VAKOLOSI 2

1Kholu nya gu vbweta muti litunga nya likhongolo nyi li dwanago khu kotani yanu, khu kotani ya va Laodikeya, ni vambe va si nyitigo khovbe ni khovbe. 2Nya gu thumela gu kheni va mane gutiya monyoni ni gu kheni va dzipwe na va patane khu lihaladzo, na va fumide khu guti sihalo nya gikungu gya Nungungulu. Sihalo yoyu khu Kristo, 3wu sihidwego gwaye wufumu watshavbo nya dzithomba nya guti ni gupima. 4Nya gu mi embelani esi gasi mu si pembwi khu muthu khu magana nya gusengedzele. 5Kholu ambari saye nyi guromo hwindzo khu givili, nyi womo vbakari gwanu khu hefemulo. Nyi ngu nengela khu gupwa mavbanyelo yanu nya yadi, ni gutiya nya gukhodwe gwanu ga Kristo. 6Kha nga olu mu hakhidego Pfhumu Jesu Kristo, gu vbwetega mu vbanya khu gupwanana naye, 7mu tsitsa gwadi mikhamba, mu tiyiswa gukhodwani, kha nga edzi mu hevbudzidwego khidzo, mu gu bonga Nungungulu gikhati gyatshavbo. 8Dzi woneleni, mu nga dzi digi mu gu sengwa khu vale va vbwetago gu mi ndrindra khu sihevbulo nya wugengeli nya mahala, nya gutiyiswe khu mikhuwo nya vathu, ni guti ga mafuni momu, aholu nyamba tiyiswa khu guti gwa Kristo. 9Kholu talo watshavbo nya wudhumo wa Nungungulu wu manide givili wu guvbelela ga Kristo a dzi giridego muthu. 10Enu mu hakhide talo watshavbo wowu khu gutshanganiswa ni Kristo, a gu uye hungo nya vafumeli vatshavbo nya maphuvbo ni dzitshivba. 11Khu gu tshanganiswa naye, enu mu hanide wugwera, nasiri wugwera wu hanwago milini, aholu wugwera wu tago khu ga Kristo, a gu gutshudwa givili nya gighoho. 12Gikhati mu nga bhapatiswa, mu dzingidwe gumogo ni Kristo, mu gu wuga gambe naye kholu mu ngu khodwa ga tshivba ya Nungungulu a mu wusidego. 13Enu mu di fude khu kotani nya sighoho sanu ni kotani nya tumbunuko nya mikhuwo yanu nya giwuthu, aholu, Nungungulu a mi ningide nya luphye guvbanya ni Kristo, a gu hi divalela sighoho sathu satshavbo. 14Uye fuviside lidangalila nya nandru li nga bani li gu hi thuledza, a li futa khu gu li khokhothela vbagihambanotunu. 15Pade vafumeli ni dzitshivba nya maphuvbo, a va thela dzitshoni vbakari nya vathu, a gu va hunga nga sibotshwa a gu yeyedza wungwazi waye. 16A nga manegi wa gu mi kawuka khu kotani nya esi mu hodzago ni esi mu selago, mwendro khu kotani nya matshigu nya buzo, nya guwonege nya ngima mwendro nya dzisabhado. 17Satshavbo sesi mwedzi basi nya silo si nga gutago; aholu givili gyakone khu Kristo. 18Mu nga dzumeli gusengwa khu vathu va pfhadzedzelago gulandrisa ni gukhozela dzingilozi dza Nungungulu; vathu nya nga avo va gu ganela khu silo nya gu gima va si gu si woni, va gu dzi gira matshandza va dzi gugumugisa khu mapimo yawe nyamba phasa gilo. 19Vathu vava va mwalo wuhengeli ni Kristo a gu uye hungo nya givili gyatshavbo, a tshanganisago sivbango saye nya guhambanelane, a si dandrisa khu edzi a golago khidzo Nungungulu. 20Mwa gu bani mu fude gumogo ni Kristo, mu gu tshulega wugumbini nya tshivba nya tumbunuko nya mafu, khu ginani mu nga gu dzi hungelelago khu mikhuwo nga khwatshi mu nga gu vbanyela mafu, gani? A gu pwani: 21"Esi u nga si khuhi, esi u nga lingi; esi u nga phari." 22Sileletelo si tshipago khu nango yakone kha nga milayo ni sihevbudzo satshavbo nya vathu. 23Silo sesi sa gu wonega kha nga guti, kholu va si fumbelago khu wukhodwa, va gu sanisa sivili sawe, aholu satshavbo sesi kha si phasi gilo, sa gu thuma gu tsakisa matshandza nya wuthu basi.

will be added

X\