VAEFESO 2

1Gale mu di fude hafemuloni khu kotani nya sihoso ni sighoho sanu. 2Gikhati mu nga bani mu gu fumedwa khu mavbanyelo nya litigo leli, mu di landrisa milayo ya muthangeli nya dzitshivba nya guvivbe dzi si wonegigo, liphuvbo lolo li fumago olu ga vathu va wugelago Nungungulu. 3Ethu hatshavbo hi diri nethu kha nga avo, hi di gu vbanya khu nayo nya tumbunuko ni gu landrisa gunavela nya givili ni monyo. Khu tumbunuko nya makhalelo yathu, hi di gu fanela guya thethiswa khu Nungungulu gumogo ni vambe vathu. 4Aholu, wuwadi wa Nungungulu wukhongolo, ni lihaladzo laye ga athu li etide ngudzu. 5Ethu hi nga bani hi fude khu kotani nya sighoho sathu, Nungungulu a hi wusile khu ga Kristo. Enu mu vbanyisidwe khu wuhigo wa Nungungulu. 6Nungungulu, na hi tshanganisile ni Kristo, a hi wuside naye a gu hi ninga gambe wulanga nya guya fume naye ndzadzini. 7Giride esi khu gufela gu yeyedza talo nya wuhigo waye ga mimelena yatshavbo yi nga gutago, khu wuhindzi a hi giredego khu Jesu Kristo, 8kholu mu vbanyisidwe khu wuhindzi wa Nungungulu khu kotani nya gukhodwe gwanu. Guvbanyiswa khandri mwa gu gu mana khu tshivba yanu, kholu giningwa gya Nungungulu. 9Khandri handro nya mithumo yanu, kharati, mwalo muthu nya gu dzi gugumugise abune. 10Kholu Nungungulu khuye a nga hi wumbago; a hi vangide, a hi tshanganisa ni Jesu Kristo gasi hi mane guvbanya nya gutale khu mithumo nya yadi, mithumo Nungungulu a yi dongisedego khu gale gu khuye hi vbanya khiyo ethu. 11Enu mu si gu Vajudha nya mavelego; enu mu ranwago makhuna khu vale va dzi ranago va nya wugwera, va dzi zundza khu gifungo va vegidwego milini gwawe khu mandza nya vathu, dundrugani edzi mu nga bani mu gu vbanya khidzo gale. 12Mu di gu vbanya hwindzo ni Kristo; mu diri valombo; mu diri mwalo wulanga ndrani nya libandla nya sihathwa sa Nungungulu; mu diri vbavbandze nya gidzumeledzwano gi hungidwego khu gisambanyo a nga gira Nungungulu ga vathu vaye; mu di gu vbanya tigoni nyambana gutumba, nyambana Nungungulu. 13Gasi olu, enu gale mu nga bani muri hwindzo, mu hidzimisidwe vbafuvbi khu mhamba nya Novba wa Kristo. 14Kholu uye Kristo, wurumba waye, khuye gurula gwathu. Tshanganisile mahundzu ya mavili: Vajudha ni ava va si gu Vajudha, a va gira libandla limwedo basi, a gu fuvisa vbingano nya livengo wu nga bani wu gu hi hambanisa. 15Fuviside khu givili Gwaye givangelo nya wulombo, Nayo wa Mosi ni sileletelo nya mikhuwo yaye, afela gu tshanganisa avbo gwaye mahundzu ya mavili, a gira libandla limwedo basi, libandla nya vathu vaphya; a gu vbaha kharati gurula. 16Kristo tshanganisile mahundzu ya mavili ni Nungungulu khu tshivba nya gihambano gyaye; a di ma pata ma gu khala givili gimwegyo basi, a gu songa kharati wulala khu gihambano gyaye. 17Guta gwaye gu hi resede mahungu yadi nya gutsakise, nya gurule; gurula ga enu mu nga bani muri hwindzo, ni gurula ga Vajudha va nga bani vari vbafuvbi. 18Khu ga Kristo, ethu hatshavbo hi tshanganisidwe khu Liphuvbo la limwedo, hi gu tuledwa kharati ndzila nya guvbohe ga Babe. 19Olu kha mu ngari valombo ni vapfhumba gambe, mu melego moyo ni va nya guaga, mu sanana nya ngamu ya Nungungulu. 20Enu mu siwindri nya nyumba yi vbahidwego vbatshani nya giseketelo nya vapostoli ni vaprofeti. Kristo wurumba waye khuye giwindri nya hungo nya gikoli gi hungago nyumba yatshavbo. 21Khuye Kristo a tshanganisago nyumba yatshavbo a yi tiyisa ni gu yi dandrisa gasi yi khala nyumba nya guage ya Pfhumu. 22Khu tshivba yaye mu ngu tshanganiswa nenu ga nyumba yeyi yi vbahwago kala mu gu khala nyumba a vbanyago umo Nungungulu khu Liphuvbo nya gu Age.

will be added

X\