyoni gwanu, aya ma dzi kodzago gu mi vbanyisa. 22Mu nga dzi sengi, mu tsakiswa basi khu gupwa mahungu yaya, aholu guvbwetega mu ma thumisani guvbanyani gwanu. 23Kholu oyu a pwago mahungu yaya a si ma thumisi, a gu khala nga muthu a hongolago vbalibonatunu aya dzi wona edzi a gu khidzo. 24Na dzi bonile, a gu hongola aya divaledwa khu edzi a gu khidzo. 25Aholu muthu a khedzisago gwadi Nayo wu hi ningago gutshulega a tiya ga uwo, a si tsakiswi basi khu gupwa, aholu, a landrisa esi Nayo wu rumago, Nungungulu a na mu kategisa mithumoni yaye yatshavbo. 26Oyu a alakanyago gu khuye mukhodwa, aholu a si kodzi gu phara lidimi laye wukhodwa waye khandri wa gilo, a gu dzi pfhadza uye mune wurumba waye. 27Gukhodwa nya lisine gu lulamidego mahoni ga Nungungulu Babe, khu ogu: Guphasa sigulungu ni dzinoni mu gusanisekani gwawe,ni gumba dzi nyenyezisa khu silo nya guvivbe sa mafuni momu.

will be added

X\