VAHEBERU 6

1Khu guralo, hongoleni hi dandre hiya mbeli gasi guya manela sihevbulo nya vakhongolo, hi gu tshiya hwane dzindrima nya guhegule nya sihevbulo nya wukristo. Ethu kha hi na nga sasamedzela gambe nya luphye matshina nya sihevbulo sesi, a gu aya: fanelo nya gudige mithumo nyamba phasa gilo, ni gu khodwa ga Nungungulu; 2sihevbulo si ganelago khu mahungu nya gubhapatiswe; guhandzega mandza vakristo; ni gutivisa guwuga ga vafudego, ni gulamudwa nya guhegise. 3Hongoleni mbeli! Nungungulu a gu dzina khiso hi na gu girago. 4Va na dzi khodza kharini gu dzi laya nya luphye ava va nga diga gukhodwa? Kholu avo va diri guwonegelani ga Nungungulu, va di hakhile giningwa gya ndzadzini, gambe va di hakhile Liphuvbo nya gu Age. 5Avo va di tugude khu guvbanya, gu khavo Mahungu ya Nungungulu khyadi, va di lingide gutshamba nya Mahungu ya Nungungulu, va gu wona siliwugiso nya mufumu wu natago. 6Ambari ulo, va di diga gukhodwa. Khu guralo, kha gu kodzegi gu wuya va dzi laya nya luphye, kholu va gu khokhothela gambe sivilini gwawe Mwamana wa Nungungulu. 7Nungungulu a ngu kategisa mafu ma hakha mati nya ndzadzi, gikhati gyatshavbo yi wago ma gu ninga mihandro nya yadi ga vale va limago. 8Aholu, mafu yale ma ningago likhabi nya miba basi kha ma phasi gilo, ma gu vadwa khu Nungungulu ma hegisa khu gu vbiswa. 9Vandriyangu nya sigodwa, ambari nyi ganelago khu maganelelo yaya, nyi ngu tumba gwadi khu mahungu yanu gu kheni mu hakhide makategwa nya guvbanyiswe. 10Nungungulu khwadi, kha divaledwi khu thumo mu wu giridego enu, ni lihaladzo mu li yeyedzidego, ni giphaso mu giridego ni olu mu nga gu girago ga vandriyanu nya vakristo. 11Aholu, ethu ha gu gola ngudzu gu khethu moyo ni moyo nya enu a simame gu khathala kharato kala mahegiso, mufela gu hakha esi mu si virelago. 12Kha hi vbweti gu khethu mu khale migara, aholu khalani vale va khodwego, muri ni gutimisela, gasi mufela gu hakha esi mu tumbisidwego khu Nungungulu. 13Nungungulu a di gira gitumbiso ga Abrahama a sambanya gu gi tadzisa. Kha nga gu nga bani guri mwalo khongolo nya guvbindre uye, a di sambanya khu lina laye khuye: 14"Nyi ngu tumbisa gu kheni nyi na gu kategisa uwe, nyi gu ninga sanana nyambana tengo." 15Abrahama a di timisela, a si mana kharati esi Nungungulu a nga mu tumbisago. 16Muthu a gu sambanya, a gu sambanya khu lina la moyo a gu khongolo guvbindra uye. Gusambanya ga gu vbedza guganedzisana gwatshavbo. 17Nungungulu a di vbweta gu tiyisa gu khuye gikungu gyaye gima kha gi na vbindrugedza ga vale va nga fanela gu hakha gitumbiso gyaye, khu guralo, gumogo ni gitumbiso a di sambanya. 18Khu kharato, silo sivili si si kodzigo guvbindrugedza: gitumbiso ni gisambanyo. Ga esi silo, Nungungulu kha dzi kodzi gu hi senga. Kharato, ethu hi tumbago uye hi ngu dzipwa na hi gu tiyisedwa khu gutumba hi ningidwego. 19Gutumba gogu hi nago kha nga giwindri nya gutiye ni gulemela, nya gurikise guvbanya gwathu gu bela kala ndzadzini, vbagikhalotunu nya wufumu wa Nungungulu. 20Khumo a hi thangedego a gu bela umo Jesu, afela gu phasa ethu, a gu khala muphasi nya khongolo nya mhamba, kala gupindruga khu nayo nya wuphasi wa Melkizedeki.


Copyright
Learn More

will be added

X\