VAKOLOSI 4

1Enu mu thumedwago, ningani sithumi sanu ogu gu fanedego ni gu ningana, na mu gu dziti gu khenu enu nenu mu na ni Pfhumu ndzadzini. 2Pharisani gu gira nombelo khu hefemulo ni gu bonga khu monyo; 3lombelelani gambe khu ethu, gasi Nungungulu a hi tulele wulanga, hifela guganela khu sihalo wa Kristo, owu nyi hungidwego khuwo nga gibotshwa, 4gasi nyi kodze guganela khu edzi gu vbwetegago khidzo. 5Vbanyani khu guti ni mapimo vbakari nya vale va si khodwigo, mu londrola gwadi gikhati mu gu nagyo. 6Mabhuloni gwanu ganelani mahungu nya gusalalegise, mu gu kodza gu ninga phindrulo nya guenele muthu ni muthu. 7Tikiko, ndriyangu nya gigodwa, githumi nya gutumbege ni muphasedzeli wangu thumoni ga Pfhumu, a nata mi tivisa mahungu yatshavbo nya guvbanye gwangu. 8Eni nyi ngu mu rumela iyo gwanu gasi guta mi tivisa mavbanyelo yathu ni gu tangadzisa myonyo yanu. 9Hi ngu mu rumela gumogo ni Onesimo, ndriyathu nya gigodwa nya gutumbege, a gu moyo wanu. Avo va nata mi embela satshavbo esi si dugelelago eno. 10Aristarko, a khothedwego gumogo ni eni, a ngu mi losedzela, a nuye Marko, ndruye wa Bharnabha. Gasi khu mahungu ya Marko, nyi mi ningideni sileletelo nya gukheni a guta mi holela, mu hakheni gwadi. 11A nuye Jesu, a ranwago pwani khu Justo a ngu mi losedzela. Ga vakhodwa vatshavbo nya gudugele nayoni nya Vajudha khavo ava basi va hengelago ni eni gu thumela mufumu wa Nungungulu, va ngu nyi phasedzela ngudzu. 12Hakhani gambe malosedzela ya Epafrasi a gu moyo nya libandla lanu a guromo thumoni wa Kristo Jesu. Uye milombeloni gwaye a ngu lombelela ngudzu ga Nungungulu gu khuye mu simame gutiya, mu landrisa khu guvbelela guhaladza gwa Nungungulu. 13Eni nyi fakazi nya edzi Epafrasi a garadzegago khidzo khu kotani yanu ni ya vandruye va guromo Laodikeya ni Hierapoli. 14Luka, n'yanga yathu nya gigodwa, ni Dhemasi va ngu mi losedzelani navo. 15Losedzelani vandruye va Laodikeya, mu losedzela nuye Ninfa ni libandla li tshanganago ndrangani gwaye. 16Hwane nya gu na mu hevbude lidangalila leli, li rumeleni ga libandla la Laodikeya, vafela guya li hevbula navo. Enu nenu hevbulani lidangalila mu na gu rumedwago khu Laodikeya. 17Embelani Arkipo khenu: "Thela kota khu thumo u ningidwego khu Pfhumu u wu sayisa." 18Khu gyandza gyangu nyi ngu lova esi: Nyi ngu mi losedzela eni, Pawulo. Mu nga divaledwi khu gu khenu nyi hungidwe dzitshinga. Wuhigo wu na khale ni enu!

will be added

X\