VAHEBERU 11

1Gukhodwa gitiyiso nya gukhethu hi naya hakha silo hi si virelago. Gambe giyeyedzo nya gupwani somo khu lisine silo hi si si wonigo. 2Khu gukhodwa, vathu va gale va mane guzundzwa khu Nungungulu. 3Khu gukhodwa, hi ngu pima gu khethu sivangwa satshavbo si giridwe khu lito la Nungungulu, uye girile esi si wonegago khu esi si si wonegigo. 4Khu gukhodwa, Abheli ningede ga Nungungulu mhamba nya guvbindre eyi ya Kayimi. Khu gukhodwa, zundzidwe khu Nungungulu kha nga muthu nya wadi, gu kala Nungungulu a gu hakha ningelo nya miphaso yaye. Khu gukhodwa gwaye Abheli, ambari a fudego, a nga gu ganela. 5Khu gukhodwa Enoki dzegidwe a yiswa vbafuvbi ga Nungungulu nyamba wona gufa.Kha manwa khu muthu kholu a di dzegwa khu Nungungulu. Milowo nya gu Age yari khiyo uye a tsakisile Nungungulu na gu si gu dugeleli esi. 6Muthu nyamba khodwa kha dzi kodzi gutsakisa Nungungulu, kholu, oyu a hidzimelago ga Nungungulu fanede gukhodwa gu khuye Nungungulu womo ni gu khuye a ngu tshatshazela avo va mu vbwetago. 7Khu gukhodwa, Nowa pwide sitiviso sa Nungungulu nya esi si nga hadza gu dugelela, a nga bani a si kodzi gu si wona. Nowa a di yingela Nungungulu a gu gira ngalava a bela umo uye ni ngamo yaye a gu vbanyiswa. Khu guralo, a di kona litigo, a gu hakha ga Nungungulu wuzundzo nya gukhodwe. 8Khu gukhodwa, Abrahama a di yingela, gikhati a nga ranwa khu Nungungulu. A khuga a hongola ga litigo a nga tumbiswago gu ningwa. A di diga litigo laye nyamba guti a gu hongola hayi. 9Khu gukhodwa a diya khala nga muwuyi ga litigo lile a nga tumbiswago khu Nungungulu. A di vbanya mitshatshani gumogo ni Isaki ni Jakobe, va nga hakhago gitumbiso gyagimwego ga Nungungulu. 10Kholu, Abrahama a di gu virela lidhoropa nya gutiye li si kodzigo gu khungumudwa eli Nungungulu a nga li pima a wuya a li vbaha. 11Khu gukhodwa, Abrahama khade babe, ambari a nga bani a gumbide ngudzu, mwangadzi waye Sara na vbindredwe khu tanga nya guvelege. Uye a di khodwa gu khuye Nungungulu a na tadzisa gitumbiso gyaye. 12Khu muthu moyo a nga bani a gu valedwa nga muthu a fudego, gu velegidwe sanana nya gutale ngudzu nga dzinyeledzi dza ndzadzini, nyambana tengo nga mafu nya fungu wa phwani. 13Vathu vatshavbo vovo va fude na va tade khu gukhodwa. Kha va si hakha esi va nga tumbiswago khu Nungungulu, aholu va si wone khu hwindzo va si tsakela, va dzi thula vawuyi, valuveli va vbindrago khu mafuni momu. 14Avo va ganelago kharati, va ngu yeyedza gu khavo va gu dzi vbwetela litigo lawe. 15Kha va nga alakanya gu bwelela tigoni va ngatago khumo. Nari pwani va di dzinide na va bwelede. 16Aholu, avo va di vbweta litigo nya ladi ngudzu, litigo la ndzadzini. Nungungulu kha khali dzitshoni gu ranwa pwani Nungungulu wawe, kholu khuye a va dongisedego lidhoropa. 17Khu gukhodwa, Abrahama, gikhati a nga lingwa khu Nungungulu a di ningela gyanana gyaye Isaki kha nga mhamba. Nungungulu a di tumbisile ga Abrahama gu mu ninga sanana nya singi, ambari ulo, Abrahama a di dongile gu songa gyanana gyaye gyagimweyo a gira khigyo phaso nya mhamba. 18Nungungulu a di mu embede khuye: "Khu ga Isaki u na bani uri ni sanana." 19Abrahama a di khodwa gu khuye Nungungulu a na dzi kodza guwusa Isaki khu ga vafudego. Hi na khethu Abrahama hakhile nya luphye Isaki a nga wuswa khu ga vafudego. 20Khu gukhodwa, Isaki a di kategisa Jakobe ni Esawu, a va tumbisa makategwa ma na gutago. 21Khu gukhodwa, Jakobe, marandra nya guhadza gufa, a di kategisa moyo khu moyo, sanana sa Josefe, a gu khozela Nungungulu na tshigamede vbandrongatunu gwaye. 22Khu gukhodwa, Josefe, marandra nya guhadza gufa nuye, a di ganela khu gikhati nya guduge sanana sa na Israeli khu tigoni ga Egipito, ava ninga sileletelo nya edzi va na gu girago khidzo girumbi gyaye. 23Khu gukhodwa, vavelegi va Mosi va di mu siha migima miraru hwane nya gu na velegidwe. Khu gu wona wumburi nya gyanana, kha va khala hwanga gu yeyisa nayo wa mufumeli. 24Khu gukhodwa, Mosi, na dandride a di bomba gu ranwa pwani mwamana wa nyamahegyane wa Faro. 25Uye a di dzumela gusaniseka gumogo ni vathu va Nungungulu, guvbindra gu tsaka matshigwana madugwana khu silo nya gighoho. 26A di wona nari tshukwana gu nyenywa khu kotani ya Mesiya guvbindra gu fuma dzithomba dzatshavbo dza Egipito. Maho yaye ma di khedza tshatshazelo wu nga gutago. 27Khu gukhodwa, Mosi dugile khu Egipito nyambana hwanga khu likhulo la mufumeli. A di simama gutiya nga khwatshi a di gu wona Nungungulu a si wonegigo. 28Khu gukhodwa, a di phela gu gira mikhuwo nya Phasika, a ruma gu todzwa novba malimba nya dzinyumba nya vathu va na Israeli, gasi girumwa nya gusonge, gi si songi sanana sawe nya matiwula. 29Khu gukhodwa, va na Israeli va di tshatuga yiphwa nya gufuvile khwatshi va gu gimbila mafuni nya gubange. Gikhati Vagipiti va nga pima gu tshatuga navo, va di langaladzwa khu mati, vafa. 30Khu gukhodwa, ma di thega mabhiyo nya lidhoropa la Jeriko hwane nya gu na va li dzuwulugede gipimo nya livbandre na mavili matshigu. 31Khu gukhodwa, Rahabhe, nyamayi nya gibhayi, kha songwa gumogo ni vale va nga mba yingela Nungungulu, kholu uye a di hakha vasoli khu gurula. 32Ginani nyi yelago gu ganela gambe? Gikhati gi rode, nyi di gu vbweta gu ganela khu Gidiyoni, khu Bharaki, khu Samisoni, Jafeti, khu Dhavide, khu Samueli ni vaprofeti. 33Khu gukhodwa, va dwanile ni mayigo yatshavbo va ma pala. Va giride nya sadi, va gu hakha ga Nungungulu esi va nga tumbiswago. Va di sega magana nya dzinghala. 34Va di tshima nilo nya tshivba, va vbuluga gu songwa khu matshari. Va diri mwalo tshivba, aholu, va khade va nya tshivba. Va khade dzingwazi litungani, va pala va nya guta. 35Khu gukhodwa, vanyamayi va hakhide vafi vawe va nga wugago khu ga vafudego. Vambe va di saniswa kala gufa, va si dzumeli gu tshudwa, khu gutumba gu khavo va na wuga va bela guvbanyani nya gwadi. 36Vambe va di poyidwa, va khinyedwa. Vambe va di hungeledwa va thedwa mapasoni. 37Vambe va di pfarwa khu siwindri, vambe va gu pidwa khu vbakari, vambe va songwa khu matshari. Va di legalega na va ambade malowo nya dzinvuta ni dziphongo. Va diri sisiwana, va saniswa ni gu poyidwa. 38Va di pepetega giwulani ni sigomoni, va gu vbanya dziphagoni nya siwindri ni mavbalani. Litigo li di si lumbi avo. 39Vatshavbo va hakhidwe khu Nungungulu khu kotani nya gukhodwe va nga bani vari nago. Aholu kha va hakha esi Nungungulu a nga va tumbisago. 40Kholu Nungungulu a hi dongisede gilo nya gyadi ngudzu, khegi: Avo ni ethu, hatshavbo hi khale vathu nya guvbelele.

will be added

X\