VAHEBERU 10

1Nayo nya Vajudha khandri giwonelo nya guvbelele ni gutiya nya silo nya lisine; mwedzi basi nya silo nya lisine si nga gutago. Khiyo miphaso yayimweyo yi ningedwago khu mwaga ni mwaga. Khu guralo, wu na dzi kodza kharini Nayo khu miphaso yoyo guagisa vathu va vbelela, kala va gu vboha ga Nungungulu? 2Nari pwani ava va khozelago Nungungulu va agisidwe sighoho sawe, kha va nga hadza gu dzipwa gambe vari ni nandru nya sighoho. Khu kharato, miphaso yatshavbo yi di hadza gu bela. 3Khu lisine, miphaso yoyo, ya gu thuma gu dundrugisa vathu sighoho sawe khu mwaga ni mwaga. 4Kholu novba nya dzikuzi ni dziphongo gima kha wu dzi kodzi guhandza sighoho nya muthu. 5Khidzo kharato, Kristo, gikhati a dzudego mafuni a nga ganelago khuye: "Uwe Nungungulu khu vbweti dzimhamba ni miningelo nya sirengo wulangani nya isoso, u nyi girede givili. 6Kha dzi gu tsakisi dzimhamba nya sirengo nya guvbiswe vbagiluvelotunu,ambari miphaso nya guhandze sighoho. 7Khavbo avbo, eni nyi di kheni:Nyi womo avba, Nungungulu, nyi dzude guta gira guhaladza gwago,nga edzi gulovidwego khidzo libhukuni nya Nayo khu mahungu yangu." 8Uye ganede guhegula khuye: "Uwe khu vbweti dzimhamba ni miningelo nya sirengo, khu nengeli khu dzimhamba nya sirengo nya guvbiswe vbagiluvelotunu, ambari miphaso nya guhandze sighoho." Ganede kharati ambari ulo dzimhamba dzatshavbo dzi ningedwago khu gu landra guruma nya Nayo. 9A wuya a ganela gambe khuye: "Nyi womo avba, Nungungulu gasi gu gira guhaladza gwago." Khu guralo, Nungungulu fuviside dzimhamba dzatshavbo dza gale. Wulanga nya idzo vegide mhamba ya Kristo. 10Olu Jesu Kristo a giridego guhaladza gwatshavbo gwa Nungungulu, ethu hi agisidwe sighoho sathu kotani nya mhamba a yi giridego gumogo basi, khu gu ningela givili gyaye. 11Vaphasi vatshavbo nya mhamba nya Vajudha va gu bela matshigu yatshavbo vaya gimbidzisa thumo nya wukhodwa wawe, va ningela dzinyondro nya dzingi miphaselo nya dzimhamba dzodzo dza dzimwedzo, aholu, kha dzi kodzi gu dusa sighoho. 12Gasi Kristo ningede mhamba mweyo basi, mhamba yi thumago kala gupindruga. Na giride esi, a di hongola aya khala nyamudye ga Nungungulu. 13Khavbo a guromo olu a virela gu khuye Nungungulu a vege valala vaye, va khala gigandrelo nya migondro yaye. 14Khu magirelo yoyo, khu mhamba mweyo basi, Kristo agiside va vbelela kala gupindruga vale va nga handzwa sighoho. 15Liphuvbo nya gu Age nilo li ngu hi ninga wufakazi waye khu mahungu yaya. Guhegula la ri khilo: 16"Gya gu vboha gikhati gyogyo, a ngu ganela Pfhumu, nyi na gira gidzumeledzwano ni vathu va na Israeli; nyi na vega milayo yangu myonyoni gwawe; nyi na yi lova mapimoni gwawe." 17A engedza gambe khuye: "Kha nyi na nga dundruga gambe sighoho ni guvivba gwawe." 18Khu kharato, sighoho sa gu tsetseledwa, kha gu vbwetegi gambe miphaso nya guduse sighoho soso. 19Khu guralo, vandruye, khu gufa ga Jesu vbagihambanotunu, hi tshudwe, gasi hi bela makhuvini nya Wulanga nya gu Age ngudzu. 20Khu makhuvi a gu givili gyaye, Jesu a hi tulede ndzila nya yiphya nya guvbanye. 21Ethu hi na ni muphasi nya khongolo nya mhamba, a thangelago mithumo ya Nyumbani ga Nungungulu. 22Khu guralo, hi na hidzimele ga Nungungulu khu monyo nya wadi ni gukhodwa nya gutiye, na hi agisidwe satshavbo si hi vivbisago monyo, sivili sathu na si handzidwe khu mati nya yadi. 23Hi na sayise gwadi gutumba nya gukhodwe hi nga sambanyago, kholu hi ngu tumba gu khethu Nungungulu a na tadzisa sisambanyo a giridego. 24Hongoleni hi tiyiselane khu gyathu, hi phasana gu gira mithumo nya wuhindzi ni mithumo yatshavbo nya yadi. 25Hi nga digi, kha nga edzi va nga girago vambe, giolovedzo nya gubele mitshanganoni nya Libandla lathu. Aholu, hongoleni hi tiyiselane khu gyathu, ngudzungudzu olu enu mu wonago gu khenu litshigu la Pfhumu li ngu vboha. 26Kholu, ha gu simama hi ghoha nya gigwenye, olu hi li tidego lisine, gu mwalo gambe yimbe mhamba nya gu dzi kodze gu dusa sighoho sathu. 27Hi na wuyedwa basi khu hwanga nya esi si nga gutago, hwanga nya gulamudwe ni nilo nyamba tshimega, wu na gu vbisago valala va Nungungulu. 28Muthu a gu ndraga Nayo wa Mosi a ngu songwa nyamba pwedwa khu kota nya wufakazi nya vathu vavili mwendro vararu. 29A gu bani ari guralo, ginani gi na gu dugelelago ga vale va nyenyago Mwamana wa Nungungulu, va gu gira gilo nya nyalidede Novba nya gidzumeledzwano gya Nungungulu va handzidwego khuwo? Ginani gi na gu dugelelago ga vale va valago Liphuvbo nya gu Age a gu gifefe nya wuhigo? Nga pimisani tsayiso nya yikhongolo va na gu yi manago vathu vovo! 30Hi ngu muti gwadi oyu a nga khuye: "Guphodza ni gu bweledzela sa gu lumba eni." A engedza gambe khuye: "Pfhumu yi na lamula vathu vaye." 31Gu ngu thisa ngudzu gu thegela mandzani ga Nungungulu a vbanyago. 32Alakanyani esi si nga dugelela gale, matshigu yale mu nga hakhago wenengedzo wa Nungungulu; mu wonile tshanisa nya yikhongolo, aholu, gima kha mwa padwa litungani. 33Vambe va di vadwa, va saniswa vbakari nya vathu; vambe va di ema gumogo va hengela navo gusanisekani gwawe. 34Enu mu hengede gusanisekani ga vale va nga girwa sibotshwa. Na mu phangidwe silo sanu satshavbo, mu di timisela khu gutsaka, kholu, mu di gu dziti gu khenu mu na ni silo nya sadi ngudzu nya gupindruge. 35Mu nga vbelini tshivba, tshatshazelo mu dongisedwego wukhongolo. 36Timiselani gasi mu gira guhaladza ga Nungungulu, mu mane guya hakha esi a mi tumbisago. 37Kholu, kha nga yi ganelago Milowo nya gu Age khiyo: "Ma tshade matshigu madugwana anata uye a vbwetago guta,uye kha na hwela. 38Vathu vangu va lulamidego va na vbanya khu gukhodwa,aholu, oyu a bwelelago hwane, eni kha nyi na tsakiswa khuye." 39Ethu kha hiri vathu nya gubwelele hwane hi dzimela. Aholu, hi vale va manago gu vbanyiswa khu gukhodwa.


Copyright
Learn More

will be added

X\