VAGALATIYA 2

1Na gu vbindride likhumi na mina myaga, nyi di bwelela Jerusalema. Nyi hongode gumogo ni Bharnabha ni Tito. 2Nyi hongode iyoyo kholu Nungungulu a nga nyi tivisa gu khuye gu vbwetega gu hongola. Na nyi vbohide, hi di bela tshangano nya gihundla ni vakhongolo vakone, nyi va tshamusela Mahungu nya Yadi nyi tivisago ga vale va si gu Vajudha. Nyi giride esi khu gufela gu kheni thumo nyi giridego ni owu nyi ngu girago, wu si khali thumo nya mahala. 3Wonani gwadi: nyi diri ni Tito a si gu Vajudha, aholu gima kha va mu gurumedza guhana wugwera. 4Ambari va nga dugelela vambe vbakari gwathu, va nga hi pfhadza khavo vakhodwa, va vbweta gu gurumedza Tito guhana wugwera; vathu vovo va bede tsawani gwathu khu gufela guta holelela mavbanyelo nya gutshulege hi gu nawo khu ga Kristo, gasi va mane ndzila nya gu hi yise nya luphye wugumbini nya Nayo. 5Aholu ethu kha ha dzumela ni vbadugwana gupengiswa khu avo, khu gufela gu khethu enu mu khale na mu tiyide lisineni nya Mahungu nya Yadi. 6Gambe vale va tidwago gu pwani khavo vathangeli vakone, gima kha va nyi engedzela simbe sileletelo. (Avo gani khavo vamani, kha nyi vbweti ni gu siti, kholu Nungungulu kha khedzi giemo nya muthu). 7Va wonide gu khavo Nungungulu a nyi ningide thumo nya gutivise Mahungu nya Yadi ga va nya mayigo, kha nga Pedro nuye a ningidwego thumo nya gu ma tivise ga Vajudha. 8Nungungulu giride Pedro mupostoli wa Vajudha, eni a nyi gira mupostoli wa vale va si gu Vajudha. 9Jakobe, Pedro ni Johane va tidwago kha nga vathangeli, na va wonile gu khavo khu lisine, Nungungulu khuye a nyi ningidego thumo yoyu; va di hi phara mandza eni ni Bharnabha, va gu yeyedza kharalo wuhengeli. Hi di pwanana gu khethu hi hongola hiya thuma vbakari ga va nya mayigo gasi avo vaya thuma vbakari nya Vajudha. 10Gileletelo va nga hi ningago gimwegyo basi: Khegi nya gukhavo hi si divaledwi khu sisiwana. Egi gileletelo eni nyi ngu gi landrisa khu mapimo yangu yatshavbo. 11Gikhati Pedro a ngatago dhoropani ga Antiyokiya, nyi dzude nyita mu kawuka khovbe ni khovbe khu gu gira silo nya guyele gu kawukwa. 12Kholu na va si gu vbohi vathu nya tsawa wa Jakobe, Pedro a di hodza ni va nya mayigo. Aholu, gikhati va nga vbohago, uye a di dzi pambula a si hodzi gambe navo, khu gu thava tsawa nya vale nya guhane wugwera. 13Vambe vakhodwa nya Vajudha va di phela navo gu bwelelela hwane, va pfhadzedzela nga uye, kala ni Bharnabha nuye a sengwa khu gidinga a gu landra mithumo yoyo nyamba yela. 14Na nyi wone gu kheni mithumo yawe yi ndreyide ndzilani nya Ivhangeli, nyi di embela Pedro vbakari nya vathu vatshavbo kheni: "Uwe u gu Mujudha wa gu vbanya kha nga moyo a si gu Mujudha. Khu ginani u vbweta gu gurumedza ava va si gu Vajudha gu landrisa milayo nya tumbunuko wa Vajudha?" 15Ethu hi Vajudha nya mavelego, kha hiri sighohi kha nga va nya mayigo. 16Aholu hi ngu dziti gu khethu muthu a gu tshanganiswa wulongo ni Nungungulu khu gukhodwa linani ga Kristo, nasiri khu gu landrisa mithumo nya Nayo. Ethu ha gu khodwa ga Jesu Kristo hifela gu bela wulongoni ga Nungungulu khu kota nya gukhodwe nasiri khu kota nya gulandrise guruma nya Nayo. Kholu muthu kha hakhwi khu Nungungulu khu kota nya gulandrise esi si rumwago khu Nayo. 17Olu ethu hi zamago gu khala wulongoni ga Nungungulu khu gutshangana gwathu ni Kristo, hi ngarigo sighohi, gu yeyedza gu pwani Uye Kristo khuye a hi girago sighohi gani? Khandridzo, ni vbadugwana. 18Eni nya gu vbahedza nya luphye esi nyi nga phela khu gu khungumula, gu yeyedza gu kheni nyi ghohide. 19Eni nyi fude ga esi si lumbago Nayo. Nyi fude khu kota nya Nayo khu gufela gu vbanyela Nungungulu. Nyi khokhothedwe ni Kristo vbagihambanotunu. 20Khu kharato, olu khandri eni gambe nyi vbanyago, khu Kristo a vbanyago avbo gwangu. Olu, khu guvbanya nyi gu nago milini gwagu, nya gu vbanya khu gukhodwa ga Mwamana wa Nungungulu a nyi haladzidego kala gu ningela guvbanya gwaye khu kotani yangu. 21Kha nyi vbweti gunyenya wuhigo wa Nungungulu. Kholu ha gu khethu ha gu mana gulamudwa khu gu landrisa Nayo, gu yeyedza gu pwani gufa gwa Kristo kha gu phasi gilo.

will be added

X\