VAEFESO 5

1Landrani giyeyedzo gya Nungungulu kha nga sanana nya sigodwa. 2Vbanyani khu lihaladzo, kha nga Kristo a nga hi haladzago a dzi ningela khu kotani yathu "A khala mhamba nya phaso nya mahema nya gunungele gwadi ga Nungungulu". 3Wubhayi ni mithumo yatshavbo nya gunyenyeze, ni gugundrela ni gu khumbugwa si nga khumbugwi vbakari gwanu, kholu enu mu sihathwa sa Nungungulu. 4Khidzo saye gambe ni magana nya guvivbe, nya guhandruge ni gunyenyeza kholu kha si yeli. Wulanga nya isoso, thumisani magana nya gubonge Nungungulu. 5Dzitini gwadi gu khenu muthu nya wubhayi, nya liphuphulu ni ligungo, ni va nya gukhozela vanungungulu nya malipha, gima kha va na hodza thomba mufumuni wa Kristo ni wa Nungungulu. 6Mu nga dzumelini gu sengwa khu muthu khu magana nyamba phasa gilo, kholu sighoho nya nga esi khiso si ranago likhulo la Nungungulu ga ava nyamba yingisa. 7Khu kharato, mu nga hengelini navo. 8Enu, gale mu di gu vbanya gidemani. Gasi olu, mu nga tshanganiswa ni Pfhumu, mu womo guwonegelani. Khavbo avbo, dzi phareni kha nga vathu va vbanyago safani nya mihani. 9Guwonegela khugo gu vangago mihandro nya wuwadi watshavbo, ni gululama, ni lisine. 10Dzi garadzeni khu guti esi si tsakisago Pfhumu. 11Mu nga hengeli gumogo ni vale va vbanyelago gidemani, mithumoni yawe nyamba phasa gilo; aholu yi ganedzeni nyamba yi vegedzela. 12Kholu, gu khala ni dzitshoni gu ganela khu esi va girago mu gusihalani. 13Thumo watshavbo, wa gu vegwa guwonegelani khavbo li tisegago gwadi lisine nya tumbunuko waye; 14kholu silo satshavbo sa gu khala guwonegelani, sa gu wenengedzwa. Khidzo gu ganedwago pwani: "Khendzuga uwe u ladego,wuga khu ga vafudego Kristo a na gu wenengedza." 15Khu kharato, vandriyangu, dzi woneleni guvbanyani gwanu. Mu nga vbanyi kha nga sipumbu, aholu kha nga vathu nya guti. 16Sayisani gwadi gikhati mu gu nagyo. Kholu matshigu ya muhuno ma vivbide. 17Khavbo avbo, mu nga khali sipumbu, aholu dzi garadzeni khu gu tugula egi Pfhumu a golago gu khuye mu gire. 18Mu nga levi khu wadwa mu nga dwanisana, aholu khalani na mu tade khu Liphuvbo nya gu Age. 19Tiyiselanani ku dzindzimo, ni sizimba, mu gu embelela ni gurungudza Pfhumu khu monyo wanu watshavbo. 20Bongani Nungungulu Babe, gikhati gyatshavbo ni siloni satshavbo, khu lina la Pfhumu yathu Jesu Kristo. 21Ninganani githawo khu gyanu khu kotani nya githawo mu gu nagyo ga Kristo. 22Enu vagadzi yingelani vama vanu, gu khwatshi khu Pfhumu mu mu yingelago, 23kholu mwama khuye hungo wa mwangadzi waye, kha nga Kristo a gu hungo nya libandla. Kristo wurumba waye, khuye Muvbanyisi nya libandla a gu givili gyaye. 24Khu kharato, vagadzi va na yingise vama vawe kha nga ilo libandla li yingisago Kristo. 25Enu vama haladzani vagadzi vanu kha nga idzo Kristo a haladzago khidzo libandla laye, kala a gu ningela womi waye khu gufela ilo. 26Uye giride esi khu gufela gu li handza a li agisela khu mati ni magana yaye, a li ningela ga Nungungulu. 27Khu magirelo yaya, a dzi dongisede abune libandla nya gungangamele nyambana livala, nyambana dzikhonye mwendro gimbe gilo nya nga isoso; libandla nya guage nyambana gusolega. 28Khu kharato, vama guvbweta va haladza vagadzi vawe gu khwatshi khu edzi va haladzago khidzo givili gyawe. Kholu, oyu a haladzago mwangadzi waye a ngu dzi haladza uye mune. 29Mwalo muthu a vengago givili gyaye. Aholu a gu gi hodzisa ni gu gi sayisa gwadi. Khidzo kharato a girago Kristo ga libandla, 30a gu givili gyaye, ethu hi sivbango nya guvbanye nya givili gyaye. 31Kha nga yi ganelago Milowo nya gu Age: "Khu kharato, mwama a na diga babe ni mayi, a guya patana ni mwangadzi waye. Va vavili va na khala muthu moyo basi." 32Oyu sihalo khongolo ngudzu, nya gu ganela khu mahungu ya Kristo ni libandla laye. 33Moyo ni moyo nya enu a na haladze mwangadzi waye nga edzi a dzi haladzago khidzo wurumba waye. Nyamayi a na ninge githawo mwama waye.

will be added

X\