MITHUMO 28

1Na hi vbulugide hatshavbo, hi di tiviswa gu pwani gidwane gile gya gu ranwa pwani Malta. Vathu va gidwane va di hi hakha gwadi. 2Kha nga ulo yi nga bani yi guwa ndzadzi gu gira girame, va di vasa nilo, va hi rana hiya wora. 3Pawulo a di dzega ginyandrana nya mahale a rinya niloni. Nyoga yi nga bani yi gu thava nilo, hi di mu dandramela mandzani. 4Vamune tigo, na va wone nyoga na yi dandramede mandzani ga Pawulo, va di ganela khavo: "Khu lisine mwama yoyu gighevenga, a dzi kodzide gu vbuluga matini, aholu Nungungulu kha dzini gu mu diga a vbanya." 5Pawulo a di mitedza nyoga yi thegela niloni, nyamba bayiswa khiyo. 6Avo va di khevisela gu mu wona a simba, mwendro gu thega vbavbatshi a dzegela gufa. Aholu va di garala khu gu khevisela nyamba wona esi va nga si pimisa va vbindrugedza maalakanyo, va phela gu ganela khavo Pawulo moyo nya vanungungulu. 7Vbafuvbi vbale ma di romo mahange ma nga bani ma gu lumba Publiyo, mufumeli nya gidwa gile. A di hi hakha gwadi hi khala ndrangani gwaye matshigu mararu. 8Babe wa Pabliyo adiri vbadawutunu, na gu girwa khu ndrani ni feveri. Pawulo a diya mu holela. Na giride nombelo, a di mu handzega mandza hungoni, a mu hawulugisa. 9Khavbo avbo, vadwali vatshavbo va gidwane mule va dita gwaye va ta hawulugiswa. 10Avo navo va di hi sayisa khu githawo ngudzu. Litshigu hi nga khuga gambe khu ngalava, va di hi dongisela liendro lathu khu satshavbo esi si vbwetegago. 11Hwane nya migima miraru hi khadego gidwane gya Malta, hi di bela ngalavani nya gute khu Alexandriya yi ngata khala gidwane yi virela guvbindra nango nya girame. Thonvutunu, yidiri ni sifananiso nya vanungungulu nya mavbaha: Kastori ni Poluse. 12Na hi vbohide siwoni ga Sirakuza, hi di duga hi vbedza matshigu mararu, 13khavbo avbo, hi di khilela hi landrisela bambe nya litigo, kala hi gu vboha Rejiyo. Khu mindru gakone, gu di furugedza siga, wu nga hi vbohisa siwoni ga Putoli khu matshigu mavili. 14Avba hi di mana vaKristo nya gukari, va nga hi lomba ngudzu khavo hi khale navo semana rumba, na hi khugide khavbo, hi di vboha Roma. 15Vakhodwa va Roma, na va dzitide gu khavo hi ngu hongola iyo, va di hi khinga tandralani wa Apiyo ni eyi gu ranwago pwani "Dzinyumba Dzitharu." Na va wone Pawulo, va di rungudza Nungungulu, va tiya longo. 16Na hi vbohide Roma, Pawulo a di dzumedziswa gu vbweta nyumba yaye a khala, a ningwa lisotshwa limwedo li mu ghadha. 17Hwane nya matshigu mararu, Pawulo a di rana Vajudha nya guthavisege va khalago Roma, gasi guta tshangana navo. Na va vbohile a di va embela khuye: "Vandriyangu, eni gimwalo gilo nyi ghohidego ga libandla lathu, kha nyi wugeli tumbunuko nya mavbanyelo ya vakokwe vathu. Aholu Vajudha va di nyi mola Jerusalema, va nyi ningela mandzani ga Varoma. 18Na nyi thethisidwe, va di vbweta gu nyi tshula, kholu kha va mana nandru nya guyele gu songwa. 19Aholu Vajudha va di ganedza, nyi na gu lomba guta lamudwa khu Sezari, ambari nyi gu mwalo ketso nya gugirele va na gyathu. 20Khiso esi nyi nga mi ranelani, gasi gu ta mi wona ni gu mi tivisani, kholu dzitshinga dzedzi nyi hungidwe khu kota nya gitumbo hi gu nagyo ethu va na Israeli." 21Avo va di mu hakha khavo: "Ethu hi si hakhi lidangalila la Judheya nya guganele khu mahungu yago. Gambe mwalo na moyo wa Judheya a ngata a resa mahungu yoyo, mwendro gu ta hi embela guvivba khu mahungu yago. 22Aholu ethu hi di gola gu gupwa na wu gu ganela khu likana lago esi u pimisago, kholu hi ngu dziti gu khethu, gikhodwa gi gyanu nya gu pambuge, gi ngu ganedzwa ni gu wugedwa malangani gwatshavbo." 23Khavbo avbo, va di vega litshigu. Na li vbohide litshigu lolo, nya vangi va di hongola ndrangani a nga bani a gu vbanyela avbo Pawulo. Gukhugela ni dzimindru kala ni wutshigu, Pawulo a di ganela gwawe khu mahungu nya Mufumu wa Nungungulu. A di zama gu khuye va khodwe ga Jesu, a seketela wufakazi waye avba nya Nayo wa Mosi, ni omu nya milowo ya vaprofeti. 24Vomo va nga dzumelago magana ya Pawulo, gasi vambe va di ma bomba. 25Khu gumba pwanana, va di duga va hongola. Va si gu dugi, Pawulo a di va embela khuye: "Bayi, li ganede Liphuvbo nya gu Age, li nga ganela khu likana la muprofeti Isaya, 26na gu thula vakokwe vanu khuye: 'Indra tivisa silo sesi ga vathu vovo, khuwe: Ambari na mu pwide nya gu wani,gima kha mu na si mana,Ambari na mu wonide nya gu wani,gima kha mu na wona gilo 27Kholu monyo nya vathu vava wu bangide nga giwindri Va tshikide dzindzeve ni gu sega maho,vafela gumba wona, gu mbapwa ni gumba pima gilo,va si kodzi guwuya eno gwangu gasi nyi va vbanyisa.' " 28Pawulo a di va embela gambe khuye: "Khalani na mu gu dziti nya gukhenu Mahungu yaya nya guvbanyise hi ningwago khu Nungungulu ma tivisidwe ga va nya mayigo, gambe avo va na ma hakha." [ 29Na ganede magana yaya, Vajudha va di duga va hongola na va gu ganedzisana khu gyawe.] 30Pawulo giride myaga mivili na gu khala nyumbani mule a nga bani a gu livbela, khavbo a nga bani a gu hakhela avbo vatshavbo ava va nga bani va gu hongola vaya mu wona. 31A di tivisa Mufumu wa Nungungulu na tshulegile, a hevbudza mahungu ya Pfhumu Jesu Kristo, nyamba himbedzedwa khu muthu.

will be added

X\