VAKOLOSI 3

1Aholu mwa gu bani mu wugide gumogo ni Kristo garadzegani khu guvbweta silo si guromo vbatshani, iyo a guromo Kristo a khadego nyamudye ga Nungungulu. 2Alakanyani silo sa vbatshani, nasiri silo sa mafuni momu, 3kholu enu mu fude ni Kristo, guvbanya gwanu gu sihidwe gumogo ni Kristo ga Nungungulu. 4Guvbanya gwanu nya lisine khu Kristo, gikhati uye a na dzi wonegisago, enu nenu mu na wonega gumogo naye mu na tade khu wudhumo. 5Songani myonyoni gwanu gunavela gwatshavbo nya wuthu wa mafuni: wubhayi, horo, wuphuphulu, mahingigedzo nya guvivbe ni ligungo a gu idzo saye ni gu khozela vanungungulu nya malipha. 6Silo sesi khiso si wusago likhulo la Nungungulu ga vale nyamba yingela. 7Khidzo mu nga bani mu gu gira nenu gale, mu nga gu vbanya ndrani nya silo soso. 8Olu gu vbwetega mu tshulega ga satshavbo soso, mu nyenya dzizanga, ni likhulo, ni ndrwadza, ni milembo, ni magana nya gunyenyeze ya kanani gwanu. 9Mu nga liphelani khu gyanu. Enu mu tshude muthu wa gale ni mavbanyelo yaye, 10mu ambade muthu muphya oyu a vbahwago nya luphye khu guti gasi a fanana ni muwumbi waye. 11Gukhugela olu, gu mwalo gambe guhambana nya va nya mayigo ni Vajudha, va nya guhana wugwera ni ava nyamba hana wugwera, va dhoropani ni va vbavbandze, khumbi ni muthu nya gutshulege. Kristo khuye satshavbo, gambe womo ga satshavbo. 12Enu mu vathu va Nungungulu, kholu uye a ngu mi haladza, gambe a mi hathide. Khu kharato, guvbwetega muri ni monyo nya gupwele wusiwana, nya ndruda, nya gu dzi nogise, nya gurule ni gutimisela. 13Phasedzanani mu tsetselelana khu gyanu, tsetselelanani kha nga Pfhumu a mi tsetseledego. 14Vbatshani nya satshavbo vegani lihaladzo a gu ilo li tshanganisago silo satshavbo. 15Myonyoni gwanu gu na fume gurula gwa Kristo, mu ranedwago ugo mu gu wumba givili gimwegyo. Khalani vathu va kodzago gubonga. 16Mahungu ya Kristo ma na vbahe ndrani gwanu ma gu andra. Khu guti gwatshavbo, hevbudzanani, mu ningana wusingalagadzi khu gyanu. Embelelani dzindzimo ni sizimba na mu gu bonga Nungungulu khu monyo wanu watshavbo. 17Silo satshavbo mu na ganelago mwendro gu si thuma girani khu lina la Pfhumu yathu Jesu Kristo, mu bonga Nungungulu Babe khu uye. 18Vagadzi, yingelani vama vanu, kholu khiso si yelago ga vale va khodwago ga Pfhumu. 19Enu vama, haladzani vagadzi vanu, mu nga va goroseli. 20Sanana, yingelani vavelegi vanu siloni gwatshavbo, kholu khiso si tsakisago Pfhumu. 21Vavelegi mu nga gorosi sanana sanu, gasi si si vbeli tshivba. 22Sithumi, yingelani siloni gwatshavbo vale mu va thumelago mafuni momu, nasiri basi gikhati va mi ghadhago, nga khwatshi mwa gu dwanela basi gu va tsakisa, aholu khu gutshulega nya myonyo yanu ni gu thava Pfhumu. 23Satshavbo mu girago girani khu monyo wanu watshavbo khwatshi mwa gu thumela Pfhumu nasiri vathu. 24Dzitini gu khenu Pfhumu a na mi tshatshazela a mi ninga guhodza thomba yaye. Enu mwa gu thumela Kristo a gu Pfhumu nya lisine. 25Aholu, oyu a girago guvivba a na tshatshazedwa khu guvivba a giridego. Avba kha gu na hathwa khu khovbe nya muthu.

will be added

X\