MITHUMO 7

1Khongolo nya vaphasi nya Mhamba a di ganela khuye: "Ina khidzo kamwe, gani?" 2Sitefane a di mu hakha khuye: "Vandriyangu ni vababe vangu, yingisani! Nungungulu nya wudhumo a dzi wonegiside ga babe wathu Abrahama na ngo gu vbanya Mesopotamiya, na si gu ruri aya khala Harani, 3a mu embela khuye: 'Khuga tigoni gwago u diga valongo vago u hongola tigoni nyi na gu nonedzago.' 4Khavbo avbo, a di rura tigoni nya Vakaldewu a ya vbaha Arani.Hwane nya gu na fedwe khu babe waye, Nungungulu a di mu resa tigoni momu mu vbanyelago umo enu muhuno. 5Nungungulu kha mu ninga ambari gipandre gidugwana nya mafu ya tigoni momu.Aholu a mu tumbisile gu mu ninga latshavbo litigo leli, uye ni sanana saye, ambari ulo a nga bani ari mwalo gyanana. 6Nungungulu a di mu embela khuye: 'Sanana sago si na khoza tigoni ga vane, si na girwa dzikhumbi si gu saniswa, gipimo nya magumi mana mazana myaga. 7Aholu, litigo li na gu va sanisago nyi na li lamula.' Nungungulu a di engedza gambe gu ganela khuye: 'Hwane nya isoso va na duga khu tigoni mule va ta nyi khozela wulangani wowu!' 8Nungungulu a di hunga pwanano ni Abrahama a gu vega gifungo nya wugwera. Khavbo avbo, Abrahama a di velega Isaki a mu hanisa wugwera, khu litshigu a nga tshanganisago livbandre na mararu matshigu nya guvelegwe gwaye. Isaki nuye a di hanisa wugwera Jakobe, a nuye Jakobe a gu hanisa sanana saye nya likhumi na sivili, a gu avo likhumi na vavili vanyapandre vathu." 9Sitefane a di engedza khuye: "Vakokwe vathu avo, va di girela lidiwo ndriyawe Josefe, va mu rengisa a vbagedwa a yiswa Egipito. Aholu Nungungulu adiri ni uye; 10a di mu vbulugisa mu sigaradzoni satshavbo; a di mu ninga mapimo a mu gira gambe gigodwa gya Faro, mufumeli wa Egipito. Faro a di mu vega kha nga gyandza gyaye a thangela litigo la Egipito ni ndranga yaye yatshavbo nya wufumu. 11Yi di manega ndzala tigoni gwatshavbo ga Egipito ni Khanani. Gusaniseka gudiri gu khongolo. Vababe vathu va di hamuga ni gilo nya guhodze. 12Aholu, Jakobe, na dzitide khuye Egipito momo mavbila a di rumela iyo vababe vathu, gikhati nya guhegule. 13Khu gikhati nya wuvili va nga hongolago Josefe a di dzi tugudzisa ga vandriyaye. Khu Kharato, valongo va Josefe va di tidwa khu Faro. 14Khavbo avbo, Josefe a di rumela gu ya ranisa Jakobe, babe waye, gumogo ni ngamu yaye yatshavbo. Va diri gipimo nya livbandre na mavili magumi vathu. 15Jakobe a di relela Egipito a ya khala, a fa iyoyo, uye ni vababe vathu. 16Khu hwane nya matshigu va di resa sirumbi sawe Sikemi, va ta si kembela thowoni li nga rengwa khu Abrahama ga sanana sa Hemori. 17Na giri vbafuvbi ni gu vboha gikhati Nungungulu a nga gi vegisago gasi gu tadzisega gitumbiso a nga girago ga Abrahama, vathu va di velegelana va gu tala tigoni ga Egipito. 18Khu gu hegisa, a di phara ndronga nya wufumu wa Egipito, mufumeli moyo a nga mba muti Josefe. 19Mufumeli yoyu a di pfhadza vababe vathu khu mano, a va wugela, a va sanisa ngudzu; a di ruma gu dzudzuga sanana sawe gasi sifa. 20Khu gikhati gyogyo a di velegwa Mosi, gyanana gi nga tsakisa Nungungulu. Vavelegi vaye va di mu dandrisa gipimo nya migima miraru ndrangani gwawe. 21Gikhati va nga mu dzudzugago, khu nyamahegyane wa mufumeli wa Egipito a nga mu dandrisa a mu sayisa kha nga gyanana gyaye. 22Khu guralo, Mosi a di hevbudzwa wugengeli watshavbo wa vagipiti, a diri ni tshivba khu magana ni mithumo. 23Aholu, gikhati a nga tshanganisa magumi mana myaga a di tedwa khu mapimo nya gu ya holela vandriyaye, sanana sa Israeli. 24Na wonide moyo na gu saniswa khu Mugipiti, a di mu phodzela, a gu songa Mugipiti. 25Mosi a di hingigedza khuye vandriyaye va na tugula khavo Nungungulu a ngu vbweta gu va vbanyisa khu mandza yaye; aholu, avo kha va tugula. 26Khu mindru gakone a di hidzimela a wona vavili nya sanana sa na Israeli na va gu dwana, a di zama gu va avbula, khuye: 'Vathunu, enu mu va na ndruye ni ndruye! Khu ginani mu sanisanago khu gyanu?' 27Aholu, uye a nga bani a gu sanisa kwawe a di reda Mosi, a mu embela khuye: 'Khu mani a nga gu vega vbakari gwathu kha nga mufumeli ni mulamuli. 28O mwendro wa gu vbweta gu nyi songa neni kha nga vbanova u nga songago Mugipiti?' 29Na pwide magana yaya, Mosi a di thava a pengela tigoni ga Madiyani, iyo a nga ya velega sanana sivili. 30"Na guvbindrile magumi mana myaga, Mosi a di gu manega giwulani gya Sinayi, a di tumbulugedwa khu girumwa gya Nungungulu, gi nga wonega vbamalavbelavbetunu nya nilo na wu gu dzura vbagipopwanatunu. 31Mosi a di liwuga, khu esi a nga si wona. A di hidzimela afela gu wona gwadi, a dipwa lito la Pfhumu khilo: 32'Eni kheni Nungungulu wa vakokwe vago, Nungungulu wa Abrahama, Nungungulu wa Isaki, Nungungulu wa Jakobe!' Mosi a di ndrendremela khu hwanga, a si tiyi ni gu khedza. 33Khavbo avbo, Pfhumu a di khuye: 'Tshula silato migondroni gwago, kholu, wulanga u emidego avbo, litigo nya gukatege. 34Khu lisine, nyi wonile gusaniseka ga vathu vangu Egipito; nyi pwide huwa yawe; nyi dongile gu ta va vbanyisa; Khu kharato, delu, nyi guruma Egipito.' 35"Khuye Mosi va nga mu nyenyago khavo, khu mani a nga gu gira mufumeli ni mulamuli wathu. Khuye a nga rumedwa khu Nungungulu kha nga muthangeli ni mutshuli, khu lito la girumwa gya Nungungulu gi nga dzi wonegisa gwaye vbagipopwanatunu. 36Khuye Mosi a nga va tshula a gu gira siliwugiso ni siwoniso tigoni ga Egipito ni linene nya gufuvile, ni giwulani, gipimo nya magumi mana myaga. 37Khuye Mosi a nga ganela ga va na Israeli khuye: 'Nungungulu a na wusa vbakari nya vandriyanu muprofeti nya nga eni.' 38Khuye oyu Mosi a nga bani aromo tshanganoni nya libandla la Israeli; khuye a nga hakha Magana nya guvbanye ma nga ganedwa khu girumwa gya Nungungulu gigomoni ga Sinayi, a ma tshamusela ga vakokwe vathu. 39Aholu, vakokwe vathu va di bomba gu mu yingisa, va mu tsukula myonyoni gwawe, va gola gu bwelela Egipito. 40Va di embela Aroni khavo: 'Hi girele vanungungulu va na gu thangago mbeli gwathu; kholu kha hi siti esi si dugeledego Mosi, a nga hi dusa tigoni ga Egipito.' 41Khu matshigu yoyo va di wumba githombe nya mombe va gu phasela dzimhamba gifananiso, va nengela khu mithumo nya mandza yawe. 42Aholu, Nungungulu a di va pfhurarela a va diga va khozela sivangwa sa ndrengelengeni, kha nga gu nga lowago libhukuni nya vaprofeti pwani: 'Sanana sa na Israeli,gipimo nya magumi mana myaga giwulani kha mwa dzi kodza gu nyi songela sirengo mu nyi phasela dzimhamba, 43Mu di rwala tabernakele ya Moloke, ni gifananiso nya nyeledzi ya nungungulu Rafani,a gu sifananiso nya gugirwe khu mandza yanu mufela gu si khozela.Khu nandru yoyo, nyi na mi vbagedzisa mu yiswa hwindzo guvbindra Bhabhiloniya.' 44"Vakokwe vathu, giwulani, vadiri ni tshatsha nya wukustumunyu, a gu Tabernakele va nga bani va gu vega umo siwindri nya Nayo. Tabernakele yi di vbahidwe kha nga idzo a nga rumisago khidzo Wule a nga ganela ga Mosi a mu ruma gu yi gira kha nga gifaniso gile a nga gi wonago. 45Khiyo Tabernakele yi nga hakhwa khu vakokwe vathu na va gu thangedwa khu Josuwa va gu bela nayo tigoni va nga wandrelago mahundzu ma nga tutumiswa khu Nungungulu, va gu yi vegisa kala matshiguni ya Dhavide. 46Mufumeli Dhavide, na kategile mbeli ga Nungungulu, a di lomba guvbahela nyumba Nungungulu wa Jakobe. 47Aholu, khu Salomoni a nga vbaha Nyumba ya Nungungulu. 48Ambari ulo, uye a guromo vbatshani ngudzu kha khali dzinyumbani nya gu vbahwe khu mandza nya vathu, kha nga a ganedego muprofeti khuye: 49'Ndzadzini gikhalo gyangu nya wufumu ni litigo gigandredzelo nya migondro yangu,ina nyumba muni mu na gu nyi vbahelago?Khu Pfhumu a ganelago;khu wevbini wulanga wu yelago eni guhefemula avbo? 50Gasi khandri eni nyi nga gira silo satshavbo, gani?' 51Vathu va nya gu banga mihungo, nya myonyo nyamba khodwa ni dzindzeve nyamba pwa. Mu ngu bomba Liphuvbo nya gu Age gikhati gyatshavbo, nga edzi va nga bani va gu gira vakokwe vanu. 52Khu wevbini muprofeti va nga mba mu tutumisa vakokwe vanu? Va songile vale va nga hegula gutivisa lipfhumba nya gute ga Mululami, oyu mu nga mu danga enu mu gu mu songa. 53Enu mu nga hakhago Nayo khu mandzani nya sirumwa sa Nungungulu mu si wu landrisi." 54Na va pwide magana yaya va di khunguvanyega myonyoni gwawe, va gu khukhurusela magwaha Sitefane khu likhulo. 55Na tade khu Liphuvbo nya gu Age, Sitefane a di khedzisa vbatshani a gu wona wudhumo wa Nungungulu, Jesu na emile nyamudye ga Nungungulu, 56Sitefane a ganela khuye: "Nyi ngu wona ndzadzi na yi tulegile ni Mwamana wa Muthu na emile nyamudye ga Nungungulu." 57Aholu, vathu, na va pwide, va di womba dzihuwa, va gu tshika dzindzeve, va mu kuwugela vatshavbo, 58va mu ndrindrela vbavbandze nya lidhoropa, va mu pfara khu siwindri. Dzifakazi dzi di vegile myendra yawe migondroni ya moyo nya lidzaha nya gupwani khu Sawulo. 59Na gu pfarwa khu siwindri Sitefane a di lombelela khuye: "Pfhumu Jesu hakha hefemulo wangu!" 60Khavbo avbo, na khidzimile a di khusedza ngudzu lito a lomba khuye: "Pfhumu, U nga va rwegi nandru nya gighoho gegi." Na ganede magana yaya a di lala.

will be added

X\