VAEFESO 6

1Enu sanana, khu lina la Kristo, yingelani vavelegi vanu, kholu khidzo gu vbwetegago khidzo. 2Nayo nya guhegule a gu ni gitumbiso khoyu a gu khuye: "Ninga githawo babe ni mayi wago." Gitumbiso gyakone khegi: 3"U na mana gukatega ni gu engedzedwa matshigu yago nya guvbanye mafuni." 4A nenu vavelegi, mu nga goroseli sanana, aholu si dandriseni khu gu si hevbudza mavbanyelo nya ndruda ni githawo, kha nga guruma ga Pfhumu. 5Enu sithumi, yingeleni khu monyo wanu watshavbo ava mu va thumelago mafuni momu, khu githawo ni gu dzi sodzisa nga khwatshi mwa gu thumelani Kristo. 6Mu nga va thumelini basi khu gu va thava, nga khwatshi mwa gu dwanela gu tsakisa vathu, aholu thumani nga sithumi sa Kristo, mu gira guhaladza gwa Nungungulu khu monyo wanu watshavbo. 7Va thumeleni khu matsenya, nasiri khu mapimo nya guthumele vathu, aholu khu mapimo nya guthumele Pfhumu. 8Alakanyani gu khenu Pfhumu a na tshatshazela muthu ni muthu gupima khu mithumo nya ndruda a giridego, nyamba hambanisa oyu nya gutshulege ni oyu nya khumbi. 9Enu nenu mu thumedwago, vbanyani nenu kharato ni sithumi sanu. Digani gu si thusedzela, dzitini gu khenu enu ni avo, mwatshavbo mu na ni Pfhumu mweyo basi, yi guromo ndzadzini, yi si hathaligo vathu. 10Khu gu hegisa nyi ngu mi lomba gu kheni tiyani linani ga Pfhumu, mu gu tumba tshivba yaye nya yikhongolo. 11Dzi vhikeleni khu matshari yatshavbo mu ningwago khu Nungungulu, gasi mu kodze gu tiya, mu pale silingo sa Sathane. 12Kholu khandri ha gu dwana ni vathu nya marambo ni nyama, aholu ha gu dwana ni dzitshivba nyamba wonega dzi fumago tigoni momu nya gidema, ha gu dwana ni dzitshivba nya maphuvbo nya guvivbe ya ndzadzini. 13Khavbo avbo, dzi vhikeleni khu matshari mu ningwago khu Nungungulu, gasi mu pharise gutiya gikhati nya gulingwe, mu kodze gupala sigaradzoni gatshavbo. 14Khalani na mu dongile, mu phara lisine mandzani, mu li gira libhandre nya guhunge giwununi gwanu; gululama mu gu gira givhikelo nya khana yanu; 15gukhathala gwanu khu gu gimbila mu gu tivisa Mahungu nya Yadi nya gurule gu na khale silato nya migondro yanu. 16Pharani ngudzungudzu gukhodwa mu gu gira gitshango nya guvhike matshari yatshavbo nya nilo wa Sathane. 17Ambalani guvbanyiswa kha nga gihugu, gasi magana ya Nungungulu ma phareni kha nga litshari mu ningwago khu Liphuvbo nya gu Age. 18Lombelelani gikhati gyatshavbo nyamba garala khu tshivba nya Liphuvbo nya gu Age; mu lindrela khu gutimisela ni gutumbega. Lombelelani vakhodwa vatshavbo nya libandla la Nungungulu. 19Nyi lombeleleni neni, gasi Nungungulu a nyi ninge magana nya guenela gikhati nyi tivisago Mahungu nya Yadi. 20Eni kheni mutivisi nya Mahungu yaya, ambari olu nyi guromo pasoni. Khavbo avbo, lombelelani gasi nyi ganele na nyi tiyide kha nga edzi gu vbwetegago khidzo. 21Tikiko, ndriyangu nya gigodwa, a gu githumi nya gutumbege ga Pfhumu, a na mi tivisani mahungu yatshavbo nya guvbanye gwangu ni mithumo nyi girago. 22Nyi ngu mu rumela iyo gwanu afela guta mi tivisa esi si hi dugelelago, gumogo ni gu tangadzisa myonyo yanu. 23Nungungulu Babe ni Pfhumu Jesu Kristo a na tshise gurula ni lihaladzo ni gukhodwa ga vatshavbo vandruye. 24Wuhigo wa Nungungulu wu na khale ni vatshavbo vale va golago Pfhumu yathu Jesu Kristo khu lihaladzo nya guvbelele.


Copyright
Learn More

will be added

X\