MITHUMO 27

1Gikhati va nga vbweta gu hi khiledza hi hongola Italiya, va di ningela Pawulo ni simbe sibotshwa ga muthangeli nya dzinyimbi nya Muroma, nya gupwani khu Juliyo, nya gikwata gi ranwago "Tsawa wa Sezari" 2Hi khilelede siwoni ga Adramata ngalava yi nga bani yi gu hongola masiwoni ya bambe ga Asiya. Hi diri ni moyo nya gu pwani khu Aristarko nya givelegwa gya Tesalonika, lidhoropa la tigoni ga Makedhoniya. 3Na gugide, hi di vboha siwoni ga Sidhoniya, Juliyo a di sayisa gwadi Pawulo; a mu dzumedzisa gu duga a ya wona valongo vaye, afela gu mana guphasedzedwa khavo. 4Na hi khugide khu Sidhoniya, hi di ya dugela wuronga ga gidwane gya Kipra, kholu phuvbo adiri ya dzibhoridhi. 5Hi di vbindra khu bambe nya mayigo ya Silisiya ni Panfiliya, hi vboha dhoropani ga Mira, tigoni ga Lisiya. 6Siwoni mule, muthangeli nya masotshwa ya Roma a di mana ngalava nya gute khu dhoropani ga Alexandriya, na yi gu hongola Italiya, a hi khiledza umo. 7Ngalava yi di gimbila vbadugwana vbadugwana kala hi vboha vbafuvbi ni tigoni ga Nidusi. Phuvbo yi di hi tandregisa gu gimbila khu bhoridhi yile, hi na gu dzemba, hi gimbilela marandzi ga gidwane gya Kreta, hi vbindra vbafuvbi ni litigo la Salmona. 8Hi di simama hi gimbila bambe ni litigo, hi kala hi gu vboha wulanga wu ranwago pwani "Masiwo-Yadi," vbafuvbi ni lidhoropa la Laseya. 9Hi di vbindredwe ngudzu khu matshigu. Nango nya girame yi di vbohide, khayo matshigu nya dzimhango ndzilani ya matini. 10Khavbo avbo, Pawulo a di va ninga wusingalagadzi, khuye: "Vama vakwathu, nya gu wona gu kheni liendro lathu, gukhugela muhuno, li na bani li tade khu dzimhango, gu na manega gu luzeka nya gungi, gu na luzega esi si vbagedwego ngalavani, gumogo ni litaro lakone. Ethu nethu hi womo mhangoni nya gumbembe ni mihungo yathu." 11Aholu, muthangeli nya masotshwa a di yingisa mune ngalava ni marinyero guvbindra guganela ga Pawulo. 12Lisiwo lidiri mwalo makhalelo nya guyele gu sihala avbo nango nya girame. Khu kharato, nya vangi va di wona gu khavo i tshukwana gu tshula ngalava va yedza gu vboha siwoni ga Fenise, lidhoropa la tigoni ga Kreta, gu khaledego phuvbo ga wuronga-wa-khuga-dambo ni marandzi-wa-khuga-dambo gasi hi ya sihala avbo girame. 13Gu di phela gu furugedza gwadi phuvbwana nya siga khu marandzi. Vathu va di alakanya gu khavo va na manela gu vboha gwadi siwoni va nga li vbweta. Na va kude ferro, va di hongola khu gu landra bambe nya litigo la Kreta. 14Aholu, khadukhadu gu di kowoga phuvbo nya gingulu khu phuvbotshane nya Ronga, 15yi pengisa ngalava; hi gu yi diga yi khuluga khu gu padwa gu yi gimbidzisa khu kota nya tshivba nya phuvbo. 16Khu gu vbiredza hi di vbindrela marandzi nya gidwa gi ranwago pwani Kawudha, avbo phuvbo yi nga bani yisi veti ngudzu khu tshivba. Khavbo hi nga kala hi kodza gu vbanyisa gingalavana gya ngalavani. 17Vamarinyero va di gi ndrindra khu dzingodzi kala va gi kodza gu gi bedza ngalavani va gi hungelela khu maghota nya gutiye. Khu gu thava gu tshegema funguni ga bambe ga Siriya, va di tshula matanga va diga ngalava yi ndrindrwa khu mwedzi. 18Khu mindru gakone, gingulu gi di simama khu tshivba ni tshivba, va phela gudusela sombo va rinyela matini. 19Khu litshigu nya wuraru, va di dzudzugela matini sombo nya gulumbe ngalava, khu mandza yawe. 20Hi vbedzide matshigu nya gulaphe nyamba wona lidambo mwendro dzinyeledzi. Gingulu gi di simama khu tshivba ni tshivba, hi si tumbi gu khethu hi na vbuluga. 21Khu gu wona gu khuye vathu va vbindriside matshigu nya mangi nyamba hodza gilo, Pawulo a di khuga a ema vbakari gwawe, a ganela khuye: "Vama vakhwathu, nari pwani na mu nyi yingiside hi khala Kreta, gudiri tshukwana. Na ha sa mana tshanisa ni guluza gwatshavbo gogu. 22Ambari ulo, tiyani longo, kholu mwalo na moyo a na fago. Ngalava basi khiyo yi na mbembago. 23Nya gu ganela kharati kholu ni wutshigu nyi di tedwa khu girumwa gya Nungungulu wangu nyi mu khozelago, 24gita nyi embela khigyo: 'Pawulo, u nga khali hwanga kholu uwe u ngu vbwetega guya vboha mahoni ga Sezari. Khu kota yago, Nungungulu a na vbanyisa vathu vatshavbo u gu navo ngalavani.' 25Khu kharato, vandruye, tiyani! Eni nyi ngu tumba gu kheni Nungungulu a na tadzisa magana a nyi embedego. 26Aholu, ngalava mu nga yi valelini gambe, yi na mbemba gidwane nya gukari." 27Na gu vbindride semana mbili, ngalava na yi gu khuluga ni Yiphwa ya Medhiterani, ni vbakari nya wutshigu, vamarinyero va di wona gu khavo ngalava yi ngu hidzimela tigoni nya gukari. 28Va diya pima gueta nya nondrwa, va mana gipimo nya magumi mararu ni livbandre na mweyo dzimetru. Na va gimbide pfhukanyana, va di pima gambe, va mana magumi mavili na livbandre na dzimbili dzimetru. 29Khu gu thava gu rika siwindrini, va di tshisa dzifero dzina khu gisalotunu, va virela gugya. 30Gikhati gyogyo vamarinyero va di donga gu diga ngalava va thava. Va di tshisa gingalavana matini, va pfhadzedzela guya tsitsa dzifero dza thonvutunu nya ngalava. 31Pawulo a di embela muthangeli nya masotshwa ni masotshwa khuye: "Mwa gu diga vamarinyero va thava, mu tandregide! Kha mu na vbuluga." 32Me ni gupwa esi, masotshwa ma di pila dzingodzi dzi nga bani dzi hungile gingalavana va gi diga gi penga. 33Ni dzimindru dzikhongolo, Pawulo a di lomba vatshavbo khuye va hodze gilogyo, a ganela khuye: "Gu gira semana mbili khu muhuno na mu khade mu khevisela nyamba hodza gilo. 34Nyi ngu mi lomba mu hodze gilogyo, gasi mu kodze gu mana tshivba nya guvbuluge. Vbakari gwathu mwalo na moyo a na gu luzago, ambari khu ndzudzu wunene wa hungoni gwaye." 35Na gu ganela esi, Pawulo a di dzega gibaba, a bonga Nungungulu mbeli ga vatshavbo, a gi pila a phela gu hodza. 36Vatshavbo va di tiya longo va hodza navo. 37Ethu hatshavbo hi nga bani hi romo ngalavani hidiri mazana mavili ni livbandre na mavili magumi ni livbandre na moyo vathu. 38Na hi hodzide, hi di dzudzugela matini mavbila gasi gu vbevbugisa ngalava. 39Na gugide, vamarinyero kha va nga liti litigo lile. Aholu, na va wone lisiwo nya fungu, va di zama guya tshegemisa avbo ngalava. 40Va di pila dzingodzi nya dzifero, va dzi diga matini, va tshula lemi, va ghwimba litanga la thonvutunu, va tshemba lemi va thonona lisiwo. 41Aholu, ngalava yi di veta khu tshivba funguni yi tshegema khu thonvutunu. Gisalotunu yi di pandrega khu kota nya tshivba nya mavimbi. 42Khavbo avbo, masotshwa ma di tedwa khu mapimo nya gu songetele sibotshwa satshavbo, gasi gu si manegi ni gimwegyo nya guhambe gi thava. 43Aholu muthangeli, a nga bani ari ni makungu nya gu vbanyise Pawulo, gima kha va dzumedzisa. A di ruma gu khuye vatshavbo va nga bani va gu kodza gu hambela va phela khavo gu ndragela matini, va zama gu vboha funguni khu mayaka gasi gu dzi vbanyisa. 44Vambe vatshavbo a di va ruma va zama gu dzi vbanyisa khu gu dandramela mapulango, mwendro sipandre nya ngalava. Khidzo kharato vatshavbo va nga dzi kodza gu vboha funguni, khu mawogo ni mawundru yawe.


Copyright
Learn More

will be added

X\