VAKOLOSI 1

1Eni Pawulo, mupostoli wa Kristo Jesu khu guhaladza ga Nungungulu, gumogo ni ndriyangu Thimoti, 2hi ngu losa va nya gu aga va Nungungulu, vandriyathu va tumbegidego ga Kristo va vbanyago dhoropani ga Kolosi. Wuhigo ni gurula ga Nungungulu Babe wathu gu na khale ni enu. 3Ethu hi ngu mu bonga Nungungulu, Babe wa Pfhumu yathu Jesu Kristo, na hi gu mi lombelela gikhati gyatshavbo. 4Kholu hi pwide mahungu nya gukhodwe gwanu linani ga Kristo Jesu ni lihaladzo mu yeyedzago ga vatshavbo va khodwago. 5Gikhati nya guhegule mu hakhidego Mahungu Yadi nya lisine, mu pwide na gu ganedwa khu gutumba hi ningwago khayo. Khu kharato, gutumba ni lihaladzo lanu sa gu seketedwa khu gutumba mu vegedwego ndzadzini. 6Mahungu nya Yadi mu ma hakhidego, ma ngu simama gu ninga mihandro nya yadi ni gu andra tigoni gwatshavbo kha nga edzi ma nga girago vbakari gwanu, gukhugela litshigu mu hakhidego mahungu nya wuwadi wa Nungungulu mu gu wuti khu lisine. 7Mu hevbudzidwe satshavbo khu Epafrasi, githumi gikwathu nya gigodwa, muphasedzeli wangu nya gutumbege thumoni wa Kristo, a gu uye a tshikedzago wulanga wangu vbakari gwanu. 8Khuye a nga hi embelago mahungu nya lihaladzo mu gu nalo khu Liphuvbo nya gu Age la Nungungulu. 9Khu Kharato, gukhugela litshigu hi pwidego mahungu yaya nya gutsakise, kha hi garali khu gu lombelela khu enu. Ha gu lomba gu khethu Nungungulu a mi tadzisele khu gu mi tulela guti guhaladza gwaye, a mi ninga gugengela ni gupima khu Liphuvbo Laye. 10Kharati, mu na kodza gu landrisa guhaladza gwa Pfhumu, mu gu mu tsakisa mithumoni yatshavbo; mu na ninga mihandro nya mithumo nya yadi, mu dandra khu guti Nungungulu. 11Ha gu lomba ga Nungungulu a mi tiyisa khu tshivba yaye nya yikhongolo, mu kodze gutsarama siloni satshavbo khu gutimisela ni gutsaka. 12Bongani Nungungulu Babe a dzinidego gu khuye mu mane nenu fanelo nya guya hengela guhodza thomba a yi vegisedego libandla laye mufumuni nya wenengedzo. 13A hi vbulugiside tshivbani nya gidema a gu hi bedza mufumuni wa Mwanaye nya gigodwa. 14Uye Mwamana a ngu hi vbulugisa ni gu hi handza sighoho khu novba waye. 15Khuye giwonelo nya Nungungulu a si wonegigo; velegidwe khu Babe na li si gu vangwi litigo. 16Nungungulu vangide khu uye silo satshavbo sa ndzadzini ni mafuni, esi si wonegago ni esi si si wonegigo, dzitshivba nya maphuvbo, sikhalo nya wufumu, mifumu, vafumeli ni dzitshivba. Nungungulu vangide silo satshavbo khu Kristo, a gu si vangela Kristo. 17Kristo a diromo na gu si gu vangwi gilo, khuye a tiyisago silo satshavbo. 18Khuye hungo nya Libandla, a gu givili gyaye; khuye guphela, khuye matiwula nya guwuge ga vafudego. Khuye a thangidego mbeli nya silo satshavbo somo khu kota yaye. 19Nungungulu dzinide gu mu ninga gutadzisega gwatshavbo. 20Khu tshivba yaye tshanganisile ni Nungungulu silo satshavbo: esi si guromo ndzadzini ni esi si guromo mafuni a gu vbaha gurula ga vatshavbo khu novba wa Mwanaye wu vbaladzidwego vbagihambanotunu. 21Enu nenu mu di gu vbanya hwindzo ni Nungungulu, gambe mu diri valala vaye khu myonyo ni mithumo yanu nya guvivbe. 22Gasi olu, khu gufa Gwaye, Nungungulu a mi giride dzipari dzaye, afela gu mi emisa mbeli gwaye na mu vbelede gululama, na mu agide nyambana livala ni gusolega. 23Aholu, gu vbwetega mu simame gu khala na mu tiyide gwadi gukhodwani, mu nga hambani ni gitumbo mu hakhidego gikhati mu tivisidwego Mahungu nya Yadi, ma tiviswago ga vathu vatshavbo va tigoni momu, eni Pawulo nyi vegidwego gu khala mutivisi wakone. 24Olu nyi ngu nengela khu gusaniseka khu eni, nyi sanisekago khu kotani gwanu; nya gu tadzisa milini gwangu, avba gu nga bani gu tshade gusanisekani ga Kristo khu kotani nya Libandla a gu givili gyaye. 25Nungungulu a nyi ranide guta thumela Libandla. A nyi ningide thumo yoyu vbakari gwanu, gasi enu mu phasege gikhati mahungu ya Nungungulu ma giregago vbakari gwanu. 26Mahungu yaya khu sihalo nya gikungu gya Nungungulu a gi sihidego nyamba gi tivisa ga vathu, gukhugela gale nya matshigu, aholu muhuno a dzinidego gu ma tivisa ga vale va khodwago. 27A va tulede gambe guti talo nya thomba nya sihalo yoyo a dongisedego vathu vatshavbo. Gikungu gya Nungungulu nyi gi thulago khu Kristo a vbanyago ndrani gwanu a gu uye gitumbo nya wudhumo wa Nungungulu. 28Hi ngu tivisa Kristo ga vathu vatshavbo. Hi ngu laya ni gu hevbudza vathu vatshavbo gasi va mane wuhengeli nya guvbelele ni Kristo. 29Khiso nyi si thumelago ni gu si dwanela khu tshivba yatshavbo nyi yi manago tshivbani ga Kristo.

will be added

X\