MITHUMO 6

1Khu matshigu yale, tengo nya vathu va nga dzumela gu khodwa, wu di gu engedzelana tshigu ni tshigu. Gu di manega gisolo tsawani nya Vagreki va gu phela gu wugela tsawa nya Vaheberu. Kholu sifurugadzi nya tsawa nya Vagreki si di gu divadwa gikhatini nya gukabaniswe silo nya siphasedzelo. 2Khavbo avbo, vale nya likhumi na vavili, na va rambile libandla nya vapizane va di va embela khavo: "Kha hi faneli ethu gu diga thumo nya gutshumayele mahungu ya Nungungulu hi gu phara thumo nya gukavedzele guhodza. 3Khu kharato, vandruye, hathani vbakari gwanu livbandre na vavili vama nya ndruda nya gutale khu Liphuvbo ni guti, hi na va ninga avo thumo yoyo, 4gasi ethu hi na simama ni nombelo ni thumo nya gutshumayele Mahungu ya Nungungulu." 5Mawonelo yoyo ma di tsakisa vathu vatshavbo. Va di hatha Sitefane, mwama nya gutale khu gukhodwa ni Liphuvbo nya gu Age; Filipi, Prokoro, ni Nakonori, Timoni, Parmenasi ni Nikolawu, mukhodwa wa Antiyokiya. 6Na va va resile ga Vapostoli, avo, na va girile nombelo, va di va handzega mandza. 7Magana ya Nungungulu ma di phalalega. Tengo nya vapizane wu di gu engedzelana khu tshivba Jerusalema. Vathu nya vangi ngudzu nya tsawa nya vaphasi nya mbamba va di dzumela gukhodwa. 8Sitefane, na tade khu gukhodwa ni tshivba ya Nungungulu a di gu gira siliwugiso ni siwonegiso vbakari nya vathu. 9Va dita vathu nya gukari khu Nyumbani nya nombelo yi ranwago pwani khya va nya gutshulega, ni va nya guta khu Kirene, Alexandriya, ni Silisiya ni Asiya, va dita ganedzana ni Sitefane. 10Aholu, va di si dugeleli khu kota nya guti gwaye ni Liphuvbo nya gu Age li nga mu ninga tshivba nya guganele. 11Va di renga vathu nya gukari va gu va livba dzitsapawu, va va ruma gu mu singedza khavo va di mupwa na gu hembulula Mosi ni Nungungulu. 12Va di kutsedzela vathu, madhota ni vahevbudzi nya Nayo, va ta mu mola va mu yisa Phathani. 13Va di mu singedza malipha khavo: "Oyu mwama kha garali khu gu hembulula Nyumba ya Nungungulu ni Nayo. 14Kholu hi mu pwide na gu ganela khuye Jesu wule wa Nazareta a na fuvisa wulanga wowu, a vbindrugedza tumbunuko hi nga tshiyedwago khu Mosi." 15Na va mu khedzisile gwadi, vatshavbo va di wona khovbe yaye na yi gu ngangamela nga girumwa gya Nungungulu.

will be added

X\