VAHEBERU 13

1Simamani mu haladzanani khu gyanu kha nga va na ndruye ni ndruye khu ga Kristo. 2Mu nga digi gu hakha vapfhumba, kholu, vambe, khu gu hakha vapfhumba, va hakhide nyamba dziti, sirumwa sa Nungungulu. 3Alakanyani vale va khothedwego mapasoni: Mu dzipwa nga khwatshi mu womo pasoni gumogo ni avo. Alakanyani vale va tshaniswago nga khwatshi mu ngu tshaniswa gumogo navo. 4Lipango li na ningwe githawo khu vathu vatshavbo. Vama ni vagadzi vawe va tumbana khu gyawe. Nungungulu a na lamula va nya gundraga milayo ni vale va girago wubhayi. 5Mu nga dzi digi mu gu fumwa khu makolo nya dzitsapawu; nengelani khu esi mu gu naso, kholu Nungungulu ganede khuye: "Eni gima kha nyi na mi diga." 6Khu guralo, hi na tiye longo hi ganela khethu: "Pfhumu khuye a nyi phasago,eni kha nyi thavi gilo.A nga nyi gira ginani muthu?" 7Dundrugani vahevbudzi nya guhegule, ava va nga mi tivisa Mahungu ya Nungungulu. Alakanyani edzi va nga vbanya ni gufa khidzo, mu landrisa gukhodwa gwawe. 8Jesu Kristo khuye wa moyo, wa vbanova, wa muhuno, ni wa gikhati gyatshavbo. 9Mu nga dzi digi mu sengwa khu sihevbudzo nya guhambane-hambane, si mi dusago ndzilani nya lisine. Gwadi myonyo yathu yi hakhe tshivba nya wuhigo wa Nungungulu, nasiri khu gu landrisa sihena nya milayo nya guhodze; kholu avo va landrisago milayo yoyo, gimwalo giphaso va gi manago ga iyo. 10Vaphasi va thumelago nyumbani nya miphaso ya Vajudha va mwalo fanelo nya guhodze mhamba yi ningedwago vbagiluvelotunu gwathu. 11Muphasi nya khongolo nya mhamba ya Vajudha, a gu bela makhuvini nya Wulanga nya guage ngudzu, na pharide novba nya sirengo gasi guya ningela mhamba nya guhandze sighoho, aholu sirumbi sakone nya sirengo si vbiswa vbavbandze nya laba. 12Khidzo kharato, Kristo nuye songidwe vbavbandze nya libhiyo nya lidhoropa gasi afela guagisa sighoho nya vathu vatshavbo khu novba waye. 13Khu guralo, hongoleni nethu vbafuvbi ga Jesu Kristo, vbavbandze nya libhiyo hi ya saniseka ni gupoyidwa gumogo ni uye. 14Kholu, mafuni momu hi mwalo lidhoropa nya gutiye kala gupindruga; hongoleni hi vbwete lidhoropa li nga gutago. 15Khavbo avbo, hongoleni hi rungudze Nungungulu khu Jesu. Rungudzo yoyo i mhamba hi ningelago, mhamba yi ningedwago khu magana ma rungudzago Nungungulu. 16Mu nga digi gu gira ndruda ni gu phasanani khu gyanu kholu khiyo mhamba yi tsakisago Nungungulu. 17Yingelani vathangeli vanu, mu landrisa sileletelo sawe. Kholu avo khavo va khedziselago gikhati gyatshavbo mihefemulo yanu, va na wudziswa khu Nungungulu khu kotani nya isoso. Mwa gu va yingelani, avo va na thuma na va tsakide, kholu, va gu thuma na va gu garadzega kha si na phasa gilo gwanu. 18Simamani mu hi lombelela, kholu hi na ni lisine nya gukhethu mapimo yathu ma agide, kholu gikhati gyatshavbo ha gu dwanela gu gira esi nya sadi. 19Ngudzungudzu nyi ngu lombe ga enu gu kheni mu lomba ga Nungungulu a nyi rumele gambe gwanu khu gu vbiredza. 20Nungungulu wuside Pfhumu yathu Yesu Kristo a khadego Muhavisi nya khongolo nya tshambi khu gufa gwaye; a tiyisidego khu novba waye gidzumeledzwano nya gupindruge. 21Nungungulu nya gurule a na mi ninge satshavbo esi mu si vbwetago nya sadi, gasi gu girani guhaladza gwaye. Khu Jesu Kristo, a na thume gwathu satshavbo esi a si golago. A na rungudzwe Kristo kala gupindruga! Amen. 22Vandriyangu, nyi ngu mi lomba gu kheni mu yingise khu mapimo yanu yatshavbo ni gutimisela magana yaya nya gu mi tiyisele. Kholu lidangalila leli nyi mi lovedego kha la lapha. 23Nya gu vbweta gu mi tivisa gu kheni ndriyathu Thimoti dugide khu pasoni. A gu vbiredza guvboha nyi nata naye iyo gwanu, gikhati nyi tago nyita mi wona 24Losedzelani vathangeli vanu ni vakhodwa vatshavbo nya libandla la Nungungulu. Vandriyathu va Italiya va ngu mi losedzela navo. 25Wuhigo wa Nungungulu wu na khale ni enu mwatshavbo.


Copyright
Learn More

will be added

X\