VAGALATIYA 1

1Eni Pawulo, nyi ranidwego gu khala mupostoli, khandri nyi di ranwa khu vathu, mwendro khu guruma nya muthu, aholu nyi di ranwa khu Jesu Kristo ni Nungungulu Babe, a nga wusago Jesu khu ga vafudego; 2eni gumogo ni vandruye vatshavbo va guromo avba, hi ngu losa mitshangano yatshavbo nya vakhodwa va tigoni ga Galatiya. 3Wuhigo ni gurula gwa Nungungulu Babe wathu ni gwa Pfhumu yathu Jesu Kristo gu na khale ni enu. 4Jesu Kristo a dzi ningede a gu songwa khu kotani nya sighoho sathu, gasi a hi tshule ga litigo leli nya guvivbe hi vbanyago ga ilo, gu tadzisega kharati guhaladza gwa Nungungulu Babe wathu. 5Wudhumo wu na vegwe ga Nungungulu kala gupindruga. Amen! 6Nyi ngu liwuga ngudzu khu guwona gu kheni kha mwa hwela gu diga oyu a nga mi ranago khu lihaladzo la Kristo, mu gu landrisa yimbe "ivhangeli" nya guhambane. 7Khandri gu khwatshi yomo yimbe Ivhangeli, aholu, vomo vathu nya gukari va girago pfilupfilu vbakari gwanu, va dwanela gu mi hambanisa, mu gu ghoha Ivhangeli ya Kristo. 8Gani khu mani mumbe muthu a na gutago ata mi tivisa yimbe ivhangeli nya guhambane ni eyi nyi mi tivisidego eni, a na vadwe. Ambari nari eni mune, ambari nari girumwa gya Nungungulu nya gute khu ndzadzini! 9Kha nga nyi mi embedego, nyi ngu engedza gambe gu mi embelani kheni: muthu a na mi hevbudzago yimbe ivhangeli nya guhambane ni yile mu yi hakhidego a na vadwe khu Nungungulu. 10Ina nya gu gola ngudzu gu zundzwa khu vathu guvbindra gu zundzwa khu Nungungulu, gani? Mwa gu alakanya gu khenu nya gu dwanela gu tsakisa vathu, gani? Nari gu khwatshi khiso nyi si dwanelago, nyisiri githumi nya lisine gya Kristo. 11Vandruye, dzitini gu khenu Ivhangeli nyi mi tivisidego kha yi dugeli ga vathu; 12kha nya yi hakha mwendro gu yi hevbula ga muthu, aholu, khu Jesu Kristo a nyi tuledego gu yiti. 13Nyi ngu tumba gu kheni mu pwide na va gu ganela khu edzi nyi nga bani nyi gu vbanya khidzo na nyi nga gu landrisa nayo wa Vajudha. Mu ngu dzitini gu khenu nyi di gu sanisa khu tshivba Libandla la Nungungulu, nyi zama gu li fuvisa. 14Nyi di pala vangi nya tanga yangu va tigoni gwathu khu gu vegisa Nayo wa Vajudha, gambe nyi di gu khathalela ngudzu gu landrisa tumbunuko nya mavbanyelo ya vakokwe. 15Aholu, Nungungulu, khu wuhigo waye, a nyi hathide na nyi ngari ndrani ga mayi wangu, a nyi ranela guta mu thumela. Gikhati a nga dzinago, 16a di nyi tulela guti Mwanaye, gasi nyiya tivisa Mahungu yaye nya Yadi ga vale va si gu Vajudha. Gima kha nya hongola nyiya lomba wusingalagadzi ga muthu, 17gambe kha nya bwelela Jerusalema nyiya manana ni vale va nga hegulago khavo va gu khala vapostoli. Aholu nyi di hongola tigoni ga Arabhiya. Khu hwane nya matshigu nyi di wuya gambe dhoropani ga Dhamasko. 18Na yi vbede myaga miraru, nyi di hongola Jerusalema gasi guya manana ni Pedro; nyi khade naye likhumi na livbandre matshigu. 19Kha nya wona mumbe mupostoli vbavbandze ga Jakobe ndruye wa Pfhumu. 20Esi nyi mi lovelago lisine. Nungungulu i fakazi nya gukhuye khandri malipha nyi ganelago. 21Khu hwane nya matshigu nyi di phara ndzila nyi gu hongola mayigoni ya Siriya ni Kilikiya. 22Vandruye nya mabandla ya tigoni ga Judheya va di si nyiti khovbe ni khovbe. 23Va dipwa basi khu ndruma gu pwani: "Wule a nga bani a gu hi sanisa, olu a ngu tivisa mahungu nya gukhodwe, a nga vbweta gu ma fuvisa" 24Va di dhumisa Nungungulu khu eni.

will be added

X\