VAGALATIYA 5

1Kristo a hi tshude gasi hi mane gutshulega nya lisine. Khu kharato, tiyani mu gutshulegani gwanu, mu nga bweleli hwane mu gu khala gambe dzikhumbi. 2Wonani, eni Pawulo nyi ngu mi embelani gu kheni: Mwa gu hana wugwera Kristo mwalo giphaso gwanu. 3Nyi gu engedza gambe guembela vale va hanago wugwera kheni: avo va hungidwe khu giguruvedzo nya gulandrise Nayo watshavbo wa Mosi. 4Enu mu dwanelago gu hakhwa khu Nungungulu khu kota nya gulandriseni Nayo mu ngu dzi hambanisa ni Kristo; gambe mu mwalo wuhigo wa Nungungulu. 5Gasi ethu hi na ni gutumba gu khethu Kristo a na hi hakha; khiso hi tumbago khu tshivba nya Liphuvbo nya gu Age hi yi manago khu gukhodwa. 6Kholu, na hi tshanganisidwe ni Kristo, guhana ni gumba hana wugwera kha si phasi gilo. Egi gi phasago khu gukhodwa gu dzi wonegisago khu mithumo nya lihaladzo. 7Enu mu phede khu gu gimbila gwadi. Ginani gi nga mi tandregisa gu landrisa lisine? 8Khandri mwa gu tandregiswa khu Nungungulu, kholu Nungungulu khuye a mi ranago. 9Mela wudugwana wu ngu gugumugisa wuguvbi watshavbo. 10Eni nyi ngu mi tumba khu ga Pfhumu. Nyi ngu tumba gu kheni mu na wuya lisineni, gasi oyu a wusago pfilupfilu vbakari gwanu a na hakha tsayiso yaye, 11Vandruye, nari pwani eni nyi ngu hevbudza nayo nya wugwera, khu ginani nyi nga gu saniswago? Kholu nari pwani kharato, mahungu nyi tivisago ya Kristo a khokhothedwego vbagihambanotunu ma di si vbweti gu khala gikhunguvanyiso ga muthu. 12Gasi khu mahungu ya ava va mi garadzago, gu kheni adiri tshukwana va dzegela gu dzi thena, si bela. 13Enu vandruye, mu ranedwe guvbanya na mu tshulegide. Aholu mu nga dzegi gutshulega gwanu mu gu gira ndzila nya gutsakise gunavela nya tumbunuko nya wuthu; thumelanani khu lihaladzo. 14Kholu Nayo watshavbo wa gu tadzisega ga nayo moyo basi wu rumago, khuwo: "Haladza muthu kwanu nga edzi u dzi haladzago khidzo uwe mune." 15Aholu enu mwa gu vbanya nga sirengo, mu gu hodzana ni gu bayisana, dzi woneleni, mu nga hegisa khu gu vbedzana khu gyanu. 16Esi nyi vbwetago gu mi embela khesi: dzi ningedzeleni mu gimbidziswa khu Liphuvbo la Nungungulu, mu nga dzi digi mu gu ndrindrwa khu gudogorela nya tumbunuko nya wuthu. 17Kholu, esi si godwago khu tumbunuko nya wuthu, si ngu dwana ni esi si godwago khu Liphuvbo la Nungungulu; ni esi Liphuvbo la Nungungulu li si golago, si ngu dwana ni esi si godwago khu tumbunuko nya wuthu. Silo sesi sa sivili si hambane. Khiso si girago mu si dzi kodzi gu thuma esi mu suvago. 18Gasi enu mwa gu gimbidziswa khu Liphuvbo la Nungungulu, kha mu na fumedwa khu Nayo. 19Mithumo nya tumbunuko nya wuthu yi wonegisidwe hiyo dhunya; kheyi: Wubhayi, wuphuphulu, horo, 20gukhozela vanungungulu nya malipha, guphasela sithombe, sikwembu ni wutumbe, livengo, gudwanisana, wufu, likhulo, dzihanyi, guwandra, guwugelana khu mitsawa; 21lidiwo, wughevenga, wubewudzi, limidzo, wubhemba ni silo nya nga esi; nyi ngu mi laya, kha nga nyi talago gu mi embela khu gale kheni: Oyu a girago silo nya nga esi, gima kha na nga hodza thomba nya mufumu wa Nungungulu. 22Gasi mithumo nya Liphuvbo la Nungungulu, kheyi: Lihaladzo, litsako, gurula, gutimisela, gudziningedzela, ndruda, wuwadi, gutumbega, 23gu dzi rudzisa, gu hunga monyo. Mwalo Nayo wu dzi kodzago gu wugela silo nya nga esi. 24Ava va gu va Jesu Kristo va khokhothede vbagimbanotunu tumbunuko nya wuthu ni gudogorela gwatshavbo. 25Ha gu bani hi gu vbanya khu Liphuvbo, hongoleni gambe hi landre mithumo nya Liphuvbo. 26Hi nga khali vathu nya matshandza, hi khutana ni gu girelana lidiwo.

will be added

X\