VAEFESO 1

1Eni Pawulo, mupostoli wa Jesu Kristo khu gugola gwa Nungungulu, nyi ngu lovela sihathwa ni vakhodwa va Jesu Kristo va vbanyago dhoropani ga Efeso, kheni: 2Wuhigo ni gurula gwa Nungungulu Babe wathu ni gwa Pfhumu yathu Jesu Kristo gu na khale ni enu. 3A na rungudzwe Nungungulu, Babe wa Pfhumu yathu Jesu Kristo, A hi tadzidego khu makategwa yatshavbo ya ndzadzini khu ga Kristo. 4Gale, na gu si vangwi litigo, Nungungulu a hi hathide khu ga Kristo gasi hi khala sihathwa ni vathu nya ndruda nyambana gihoso mahoni gwaye. 5Khu guhaladza gwaye, Nungungulu a hi vegisede wuhigo nya gu hi gire sanana Saye khu ga Kristo. 6Khu kharato hi na bonge Nungungulu nya wuhindzi khu gungangamela nya wuhigo waye, a hi ningidego khu ga Mwanaye nya gigodwa. 7Guvbanya ha gu mana khavbo gwaye, Khu novba waye hi mane gutshulega ni gudivaledwa sighoho sathu khu gutala nya wuhigo waye, 8a nga hi vbaladzelago na wu tade khu guti ni gupima. 9A hi tulede guti sihalo nya gikungu nya guhaladze gwaye khu ga Kristo, kha nga edzi a nga bani a vegiside khidzo khu gale, 10gu khuye si girege gutadzisegani nya matshigu: Gutshanganisa khu ga Kristo silo satshavbo si guromo ndzadzini ni esi si guromo mafuni, a emisa Kristo kha nga hungo ni muthangeli. 11Khu ga Kristo, hi hathidwe nethu guya ningwa thomba nya guvbanyiswe hi lulamisedwego khu gale, lihaladzoni ga Nungungulu a thumago silo satshavbo khu gudzina ni gugola gwaye. 12Kharati, ethu, gukhugela guhegulani, hi vegidego gitumbo gyathu ga Kristo, hi na embelela wudhumo wa Nungungulu. 13Khu ga Kristo, enu nenu, na mu pwide mahungu nya lisine, Ivhangeli nya guvbanyiswe gwanu, mu yi hakhidego khu gukhodwa, mu tiyisidwe khu gifungo nya Liphuvbo nya gu Age hi nga bani hi tumbisidwe. 14Liphuvbo nya gu Age khilo gitumbiso nya thomba, Nungungulu a gi vegisedego vathu vaye; olu hi ngarigo vbakari nya gulindrele, khilo Liphuvbo li hi ningago gutumba gu ya hakha thomba, gikhati hi na manago gutshulega nya guvbelele, gasi wu rungudzwe wudhumo wa Nungungulu. 15Eni neni, na nyi pwide ndruma nya gukhodwe mu gu nago ga Pfhumu Jesu, ni lihaladzo mu gu nalo ga vatshavbo va khodwago ga Nungungulu, 16kha nyi garali khu gubonga Nungungulu khu kotani gwanu. Nyi ngu mi alakanya milombeloni gwangu. 17Gambe nya gu lomba ga Nungungulu wa Pfhumu yathu Jesu Kristo, Babe nya wudhumo, a mi ninge Liphuvbo nya guti, ni gu mi tulela ndzila nya gu muti gwadi Nungungulu. 18Nya gu lomba gu kheni a wenengedze mapimo yanu, gasi mu pime gutumba muni mu ranedwago khu Nungungulu, muti gutala nya dzithomba a dzi vegisedego ndzadzini afela guya ninga ava va lumbago uye; 19guliwugisa nya tshivba a yi girago khu kotani gwathu, ethu hi khodwago. Khiyo tshivba yeyi a nga yi wonegisa khu tshivba ni tshivba 20khu guwusa Kristo khu ga vafudego, a gu mu khadzisa nyamudye gwaye ndzadzini. 21A mu vegide vbatshani nya mifumu ni wufumu, ni wugulu, ni tshivba ni malina yatshavbo ma thangisidwego, nasiri tigoni momu basi, aholu ni ga litigo li nga gutago. 22Nungungulu vegile silo satshavbo vbavbatshi nya migondro ya Kristo, a mu emisa kha nga muthangeli ni hungo nya Libandla. 23Libandla leli khu givili gya Kristo; ilo khilo gutadzisega gwatshavbo gwa Kristo, a enedzago silo satshavbo.

will be added

X\