VAEFESO 4

1Eni nyi gu gibotshwa nya guthumele Pfhumu, nyi ngu mi lomba gu kheni gimbilani khu ndzila yi yelanago ni mavbanyelo mu ranedwego ayo khu Nungungulu. 2Vbanyani gikhati gyatshavbo khu gu dzi sodzisa ni gurula, ni gutimisela. Mu yeyedzana, kharato, lihaladzo vbakari gwanu. 3Dzi garadzeni khu gu sayisa wuhengeli mu ningwago khu Liphuvbo nya gu Age, mu vbanye khu gurula vbakari gwanu. 4Gyomo givili gimwegyo basi, ni Liphuvbo limwedo basi, kha nga gambe a gu gimwegyo basi gitumbo mu ranedwego igyo khu Nungungulu. 5Yomo Pfhumu mweyo basi, ni gukhodwa gumogo basi, ni gubhapatiswa gumogo basi: 6womo Nungungulu moyo basi, Babe wa vatshavbo, a fumago ga vatshavbo, a thumago khu vatshavbo, a vbanyago ga vatshavbo. 7Moyo ni moyo nya ethu hakhide giningwa gyaye gupima khu edzi Kristo a dzinidego khidzo gu mu ninga. 8Khidzo yi ganelago Milowo khiyo: "Gikhati a nga khusedzedwa ndzadzini a di dzega va nya gukhothedwa pasoni a gu kabanisela vathu siningwa." 9Gu thudwa ginani gupwani "litide ndzadzini"? Ina kha gu yayedzi gupwani phede khu gu relela kala malangani ya vbavbatshi nya mafu gani? 10Uye wule a nga relelago, khuye wamoyo a nga lita vbatshani ngudzu, ndzadzini, afela gu enedza sivangwa satshavbo. 11Khuye a kavedzedego vathu siningwa: vambe a va ninga wuhigo nya gukhale vapostoli, vambe vavhangeli, ni vahavisi, ni vahevbudzi. 12Khu magirelo yaya, a guya na gu dongisela sihathwa gasi si thuma gwadi thumo wawe nya guvbahe ni gu dandrisa givili gya Kristo khu gukhodwa, 13kala hatshavbothu hi gu tshanganiswa khu gukhodwa ni guti Mwamana wa Nungungulu. Hi fanede gu dandra hi khala vathu vakhongolo, kala hi gu manela tanga ni giemo gya Kristo. 14Kharati, kha hi na khala gambe sanana nya gulegalegiswe khu mavimbi ni gu pengiswa khu sihevbudzo satshavbo nya guhambane, sanana si sengwago khu vathu nya guvivbedwe khu monyo, va dwanelago gu si dzimedza. 15Aholu ha gu tivisa lisine khu lihaladzo, hi na dandra siloni gwatshavbo, kala hi gu manela Kristo a gu uye hungo. 16Sivbango satshavbo nya guhambanelane sa gu mana gu yingana khu tshivba yaye. Givbango ni givbango gya gu thuma thumo gi fanedego, guphasega givili gyatshavbo, gi dandra khu maningano lihaladzoni. 17Esi nyi mi tivisago ni gu mi laya khu lina la Pfhumu, khesi: mu nga vbanyi gambe kha nga va nya mayigo va landrisago maalakanyo yawe nyamba phasa gilo, 18kholu mapimo yawe ma segegide. Va hambane ni guvbanya gwa Nungungulu khu kota nya wuhangi ni gusegega nya myonyo yawe. 19Khu gumba yingela mavhalo yawe, kha va nga gu khathala gambe khu wuthu wawe. Va gu dzi ningedzela gunyenyezani nya mithumo yatshavbo nyamba yela. 20Gasi enu, khandriso esi mu si hevbudego ga Kristo. 21Nyi ngu tumba khu lisine gu kheni mu pwide na gu ganedwa khu Jesu, gambe mu hevbudzidwe guti lisine khu mahungu yaye. 22Khu kharato, digani tumbunuko nya mavbanyelo yanu ya gale nya gutale khu gudogolela nya gunyenyeze, gu yisago gumbembani. 23Dzi garadzeni khu gu vbindrugedza mavbanyelo mu khala vathu vaphya myonyoni ni mapimoni gwanu. 24Ambalani mavbanyelo nya muthu muphya a giridwego a fanana ni Nungungulu khu gululama ni ndruda lisineni. 25Khu kharato, nyenyani malipha; muthu ni muthu a na ganele lisine ga muthu kwawe, kholu ethu hatshavbo hi sivbango nya givili gimwegyo. 26Mwa gu mana gigaradzo monyoni,dzi woneleni, mu nga digi gugaradzega gwanu gu khala gighoho. Likhulo lanu li nga hweli kala mu gu pfoledwa khu lidambo mu ngari nalo. 27Mu nga ningi wulanga Sathane a gu fuma myonyoni gwanu. 28Oyu a nga bani a guba, a ngabi gambe, a na thume afela guvbanya khu mihandro nya lithonga laye, ni gu mana esi nya guphasedzele khiso sisiwana. 29Mu nga ganeli magana nya guvivbe, ganelani basi magana nya yadi, nya guphasedzele ava va mapwago. 30Mu nga theli wusiwana Liphuvbo nya gu Age la Nungungulu, kholu Liphuvbo khigyo gifungo mu lovidwego khu Nungungulu. Khigyo mu nata tidwago khigyo litshigu Nungungulu anatago ata mi tshula wugumbini nya guvivbe gwatshavbo. 31Fuvisani vbakari gwanu dzitshikwi, likhulo, gigaha, ligwaha ni milembo, gumogo ni guvivba gwatshavbo. 32Khalani vathu nya ndruda, mu pwelana wusiwana, mu tsetselelana khu gyanu, kha nga Nungungulu a mi tsetseledego khu ga Kristo.

will be added

X\