VAGALATIYA 3

1Ama enu Vagalatiya, sipumbunu! Khu mani a mi sengidego? Eni nyi mi yeyedzide gwadi Jesu Kristo a khokhothedwego vbagihambanotunu. 2Nya gu vbweta basi mu nyi hakhe gilo gimwegyo: Enu mu hakhideni Liphuvbo nya gu Age khu kota mu nga landrisa Nayo, mwendro khu kota mu nga hakha gukhodwa? 3Ina kamwe mu sipumbu ngudzu kharati, gani? Mu phedeni khu tshivba nya Liphuvbo la Nungungulu, olu mwa gu vbweta gu hegisa khu tshivba nya wuthu gani? 4Ina kha si mi phasi gilo sisaniso satshavbo mu si manago gani? Eni nyi ngu tumba gu kheni mu manide giphaso. 5Ina Nungungulu a mi ningago Liphuvbo nya gu Age, ni gu gira siliwugiso vbakari gwanu, a gu gira esi khu kota nya gulandriseni guruma nya Nayo, mwendro kholu mu hakhidego gukhodwa? 6Khidzo kharati yi ganelago Milowo nya gu Age khu mahungu ya Abrahama, khiyo: "Uye a di khodwa ga Nungungulu, a gu valedwa tengoni nya va nya gululama khu kota nya gukhodwe gwaye." 7Khavbo avbo, dzitini gu khenu, vale va vbanyago khu gukhodwa, khavo va gu sanana nya lisine sa Abrahama. 8Milowo nya gu Age yi tugude gale gu khiyo Nungungulu a na ninga gululama vale va si gu Vajudha, khu kota nya gukhodwe. Khu kharato iyo Milowo nya gu Age yi hegulede gu tivisa ga Abrahama Mahungu Yadi yaya nya gupwani: "Ma na kategiswa khavbo gwago mayigo yatshavbo ya mafuni." 9Abrahama khodwe a gu mana gukategiswa. Khu kharato, vatshavbo va khodwago, va na kategiswa nga uye. 10Vatshavbo vathu va tumbago mithumo nya Nayo va ngu manwa khu givalo nya Nayo, kholu, Milowo nya agu Age yari khiyo: "A na vadwe oyu a si landrisigo satshavbo esi si lovidwego libhukuni nya Nayo." 11Gu wonegile gwadi gu pwani mwalo muthu a manegago na lulamide mbeli ga Nungungulu khu kota nya Nayo, kholu gu lovidwe omu nya Milowo nya gu Age pwani: "Oyu a lulamidego mahoni gwa Nungungulu khu gukhodwa, a na vbanya." 12Aholu Nayo kha wu fumedwi khu gukhodwa, gu lovidwe omu nya Milowo nya gu Age pwani: "Oyu a na vegisago sileletelo nya Nayo a na vbanya khiso." 13Kristo a hi vbulugisile ga givalo nya Nayo khu gu dzi ningela a vadwa wulangani gwathu. Kholu Milowo nya gu Age yari khiyo: "Vadwe muthu watshavbo a vbayegwago vbagihambanotunu" 14Esi si giregide gasi gikategiso, Nungungulu a tumbisidego Abrahama, gi vbohe, khu Kristo, ga vale va si gu Vajudha, ni gu ethu hatshavbo, khu gukhodwa, hi hake Liphuvbo hi tumbisidwego khu Nungungulu. 15Vandriyangu, nyi na ganela khu gipimaniso nya esi hi si wonago guvbanyani gwathu: Muthu a gu hunga gidzumeledzwano a gi tiyisa, mwalo mumbe muthu a fanedego gu gi tshula, mwendro gu engedzela gimbe gilo. 16Wonani, gitumbiso gegi Nungungulu a gi giride ga Abrahama ni ga gyanana gyaye. Milowo nya gu Age kha yi ganeli khiyo ni ga sanana saye, khwatshi vathu nya vangi va thudwago. Aholu yari khiyo: "Ni ga gyanana gyaye, gu thudwa muthu moyo basi a gu uye Kristo." 17Esi eni nyi vbwetago gu ganela khu esi: Nungungulu hungide gidzumeledzwano a wuya a tumbisa gu gi sayisa. Nayo wu vegidwego na gu vbindride mazana mana ni magumi mararu (430) myaga, kha wu dzi kodzi gu tshula gidzumeledzwano gi hungidwego khu gale, mwendro gu fuvisa gitumbiso gya Nungungulu. 18Kholu ha gu khethu ha gu ningwa thomba khu Nayo, gu yeyedza gu pwani kha hi nga gu ningwa gambe khu gitumbiso. Aholu, Nungungulu ningide thomba ga Abrahama khu gitumbiso. 19Gasi khu ginani wu vegidwego Nayo? Nayo wu vegidwe gufela gu tugudzisa mithumo yi hambanago ni guhaladza gwa Nungungulu: Gu di vbwetega wu thuma kala gi gu vboha gyanana gile gi nga tumbiswa ga Abrahama. Nayo wu ningedwe khu sirumwa sa Nungungulu mandzani ga mwama moyo a nga vegwa kha nga mutshanganisi. 20Gambe mutshanganisi khandri wa muthu moyo basi, Aholu, Nungungulu moyo basi. 21Ina gu yeyedza gu pwani Nayo wa gu dwana ni situmbiso sa Nungungulu gani? Khandridzo ni vbadugwana! Nari gu khwatshi wu vegidwe Nayo wu dzi kodzago guvbanyisa vathu, vathu va di hadza gu hakhwa khu Nungungulu khu kotani nya Nayo. 22Aholu, Milowo nya gu Age yari khiyo vathu vatshavbo va gu fumedwa khu tshivba nya gighoho, gasi vathu vatshavbo, khu gukhodwa ga Kristo, va hakhe thomba yi tumbisidwego khu Nungungulu ga ava va khodwago. 23Aholu na gi si gu vbohi gikhati nya gukhodwe, hi di hungwa khu Nayo kha nga sibotshwa, na hi gu virela gutuledwa gukhodwa. 24Khu kharato, hi ningidwe Nayo, muyeyedzi nya ndzila, nya gu hi yise ga Kristo, hifela guya hakhwa khu Nungungulu khu gukhodwa. 25Olu, gi vbohide gikhati nya gukhodwe, kha hi nga gu vbweta gambe gu yeyedzwa ndzila khu Nayo. 26Khu gukhodwa enu mwatshavbo mu khade sanana sa Nungungulu, mu tshanganisidwe ni Jesu Kristo. 27Kholu enu mwatshavbo mu bhapatisidwego, mu tshanganisidwe ni Kristo, mu ambade Kristo. 28Khavbo avbo, olu gumwalo gambe guhambana Vajudha ni va nya mayigo, dzikhumbi ni va nya gutshulega; vama ni vanyamayi. Enu mwatshavbo mu moyo basi khu gu hengela gumogo ni Kristo. 29Na mu gu lumba Kristo, mu sanana sa Abrahama, mu na hakhani thomba yi tumbisidwego khu Nungungulu.

will be added

X\