MITHUMO 9

1Sawulo a di gu vila khu likhulo na gu vbweta lipindru nya gu songe vapizane va Pfhumu a diya ga khongolo nya vaphasi nya mhamba, 2a ya mu lomba malangalila nya guhongole khayo dzinyumbani nya nombelo dzi guromo dhoropani ga Dhamasko. A gimbila a molela makhodwa nya vama ni vanyamayi a va hunga dzitshinga a va resa Jerusalema. 3Na gimbide, nari vbakari nya ndzila, vbafuvbi ni gu vboha Dhamasko, a di fenengedzwa khu gulasa nya gukhongolo nya gute khu ndzadzini. 4A di thega vbavbatshi a pwa lito na li gu khilo "Sawulo, Sawulo, khu ginani u nyi sanisago?" 5Uye a di hakha khuye: "Nuri uwe mani, Pfhumu?" A di hakhwa pwani: "Kheni Jesu wule u mu sanisago, 6ambari ulo khuga u bele dhoropani, va na gu embela esi u fanedego gu gira." 7Avo a nga bani ari navo Sawulo va di thuruga kholu va di pwa lito, aholu va si woni muthu. 8Sawulo a di khuga a ema a zama gu wona aholu a di si woni gilo. Va diya khu gu mu phara kunga va mu bedza Dhamasko. 9Khade gipimo nya matshigu mararu nyamba wona, nyamba hodza, nyamba sela. 10Dhamasko a di gu vbanya mupizane nya gupwani khu Ananiya, a di embedwa khu Pfhumu khu ndroroni, pwani: "Ananiya!" Uye a hakha khuye: "Ganela Pfhumu, nyi ngu pwa." 11Pfhumu a di engedza gambe khuye: "Khuga u hongola ndrangani ga Judha yi manegago ruwani yi ranwago pwani 'Gululama' u ya wudzisa khu lina la mwama moyo nya gu pwani khu Sawulo nya givelegwa gya Tarsu, kholu womo vbakari nya gulombelele." 12Khu gikhati gyogyo, Sawulo a di woniswa mwama nya gupwani khu Ananiya na gu bela, a mu handzega mandza gasi a wona. 13Ananiya a di hakha khuye: "Pfhumu, nyi pwide vathu nya vangi na va gu amba muthu yoyu khu guvivba gwatshavbo a girelago sihathwa Sago Jerusalema. 14Olu dzude ino khu gu rumedwa khu khongolo nya vaphasi nya mhamba ni lidangalila gasi gu ta molela vatshavbo avo va khodwago linani gwago." 15Aholu, Pfhumu a di mu embela khuye: "Indra, kholu muthu yoyo nyi mu hathile gasi a vbohisa Lina langu ga mahedheni, ga vafumeli ni ga sanana sa Israeli. 16Aholu, eni nyi na mu nonedza tshanisa a na gu yi wonago khu kota nya lina langu." 17Khavbo avbo, Ananiya a di khuga a hongola, na vbohile a di bela nyumbani a gu handzega mandza Sawulo a gu mu embela Khuye: "Sawulo ndriyangu, Pfhumu Jesu, wule a nga gu tumbulugela ndzilani, gikhati u nga bani u guta, khuye a nga nyi ruma guta gu tula maho ni gu gu ninga Liphuvbo nya gu Age." 18Gikhati gyogyo gu di thega khu mahoni gwaye silo nya nga maguru. Khavbo avbo, a di wona, a gu bhapatiswa. 19Hwane nya gu bani a hodzile, Sawulo a di mana tshivba a gu khala matshigwana ni vapizane, dhoropani ga Dhamasko. 20Khavbo avbo, a di phela gu hevbudza dzinyumbani nya nombelo khuye Jesu Mwamana wa Nungungulu. 21Avo va nga bani va gu mupwa va di liwuga khavo: "Ina khandruye oyu a nga bani a gu sanisa avo va nga bani va gu ganela khu Lina la Jesu tigoni ga Jerusalema, gani? Gasi khandri a dita ino gufela guta va molela a va hunga dzitshinga a ya va ningela ga vakhongolo nya vaphasi, gani?" 22Aholu, tshivba nya gutshumayele ga Sawulo yi diya na yi gu tadzisega, a hambanisa mapimo nya Vajudha va Dhamasko khu edzi a nga bani a gu fakaza khidzo khuye Jesu khuye Muvbanyisi a nga tumbiswago. 23Na ma vbindride matshigwana, Vajudha va di hunga gikungu nya gu mu songe. 24Aholu Sawulo a di tiviswa. Ni malimba nya lidhoropa ma di ghadhwa wutshigu ni mihani, vafela gu mu songa. 25Khavbo avbo, vapizane vaye va di mu dzega va duga naye ni wutshigu, va mu thela gitundruni va mu ndragisa libhiyo. 26Na vbohide Jerusalema, Sawulo a di vbweta gu bela tsawani nya vapizane, aholu, vatshavbo va di khala hwanga, va si khodwi gu khavo uye nuye mukhodwa. 27Khavbo avbo, Bharnabha a di mu dzega a mu yisa ga Vapostoli a ya va tshamusela idzo a nga wonago khidzo Pfhumu ndzilani a ganela naye, ni tshivba a nga ganelago khiyo khu lina la Jesu, dhoropani ga Dhamasko. 28Gukhugela litshigu lolo a di khala navo Jerusalema, a gimbilagimbila navo a hevbudza khu lina la Jesu na si thavi gilo. 29A di bhula ni gu ganedzisana ni Vajudha nya guganele Gigreki, gasi avo va di gu luga mano nya gu mu songe. 30Na va dzitide, vandruye va di mu rumela Sezareya va mu khiledza a gu hongola Tarsu. 31Libandla li di gu vbanya khu gu rula Judheya gwatshavbo, ni Galileya ni Samariya; Li diya na li gu dandra ni githawo ga Nungungulu, na li gu tiyiswa khu tshivba nya Liphuvbo nya gu Age. 32Pedro na gu gimbila a holela makhodwa malangani yatshavbo, a di vboha ga sihathwa si vbanyago Lidha. 33Iyo a nga ya mana mwama moyo nya gupwani Eneya, nya gigoha, a nga bani ari ni livbandre na miraru myaga na ladzisidwe vbadawutunu. 34Pedro a di mu embela khuye: "Eneya, Jesu Kristo a ngu gu hawulugisa; khuga u peta lidawu lago." Uye a di dzegela gu khuga. 35Vathu vatshavbo va Lidha ni va panini ga Saroni, na va mu wone, va di vbindrugedza va khodwa ga Pfhumu. 36Tigoni ga Jope a di romo, vbakari nya vapizane, nyamayi moyo nya gupwani Tabhita, gu tshamusago gu pwani "Yisya!"Adiri muthu nya mithumo nya yadi, a di phasedzela sisiwana. 37Khu matshigu yale, a di dwala, a gu fa. Khavbo avbo, va di mu dzega va ya mu vega nyumbani ga vbatshani. 38Lidha gu di gu, khala vbafuvbi ni Jope, vapizane na va pwide nya gupwani, Pedro womo iyoyo, va di rumela vama vavili gasi guya mu lomba, khavo: "U nga hweli guta eno gwathu." 39Pedro a di dzegela gu khuga a gu hongola navo. Na vbohide, va di mu yisa nyumbani ga vbatshani; dzinoni dzatshavbo dzi di hidzimela vbafuvbi gwaye, dzi mu yeyedza dzingandzu ni myendra a nga sonago Tabhita, na nga gu vbanya navo. 40Aholu, Pedro, na rumide vathu vatshavbo gu duga vbavbandze, a di khidzima a gira nombelo. Na thendregedzide a khedza girumbi, a di khuye: "Tabhita, wuga!" Uye a di hapfhula; na wonide Pedro, a di khala khu giwunu. 41Pedro a di mu phara khu mandza, a mu phasa gu khuga a ema. Khavbo avbo, a di rana sihathwa ni dzinoni a va ninga muthu wawe na gu vbanya. 42Mahungu nya giliwugiso gile ma di pwala dhoropani gatshavbo ga Jope, vathu nya vangi va di khodwa ga Pfhumu. 43Pedro a di khala Jope matshigu nya gulaphe, ndrangani ga moyo nya gupwani khu Simoni a nga bani ari meseri nya madowo.

will be added

X\