VAEFESO 3

1Khu kharato, eni Pawulo, gibotshwa gya Kristo khu kotani yanu enu mu si gu Vajudha, nyi ngu lombelela ga Nungungulu. 2Nyi ngu tumba khu lisine gu kheni mu pwide na gu ganedwa khu mahungo nya thumo, Nungungulu a dzinidego gu nyi ninga ku wuhindzi waye, gu khuye nyi thuma vbakari gwanu. 3Nungungulu dzinide gu nyi tulela guti sihalo nya gikungu gyaye. Nyi ngari gu mi lovela magana madugwana nyi ganela khu mahungu yaya. 4Mwa gu ma hevbula mu nati mawonelo yangu khu mahungu nya sihalo wa Kristo. 5Ga mimelana yi vbindridego mwalo ni moyo a tuledwego guti sihalo yoyu, aholu, ga matshigu ya muhuno, Nungungulu, khu Liphuvbo laye nya gu Age, a wu tiviside ga vapostoli vaye nya guage ni ga vaprofeti. 6Sihalo nyi wu thulago khoyu: khu tshivba nya Mahungu nya Yadi, vale va si gu Vajudha va emisedwe navo guya hengela gumogo ni Vajudha guhodza thomba Nungungulu a yi vegisedego vathu, kholu avo navo sivbango nya givili gya gimwegyo, gambe va na ni wulanga avba nya gisambanyo gya Nungungulu khu ga Jesu Kristo. 7Eni nyi khade muthumeli nya Mahungu nya Yadi nya guvbanyise, khu wuhigo wa Nungungulu a nyi ningidego khu wuhindzi ni tshivba yaye. 8Eni, mahegisela nya sihathwa satshavbo sa Nungungulu, nyi ningidwe wuhigo nya gutivise ga ava va si gu Vajudha gutala nya wufumu wa Kristo; 9ni gu tivisa ga vathu vatshavbo magimbilelo nya gikungu nya sihalo wu nga bani wu sihidwe khu gale ni gale guetani gwa Nungungulu, muvangi nya silo satshavbo. 10Gasi olu, vafumeli vatshavbo va mafuni ni vafumeli nya dzitshivba dza ndzadzini guvbwetega va tiviswe gueta gwatshavbo nya guti gwa Nungungulu khu libandla la Kristo. 11Oyu khu sihalo wu dongisedwego khu Nungungulu gukhugela guhegulani, wu wonegisidwego olu khu ga Jesu Kristo. 12Khu gukhodwa ni guhengela ni Kristo, ethu hi ngu mana gutshulega hi kodza gu hidzimela ga Nungungulu na hi tade khu gutumba. 13Khavbo avbo, nyi ngu mi khongotela gu kheni mu nga garadzegi khu kotani nya sisaniso nyi si wonago khu kotani yanu; si na khale wuzundzo gwanu. 14Khigyo gi nyi girago nyi khidzima mbeli ga Nungungulu Babe, 15a gu gibuga nya guvbanye gwatshavbo ga ndzadzini ni ga mafuni, 16nyi mu lomba gu kheni, khu gutala nya wufumu waye, a mi tiyise myonyoni gwanu khu tshivba nya Liphuvbo nya gu Age. 17Nyi ngu lomba gambe ga Nungungulu gu kheni Kristo a na vbanye myonyoni gwanu khu gukhodwa, mu tiya gwadi, mu tsitsa mikhamba nya gutiye lihaladzoni. 18Gasi enu nenu, gumogo ni sihathwa satshavbo nya libandla la Nungungulu, mu kodze gupima wukhongolo ni gulapha ni gueta nya lihaladzo la Kristo, 19ni guti lihaladzo la Kristo, ambari ulo a gu mwalo muthu a dzi kodzago gu liti khu guvbelela, gasi enu mu mane gutala khu wufumu watshavbo wa Nungungulu. 20A na dhumiswe Nungungulu a gu na ni tshivba nya gugire guvbindra satshavbo esi hi mu lombago, ambari ni esi hi alakanyago, khu tshivba Yaye yi thumago ndrani gwathu. 21A na rungudzwe ndrani nya libandla, linani ga Jesu Kristo, kala gupindruga! Amen.

will be added

X\