MITHUMO 3

1Pedro ni Johane va di gu gwela Nyumbani ga Nungungulu va ya gira nombelo nya silambo (3 ora). 2Va dita vathu na va rwade mwama a nga bani ari gigoha gukhugela guvelegwani gwaye. Matshigu yatshavbo va dita mu vega vbamwanyatunu nya Nyumba ya Nungungulu gu ranwago pwani "Wumburi," afela gulomba zomola ga vathu va belago. 3Na wonile Pedro ni Johane na va gu bela Nyumbani ga Nungungulu a di va lomba zomola. 4Pedro ni Johane va di thendregedza va mu khedzisa. Pedro a di mu embela khuye: "Nga hi khedzisa." 5Uye a di khusedza maho a va khedza, na gu virela gu hakha gilogyo khu mandzani gwawe. 6Pedro a di khuye: "Nyi mwalo prata ambari ndralama; aholu, iso nyi gu naso, khiso nyi gu ningago: khu lina la Jesu Kristo wa Nazareta, khuga u gimbila." 7A di mu phara khu mandza ya nyamudye a gu mu khusa. Khu gikhati gyogyo, migondro ni sitshinandro saye, si di tiyela; 8mwama a di ndraga a ema khu mawundru yaye, a phela gu gimbila. A di bela navo Nyumbani ga Nungungulu, na gu gimbila, na gu ndragandraga ni gu rungudza Nungungulu. 9Vathu vatshavbo va di mu wona na gu gimbila ni gu rungudza Nungungulu, 10va di gu muti pwani khuye kamwe a nga bani a gu khala vbamwanyatunu nya wumburi nya Nyumba ya Nungungulu a lomba zomola. Va di tala khu guliwuga ni gusamala khu kotani nya iso si nga girega gwaye. 11Mwama wule a di namarela Pedro ni Johane, vatshavbo va di liwuga va ta va randrela avba va nga bani va romo, nyangwatunu yi ranwago pwani khya Salomoni. 12Na wonile esi, Pedro a di ganela ga vathu khuye: "Vathu va Israeli, khu ginani mu liwuga khu gu wona silo sesi; khu ginani mu hi khedzisago nga khwatshi mwendro khu tshivba yathu, mwendro gukhodwa gwathu gu nga hawulugisa mwama yoyu a kodza gu gimbila? 13Nungungulu wa Abrahama, wa Isaki ni wa Jakobe, Nungungulu wa vakokwe vathu, rungudzide githumi gyaye Jesu, mu nga Mu ningelani enu, ni gu mu dangani mbeli ga Pilato; na ri gu uye a di gu vbweta gu mu tshula, enu mu bomba. 14Mu dangile muthu nya ndruda, muthu nya gululame, mu gu lomba gu tsetseledwa gighevenga. 15Mu songiside guralo Pfhumu yi ningago guvbanya. Aholu, Nungungulu a mu wusile khu ga vafudego; ethu avba hi dzifakazi nya sigiro soso. 16Khu gukhodwa linani ga Jesu, ilo lina lolo khilo kamwe li nga ningago tshivba mwama yoyu mu mu wonago, gambe mu mu tigo: khidzo kamwe, gukhodwa linani ga Jesu gu ningide womi mwama yoyo mu mu wonago mwatshavbo. 17Ambari ulo vandruye, nyi ngu dziti nya gukheni mu girile esi khu wuhangi, enu ni vafumeli vanu. 18Aholu, Nungungulu tadzisile khu magirelo yaya satshavbo iso a nga si tivisago khu magana ya vaprofeti vatshavbo, nya gu khuye: Kristo Waye a di gu fanela gusaniseka. 19Khu kharato, dzi layeni mu vbindrugedza mavbanyelo, gasi mufela gu tsetseledwa sighoho sanu; 20mwendro khu magirelo yoyo gi na rumedwa gikhati nya gu rudziswe khu Pfhumu. Uye a na rumela Wule a nga tumbisedwa enu, a gu uye Jesu. 21Uye a fanelago gu hakhwa ndzadzini kala gu vboha matshigu nya guwusedzwe silo satshavbo a nga tivisago Nungungulu gu khugela gale khu magana ya vaprofeti nya gukatege. 22Khu lisine, ganede Mosi khuye: 'Pfhumu Nungungulu a na tumbulugisa vbakari nya vandriyanu muprofeti nya gufanane ni eni. Mu na mu yingisani ga satshavbo a na gu mi embelago. 23Uye a na gu mba yingisa muprofeti yoyu a na fuviswa vbakari nya vathu va Nungungulu.' 24Vatshavbo vaprofeti va nga ganela, gu khugela Samueli ni vale vatshavbo va nga mu landrela khu hwane, va tivisile matshigu yaya. 25Enu khenu sanana sa vaprofeti, mu velegidwe ndrani nya pwanano wu nga girwago khu Nungungulu ni vakokwe vanu, gikhati a nga ganela ga Abrahama khuye: khu melego wago ma na kategiswa mahundzu yatshavbo ya mafuni. 26Nungungulu na wusile githumi gyaye khu ga vafudego, a gi rumede gwanu guhegula, gasi gu ta mi kategisa, gufela gu muthu ni muthu a mane gu vbindrugedza a diga mithumo yaye nya guvivbe."

will be added

X\