VAHEBERU 4

1Gitumbiso nya gubele guhefemulani hi ningwago khu Nungungulu gi nga romo ni olu. Aholu, dzi woneleni, vandriyangu, gasi ni moyo wanu a si luzi gikhati nya gubele guhefemulani momo. 2Kholu, ethu hi hakhile Mahungu nya Yadi nga edzi va nga ma hakhago khidzo avo. Avo va ma pwide Mahungu, aholu, kha ma va phasa gilo, kholu, va di mapwa va si ma hakhi khu gukhodwa. 3Ethu hi khodwago, hi ngu dzi kodza gubela guhefemulani gu thudwago khu Nungungulu khuye: "Nyi di swihala ngudzu nyi kala nyi sambanya kheni:Ava vathu gima kha va na nga bela tigoni nya gitumbiso,nyi nga va dongisela guya hefemula umo." Nungungulu ganede esi ambari ulo guhefemula gwaye gu phedego litshigu a nga vbedzisa guvanga litigo. 4Umo nya Milowo nya gu Age gu lovidwe kharati, khu mahungu nya litshigu nya livbandre na mavili, pwani: "Na vbedzile mithumo yaye yatshavbo, Nungungulu a di hefemula khu litshigu nya livbandre na mavili." 5A engedza gambe khu mahungu yaya, khuye: "Gima kha va na nga bela tigoni nya gitumbiso nyi nga va dongisela guya hefemula umo." 6Vale va nga hegula gu hakha Mahungu nya Yadi kha va bela guhefemulani gwa Nungungulu, kholu kha va khodwa. Aholu, vomo vambe va na gu belago va hefumula naye. 7Nungungulu hathile limbe litshigu a li ninga lina nya gupwani "Muhuno." Na gu vbindride myaga nya yingi ganede khilo khu likana la Dhavide omu nya Ndzimo yi gu khiyo: "Muhuno, mwa gupwa lito la Nungungulu,mu nga bangi mihungo." 8Nari gu pwani Josuwa khu lisine a di vbohiside vathu va na Israeli wulangani nya guhefemule, Nungungulu gima na sa hatha limbe litshigu, khu hwane nya gikhati. 9Khu magirelo yoyo, gu yeyedza gu pwani vathu va Nungungulu va si gu beli guhefemulani nya gukhongolo nya nga ogu Nungungulu a gu manego khu litshigu nya livbandre na mavili. 10Kholu, oyu a belago guhefemulani gwa Nungungulu a na rula mithumo yaye yatshavbo a gu hefemula nga edzi a hefemudego khidzo Nungungulu. 11Khavbo avbo, hongoleni hi dzi garadze khu gu bela guhefemulani gwa Nungungulu gasi hi si landri ava va nga mba yingela giwulani, va tandrega gu bela. 12Mahungu ya Nungungulu khya guvbanya, ma na ni tshivba, ma ngu vbira guvbindra litshari nya gulodzwe gwatshavbo. Ma gu paya, ma gu bela kala matshanganoni nya womi nya muthu. Ma ngu hambanisa gutshangana nya mongo ni marambo; ma ngu tugula mahingigedzo ni mapimo ma sihadego monyoni nya muthu. 13Gimwalo ni gimwegyo gi sihadego mahoni ga Nungungulu. Sivangwa satshavbo somo tendrelani mahoni ga Nungungulu. Ethu hatshavbo hi na ema mbeli gwaye a hi lamula. 14Khu guralo, hongoleni hi tiye gukhodwani gwathu. Kholu, hi na ni Muphasi nya mhamba a gu na ni tshivba, a vbeledego, a bedego gungangamelani nya wudhumo wa Nungungulu a gu Jesu Kristo, Mwamana wa Nungungulu. 15Muphasi wathu nya khongolo nya mhamba a ngu dzi kodza gu hi pwela wusiwana nya sighoho sathu, kholu, uye nuye lingidwe kha nga ethu, aholu, gima kha ghoha. 16Khavbo avbo, hongoleni hi tiye hi gu hidzimela vbagikhalotunu nya wufumu wa Nungungulu nya gutale khu wuhigo, avbo hi na manago guvbanya ni guphasedzedwa hi gu vbwetago gikhati gyatshavbo.


Copyright
Learn More

will be added

X\