VAHEBERU 8

1Gilo nya gikhongolo ngudzu ga esi hi ganelago khu mahungu nya muphasi hi gu naye:Uye khuye Muphasi nya Khongolo a khadego ndzadzini khu nyamudye nya gikhalo nya wufumu wa Nungungulu nya Tshivba Yatshavbo. 2Uye a gu gimbidzisa thumo waye nya wuphasi nya mhamba Nyumbani nya gu Age ngudzu yi giridwego khu Nungungulu nasiri khu mandza nya vathu. 3Kholu muphasi watshavbo emisedwe gu ningela ga Nungungulu miphaso ni dzimhamba. Khu guralo, gu vbwetega Muphasi wathu nya khongolo nya mhamba a phare nuye gilogyo nya guningele. 4Nari gu khwatshi a diromo mafuni kha nga hadza gu khala muphasi nya mhamba, kholu vomo vaphasi va thumago khu Nayo. 5Thumo wu girwago khu ava vaphasi wa gu pimedzela nga mwedzi nya thumo wa ndzadzini. Khidzo Nungungulu a nga embelago Mosi gikhati a nga vbweta guvbaha Nyumba ya Nungungulu, khuye: "Wona gwadi, u gira satshavbo nga giwonelo nyi gu yeyedzidego gigomoni." 6Khu lisine, Jesu pharisidwe thumo nya wuphasi nya wukhongolo guvbindra vaphasi vatshavbo. Gidzumeledzwano a giridego nya gutshanganise Nungungulu ni vathu gikhongolo, kholu, gi seketedwe khu gitumbiso nya gikhongolo ngudzu. 7Kholu, nari pwani gidzumeledzwano nya guhegule gi di vbelede, ga sa vbwetega gu manega gimbe gidzumeledzwano nya wuvili. 8Aholu, Nungungulu, na wonile gu khuye vathu vaye va na ni nandru, a di ganela khuye: "Wonani, ma ngu vboha matshigu,nyi na gu girago gidzumeledzwano nya giphya ni vathu va na Israeli,ni vathu va Judha. 9Egi gidzumeledzwano kha gi na gira nya nga egi nyi nga hungago ni vakokwe vawe litshigu nyi nga va phara khu mandza nyi va dusa tigoni ga Egipito.Avo kha va tumbega ga gidzumeledzwano nyi nga girago navo.Khu guralo, eni nyi di va nyenya. 10Gya gu vboha gikhati gyogyo, nyi na gira ni vathu va na Israeli gidzumeledzwano gegi:Nyi na thela milayo yangu mapimoni gwawe,nyi yi lova myonyoni gwawe.Eni nyi na khala Nungungulu wawe,avo va na khala vathu vangu. 11Mwalo a na hevbudzago muthu kwawe nya givelegwa gya tigoni momu, mwendro ndriyaye, khuye:Zama guti Pfhumu,kholu vatshavbo va na nyiti,sitetema ambari sisiwana. 12Kholu eni nyi na va ditshedza sighoho sawe.Gima kha nyi na nga alakanya gambe guvivba gwawe." 13Nungungulu a gu khuye "Giphya" gidzumeledzwano gegi, gu yeyedza gu pwani egi nya guhegule gi vbindredwe khu gikhati gyaye. Gilo gi vbindredwego khu gikhati gyaye gi gumbide, gyomo vbafuvbi ni gufa.


Copyright
Learn More

will be added

X\