MITHUMO 5

1Mwama moyo nya gupwani khu Ananiya ni mwangadzi waye Safira, a di rengisa gipeto; 2aholu, na pwanane ni mwangadzi waye a di siha gipandre nya tengo nya dzitsapawu a nga rengisa khidzo, a gu dzega edzi dzi nga tshala a gu ya dzi vega migondroni ya vapostoli. 3Khavbo avbo, Pedro a di mu wudzisa khuye: "Ananiya, khu ginani u nga dzumela Sathane a tadza monyo wago, u gu liphela Liphuvbo nya gu Age, u gu siha dzimbe dzitsapawu u nga rengisago khidzo gipeto? 4U sigu rengisi, ina gi di si gu lumbi gani? Ahati olu u gi rengisidego khu gudzina gwago, khu ginani u nga diga gu khala ni dzitsapawu dzakone, u dzi thumisa guhaladza gwago? Khu ginani u hungidego makungu yoyo monyoni gwago? Khwa liphela vathu, u di liphela Nungungulu." 5Na pwide magana yaya Ananiya a di thega vbavbatshi a sala afa. Khavbo avbo, vatshavbo va nga mapwago mahungu yaya, va di khala hwanga. 6Ma di khuga madzaha ma fenengedza girumbi gyaye, ma duga nagyo ma ya dzinga. 7Na gu vbindrile gipimo nya dziora dzitharu, a di bela ngadza Ananiya, nyamba siti esi si nga dugelelago. 8Khavbo avbo, Pedro a di mu wudzisa khuye: "Nga nyi embela, khuye oyu tengo mu nga rengisa khuye gipeto, gani?" Uye a di hakha khuye: "Ina, khuye." 9Pedro a di engedza a ganela khuye: "Khu ginani mu nga pwananago mufela gu pfhadza Liphuvbo la Pfhumu? Yingisa, mwanyatunu, sikingo sa vale va wuyago khiyo va nga ya dzinga mwama wago. Va na gu rwala nuwe." 10Gikhati gyogyo nyamayi a di thega vbavbatshi migondroni ya Pedro afa. Na ma bede madzaha, ma di mu dzega ma ya mu dzinga vbafuvbi ni mwama waye. 11Vathu vatshavbo nya vakhodwa ni vatshavbo vathu va nga pwa mahungu nya silo sesi va di tala khu hwanga ni guthuruga. 12Siwonegiso ni siliwugiso nya singi si di girwa vbakari nya vathu khu mandza nya vapostoli. Va di gu olovela gutshangana vatshavbo khu monyo moyo vbanyangwatunu ya Salomoni. 13Aholu vambe vathu va di si tiyeli gu patana navo; ambari ulo, vathu va di gu va rungudza ngudzu. 14Tsawa nya vakhodwa wu di gu engedzelana gu dandra, vama ni vanyamayi va di gu bela tsawani ga Pfhumu. 15Va di dzega vadwali va gu va rwala khu mathatho mu dzindzilani, gasi gikhati Pedro a vbindrago va kuhwe khu mwedzi waye. 16Vathu nya vangi va di guta khu madhoropani ya vbafuvbi ni Jerusalema va resa vadwali ni vathu nya gusaniswe khu maphuvbo nya guvivbe. Vatshavbo va di hawulugiswa. 17Khavbo avbo, khongolo nya vaphasi nya mhamba ni vatshavbo vale a hengelago navo, va lumbago tsawa nya vasadhusi, va di tala khu lidiwo, 18va mola vapostoli va gu va thela pasoni. 19Aholu girumwa gya Nungungulu gi dita ni wutshigu gita tula malimba nya lipaso, gi gu duga navo vbavbandze, gi va embela khigyo: 20"Indrani Nyumbani ga Nungungulu mu ya tshumayela vathu khu mavbanyelo yaya nya maphya." 21Na va pwide silo sesi, va di bela Nyumbani ga Nungungulu ni marandragugya va phela gu hevbudza. Na vbohile Muphasi nya khongolo ni ava a nga bani ari navo, va di ramba madhota ni manganagana yatshavbo ya na Israeli, va gu rumela gu ya dzega Vapostoli pasoni, gasi gu ta va lamula. 22Aholu, dzindruna na dzi hongode, dzi di ya va hamuga pasoni, dzi wuya dzita bika khidzo: 23"Hi di ya mana malimba na ma khothidwe gwadi, masotshwa mari malangani yawe, aholu, na hi tude, kha ha mana muthu." 24Na va pwide magana yaya, muthangeli nya Nyumba ya Nungungulu gumogo ni vakhongolo nya vaphasi nya mhamba, va di liwuga ngudzu va gu dzi wudzisa avo vamune khavo:"Gu na bani ari ginani silo sesi." 25Khavbo avbo gu di vboha muthu a nga resago mwango nya gukhuye, vama mu nga va thelani pasoni, vomo Nyumbani ga Nungungulu va hevbudza vathu. 26A di hongola muthangeli nya Nyumba ya Nungungulu ni dzindruna dzaye va ya va dzega nyamba va gurumedza khu tshivba, kholu va di gu thava gu pfarwa khu siwindri khu vathu. 27Na va residwe va ta vegwa vbakari nya madhota, muphasi nya khongolo a di va wudzisa khuye: 28"Ethu hi mi himbedzedeni khu tshivba guhevbudza khu lina lolo, aholu enu mu tadzile Jerusalema khu sihevbudzo sanu, gambe mwa gu vbweta gu hi ninga nandru khu gufa nya muthu yoyu." 29Aholu, Pedro ni vapostoli va di hakha khavo: "Hi fanede gu yingela Nungungulu guvbindra gu yingela vathu. 30Nungungulu wa vakokwe vathu wusile Jesu khu ga vafudego, oyu enu mu nga mu songa mu mu khokhothela vbagihambanotunu. 31Nungungulu rungudzile Jesu a mu gira Pfhumu ni Muvbanyisi, afela gu ninga guvbindrugedza mavbanyelo ni gutsetseledwa sighoho sanana sa na Israeli. 32Ethu hi guromo avba hi dzifakazi nya silo sesi gumogo ni Liphuvbo nya gu Age, eli Nungungulu a ningago vatshavbo vale va mu yingelago." 33Na va pwide esi, va di dzi hodzedzela khu wuvi, va gu hunga makungu nya gu va songe. 34Khavbo avbo, moyo nya mufarisi, nya gupwani khu Gamaliyeli adiri muhevbudzi nya Nayo, a nga bani a gu ningwa githawo khu vathu vatshavbo, a di khuga a ema a ruma gu duswa vapostoli vbavbandze gipimwana. 35A di ganela ga madhota khuye: "Va na Israeli, dzi woneleni khu esi mu vbwetago gu gira ga vathu vava! 36Khu matshigu ya hwane manegide mwama nya gupwani Teodasi a nga bani a gu dzi randra khongolo, khu magirelo yoyo, a di gu landredwa khu gipimo nya magumi mana mazana vama, hwane nya gu na songidwe, vapizane vaye vatshavbo va di phalalega; satshavbo si guvbela furi avbovbo. 37Khu hwane a dita Judha, mugalilewu, khu matshigu nya gilovela. Uye nuye a di landredwa khu vathu nya vangi, aholu a di songwa. Vale va nga bani va gu mu landrela va di phalalega. 38Khu yangu mawonelo nyari kheni, hongoleni hi va dige vathu vava nyamba va gira gilo. Va tshuleni va hongole, kholu thumo yoyu, wa gu bani wuri wa gu khugela mapimoni nya vathu wu na hegisa khu gufuva. 39Aholu wa gu bani wuri thumo wa Nungungulu, gima, kha mu na wu kodza gu wu fuvisa; gambe mu na manega na mu gu dwana ni Nungungulu." Va di dzumela mawonelo ya Gamaliyeli. 40Na va ranide vapostoli va di va kwamula va gu va laya gumba ganela gambe khu lina la Jesu. Khavbo avbo, va di va tshula. 41Vapostoli va di duga khu phathani na va tade khu gunengela, kholu Nungungulu a di va ningile wuhigo nya gusaniswe khu kota nya lina la Jesu. 42Va di si garali khu gu hevbudza matshigu yatshavbo Nyumbani ya Nungungulu ni dzidrangani, ni gu huwelela mahungu yadi nya gupwani Jesu khuye Kristo.

will be added

X\