VAHEBERU 7

1Melkizedeki yoyu a diri mufumeli wa tigoni ga Salema, a diri muphasi nya mhamba ya Nungungulu a khusegidego ngudzu. Gikhati Abrahama a nga bani a gu wuya khu litungatunu a nga ya songago vafumeli, Melkizedeki a di mu khinga aya mu kategisa 2Abrahama a di ningela gipandre nya likhumi nya phango watshavbo nya litunga. Lina la Melkizedeki la gu tshamusela gu pwani "Mufumeli nya gululame." Kha nga a nga bani ari mufumeli wa tigoni ga Salema, lina laye la gu tshamusela gambe gu pwani "Mufumeli nya gurule". 3Kha tidwi babe waye ni mayi waye, ambari vakokwe vaye, kha gu tidwi gilo khu mahungu nya guvelegwe gwaye ni gufa gwaye. Uye a di khala nga Mwamana wa Nungungulu, a gu simama gu khala muphasi nya mhamba kala gupindruga. 4Wonani edzi Melkizedeki a nga bani ari khongolo khidzo: Abrahama, nyapandre, a mu ningide gipandre nya likhumi nya phango watshavbo a nga dzegela valala litungatunu. 5Khu Nayo wa Mosi, vaphasi nya mhamba va gu va nyumbani ga Levhi va na ni fanelo nya guhengise gipandre nya likhumi nya silo satshavbo. Avo va gu hengisa ga vandriyawe va gu sanana sa Abrahama navo. 6Melkizedeki a di siri wa nyumbani ga Levhi, aholu, hakhide gipandre nya likhumi nya silo Abrahama a nga dzegago litungatunu, a wuya a mu kategisa. A di kategisa Abrahama a nga bani a hakhide gitumbiso gya Nungungulu. 7Gu mwalo gukanakana nya gukhethu oyu a kategisago khongolo guvbindra wule a kategiswago. 8Omu nya wuphasi wa na Levhi, gipandre nya likhumi gya gu hakhwa khu vathu va nafago, aholu, avba ga Melkizedeki, kha nga yi ganelago Milowo nya gu Age, gipandre nya likhumi gihakhidwe khu muthu a simamago guvbanya. 9Hi na ganela gu khethu avo va na Levhi va hakhago olu gipandre nya likhumi nya silo nya vathu, va livbile navo gikhati gyogyo gipandre nya likhumi khu mandzani ga Abrahama. 10Kholu Levhi a di si gu velegwi, hi na khethu a di nga romo ndrani ga kokwe waye Abrahama, gikhati a nga mananago ni Melkizedeki. 11Nayo va hakhidego va na Israeli wa gu khugela omu nya wuphasi wa na Levhi, wu pharidwego khu sanana sa Aroni. Aholu, nari gu pwani thumo nya wuphasi wa na Levhi wu di vbelede, kha ga nga vbwetega gambe gu manega mumbe muphasi nya nayo wa Melkizedeki a si gu wa nayo wa Aroni. 12Kholu ha gu vbindrugedza maphaselo, nayo nuwo wu na vbweta guvbindrugedzwa. 13Pfhumu yathu Jesu Kristo, gu ganedwago satshavbo sesi khu kotani gwaye, a di gu lumba limbe lihundzu, nya gu gima mwalo na moyo nya lihundzu lolo a nga khala muphasi nya mhamba. 14Hi ngu dziti gu khethu, khu guvelegwa, Kristo a di gu lumba nyumba ya Judha. Aholu, Mosi kha ganela gilo khu lihundzu, leli gikhati a nga ganela khu vaphasi nya mhamba. 15Satshavbo sesi sa gu wonega gwadi olu, kholu dugelede mumbe muphasi nya mhamba nya gufanane ni Melkizedeki. 16Uye kha girwa muphasi nya mhamba khu milowo ni sileletelo nya wuthu aholu a di girwa muphasi khu tshivba nya guvbanye nya gupindruge. 17Kholu, Milowo nya gu Age yari khiyo: "Uwe u na khala muphasi nya mhamba kala gupindruga,khu nayo nya wuphasi wa Melkizedeki." 18Khu guralo, nayo wa gale wu tshipisidwe kholu wu diri mwalo tshivba, wu di si phasi gilo. 19Nayo wa Mosi gimwalo ni gimwegyo nya guvbelele wu giridego. Wu diri nyangwa nya gu hi yise ga gitumbo nya gyadi hi dzi kodzago khigyo gu hidzimela vbafuvbi gwa Nungungulu. 20Gambe di guromo gusambanya ga Nungungulu. Vambe va khade vaphasi nya mhamba nyambana gisambanyo gegi. 21Gasi Jesu a di khala muphasi nya mhamba khu gisambanyo, gikhati Nungungulu a nga khuye: "Pfhumu yi sambanyile,kha yi bweleli hwane, khiyo:Uwe u na khala muphasi kala gupindruga." 22Khu guralo, Jesu khuye a khadego mutiyisi nya gidzumeledzwano nya gyadi guvbindra egi gya gale. 23Gomo gambe guhambana: Vaphasi va gale va diri vangi kholu va di gufa. Va di si dzi kodzi gu simamisa thumoni gwawe. 24Aholu Jesu a ngu vbanya kala gupindruga. Wuphasi waye kha wu vbindri wuya ga mumbe muthu. 25Khu guralo, uye a ngu dzi kodza gu vbanyisa, olu ni gikhati gyatshavbo, vale va hidzimelago ga Nungungulu khu uye, kholu Jesu a ngu vbanya kala gupindruga gasi gu lombelela khu avo ga Nungungulu. 26Jesu khuye Muphasi nya Khongolo nya mhamba hi mu vbwetago. Uye agide, uye mwalo gihoso ambari gighoho, uye hambanisidwe ni sighohi, a gu khusedzwa vbatshani ndzadzini. 27Uye kha giri idzo saye ni vambe vaphasi nya mhamba: Kha gu vbwetegi ga uye, khu litshigu ni litshigu, gu ningela mhamba nya guhandze sighoho saye guhegula, a wuya khavbo a ningela mhamba nya guagise sighoho nya vathu. Uye ningede mhamba gumogo basi, gu vbela, khu gu dzi ningela uye wurumba waye. 28Nayo wa Mosi wu di hatha vathu nyamba vbelela gu khala vaphasi nya vakhongolo nya mhamba. Aholu, gisambanyo gya Nungungulu gi dzudego khu hwane nya Nayo wa Mosi, gya gu hatha gu khala muphasi nya khongolo nya mhamba, Mwamana a giridwego muthu nya guvbelele kala gupindruga.

will be added

X\