VAGALATIYA 4

1Nyari kheni: Gyanana gi na gu tshalago ni thomba ya babe waye, gi si gu dandri, kha gi hambani ni githumi, ambari a gu igyo mune nya thomba yatshavbo. 2Na gi ngari gidugwana, vomo vathu va vegwago gasi va gi wundza, khavo gambe va pharago silo saye satshavbo kala gi gu tshanganisa tanga yi vegisidwego khu babe waye. 3Ethu nethu kharato, na hi ngari sanana gukhodwani, hi di gu fumedwa khu milayo nya litigo. 4Aholu, gutadzisegani nya matshigu, Nungungulu a di hi rumela Mwamana Waye a nga velegwa khu nyamayi, a velegedwa vbavbatshi nya Nayo nya Vajudha; 5afela gu tshula ava va nga bani va gu vbanya vbavbatshi nya Nayo, gasi hi mana gu khala sanana sa Nungungulu. 6Khu gufela gu yeyedza gu khuye enu nenu mu sanana Saye, Nungungulu rumede Liphuvbo la Mwamana waye myonyoni gwathu, khilo li ranago ndrani gwathu khilo: "Abba: Baba!" 7Khavbo avbo, olu khuri githumi gambe, u gyanana. Nuri gyanana gyaye, Nungungulu a na gu ninga thomba a yi vegisedego gu ninga sanana saye. 8Gale, na mu si gu muti Nungungulu, mu diri dzikhumbi nya gukhozele vanungungulu nya liphanga. 9Gasi olu mu mutigo Nungungulu, gwadi gu kheni, muhuno mu tidwago khu Nungungulu, khu ginani mu bwelelela hwane muya dzi gira gambe dzikhumbi nya silo si gu mwalo giphaso? 10Mu nga gu kho sanu mu sayisa matshigu ni migima, dzinango ni myaga nya nayo wa gale. 11Mu ngu nyi thela hwanga: gu khwatshi thumo watshavbo nyi wu thumidego vbakari gwanu wu mwalo giphaso. 12Vandriyangu, nyi ngu mi lombani mu khale nga eni, kha nga eni neni nyi dzi giridego idzo saye ni enu. Enu kha mwa nyi ghohela gilo. 13Enu mu ngu alakanya gu khenu gikhati nya guphele nyi ngata mi tivisa Ivhangeli nyi di si vbanyi gwadi. 14Nyi diri gilemedzo nya gikhongolo gwanu khu kota nya madwali yangu. Ambari ulo enu gima kha mwa nyi kanyisa mwendro gu nyi nyenya. Aholu mu di nyi hakha kha nga girumwa gya Nungungulu, ni gu khwatshi khu Jesu Kristo wurumba waye. 15Olu gomo hayini gunengela nya gukhongolo mu nga bani muri nago guhegulani? Nyi ngu tumba gu kheni gikhati gile nari gu pwani si di kodzega, ambari ni maho yanu mu di hadza gu ma dusa mu nyi ninga. 16Ina olu nyi khade nala gwanu khu kota nyi nga mi embelani lisine, gani? 17Vathu vovo, olu va gu yeyedza khovbe nya gu mi khathalele, aholu gikungu gyawe khandri gyadi. Kholu va gu dwanela basi gu mi hambanisa ni eni, mufela gu namarela ga avo. 18Gwadi gu mi wona na mu gu khathalela silo nya sadi gikhati gyatshavbo, nasiri basi gikhati mu nyi wonago na nyiri vbakari gwanu. 19Vanavangu, nyi ngu simama gupwa wuvi kha nga nyamayi a lumwago khu enu, kala litshigu Kristo a na gu vbelelago guwumbwa myonyoni gwanu; 20nyi di gu gola olu, na nyiri vbakari gwanu, nyi gu ganela nanu khu mambe maganelelo, kholu nyi ngu kanakana ngudzu khu kotani gwanu. 21Nyi embeleni enu mu golago gukhala vbavbatshi nya Nayo: Ina kha mupwi esi wu ganelago Nayo, gani? 22Gu lovidwe gu pwani Abrahama adiri ni sanana sivili, gimwegyo a nga velega ni nyamayi nya khumbi, ni gimbe a nga velega ni nyamayi waye nya gutshulege. 23Gyanana gya nyamayi nya khumbi gi velegidwe khu tshivba nya tumbunuko nya wuthu; gasi egi gya nyamayi nya gutshulege gi velegidwe khu tshivba nya gitumbiso. 24Mahungu yaya gipimaniso kholu vanyamayi va vavili giyeyedzo nya sidzumeledzwano sa sivili: Gidzumeledzwano gya Sinayi gi velegago sanana wugumbini, khu Agari. 25Wonani, Agari yoyu khu gigomo gya Sinayi gi guromo tigoni ga Arabhiya, a gu giwonelo gya Jerusalema ga muhuno a gu khumbi gumogo ni vathu vaye. 26Gasi Jerusalema ga Ndzadzini gutshulegide, khuye mayi wathu. 27Khu lisine gu lovidwe gupwani: "Nengela uwe nyamayi nya gyumba u si velegigo,womba mikulungwane nya gunengele uwe u nga mbapwa mavbiselo nya guvelege.Kholu sanana sa nyamayi nya guhudwe singi ngudzu,guvbindra sa oyu a gu ni mwama waye." 28Gasi enu, vandruye, mu idzo saye ni Isaki, mu sanana nya gitumbiso. 29Ga matshigu yale, gyanana nya guvelegwe khu tumbunuko nya wuthu gi di sanisa egi nya guvelegwe khu tshivba nya Liphuvbo la Nungungulu; kala ni muhuno gambe khiso si dugelelago. 30Gasi Milowo nya gu Age yari khiyo ginani? Yari khiyo: Tutumisa nyamayi nya khumbi ni gyanana gyaye, kholu gyanana nya khumbi kha gi na hodza thomba gumogo ni gyanana gya mwangadzi nya lisine. 31Khavbo avbo, vandruye, ethu kha hiri sanana sa nyamayi nya khumbi, aholu sa mwangadzi nya lisine.

will be added

X\