MITHUMO 26

1Agripa a di embela Pawulo khuye: "U ngu dzi kodza gu sasamedza wabune mahungu yago." Pawulo, na khusedzile mandza a di ganela khuye: 2"Mufumeli Agripa! Nyi ngu nengela ngudzu muhuno khu gu ningwa wulanga mbeli gwago nya gu sasamedze lisine khu mahungu nya milandru yatshavbo va nyi singedzago Vajudha. 3Ngudzungudzu, kholu uwe u ngu mati gwadi mavbanyelo nya Vajudha ni mahungu va ganedzisanago khayo. Khavbo avbo, nyi ngu gu lomba u nyi yingisa khu gu timisela. 4Vajudha va ngu dziti gwadi edzi nyi vbanyidego khidzo wudzahani gwangu, ndrani nya libandla langu, Jerusalema. 5Avo va ngu dziti gwadi, gambe va nga fakaza va gu dzina, gu khavo gukhugela wudzahani gwangu nyi landriside milayo nya mavbanyelo nya vafarisi, a gu ayo ma garadzago ngudzu guvbindrisa, ndrani nya milayo yatshavbo nya wukhodwa wathu. 6Olu va nyi resile avba gasi guta lamudwa khu kota nya gitumbo nyi gu nagyo ga esi Nungungulu a nga sambanya ga vakokwe vathu khuye a na gira. 7Mahundzu yatshavbo nya likhumi na mavili yana Israeli, momo vbakari nya guvirele gu wona gu tadzisega nya gitumbiso gyogyo. Khu kota nya egi gitumbiso va ngu khozela Nungungulu wutshigu ni mihani nyamba rereka. Khigyo gitumbo gegi, amanawe mufumeli Agripa, gi vangelago ketso yatshavbo nyi giredwago khu Vajudha. 8Ina khu mawonelo yanu, mwari khenu Nungungulu kha dzi kodzi gu wusa vanyagufa, gani? 9Eni neni nyi di gu pimisa gu kheni guvbwetega gu dwana khu maphuvbo yatshavbo gasi gu fuvisa lina la Jesu, Munazarenu. 10Khiso nyi nga girago Jerusalema. Nyi di ningwa tshivba khu vakhongolo nya vaphasi nya mhamba, nyi khothela mapasoni nya vangi va nga khodwa ga Kristo. Gikhati va nga lamuledwa gufa, eni nyi di seketela gu kheni va na songwe. 11Dzinyondro dzingi, eni nyi di bela dzinyumbani nya nombelo nyi va ninga sisaniso nya sikhongolo, khu gufela gu kheni va dange gukhodwa gwawe. Khu kota nya likhulo nyi nga bani nyiri nalo gwawe, nyi di va tutumisela kala ni madhoropani ya mayigoni ya vbavbandze. 12"Khiso si nga nyi yisa dhoropani ga Dhamasko, na nyi ningidwe tshivba ni sileletelo khu vakhongolo nya vaphasi nya mhamba. 13Nyidiri vbakari nya ndzila, amanawe mufumeli, ni vbakari nya mihani, gikhati khigyo nya midiya, nyi di wona guwenengedza nya gukhongolo, nya gute khu ndzadzini, nya gungangamele guvbindra lidambo, nyi fenengedzwa khu safa eni ni avo nyi nga bani nyi gu endra navo. 14Hatshavbo hi di thega vbavbatshi. Khavbo avbo, eni nyi dipwa lito li gu nyi rana khu Giaramewu, khilo:'Sawulo, Sawulo! Khu ginani u nyi sanisago? Kanu wago khandri wa gilo.' 15Eni nyi di wudzisa kheni: 'Gasi khuwe mani, Pfhumu?' Lito li di nyi hakha khilo: 'Eni kheni Jesu, oyu u mu sanisago uwe! 16Khuga u ema. Eni nyi dzi wonegiside gwago, gasi u khale muthumeli wangu, u tivisa ga vambe esi u si wonego muhuno, ni esi simbe nyi na gu yeyedzago khu hwane nya matshigu. 17Nyi na gu vbulugisa ga Vajudha ni ga va nya mayigo nyi gu rumelago vbakari gwawe. 18Eni nyi ngu gu rumela guya va tula maho yawe gasi va duga gidemani, va ta guwonegelani; va duga wugumbini wa Sathane, va ta ga Nungungulu, va khodwa gwangu vafela gu divaledwa sighoho sawe, va hakha thomba yi lulamisedwego sanana sa Nungungulu.' 19"Gukhugela avbovbo, amanawe, mufumeli Agripa, eni gima kha nyi dzi kodzi gu yeyisa giwonegiso gya ndzadzini. 20Guphela nyi di tshumayela dhoropani ga Dhamasko, nyi bela Jerusalema ni litigo latshavbo la Judheya nyi vbindrela mayigoni ya vbavbandze. Ga vatshavbo nyi tivisa gu kheni gu vbwetega gu vbindrugedza mavbanyelo, va diga sighoho sawe, va wuya ga Nungungulu, va yeyedze guvbindrugedza gwawe khu mithumo nya yadi. 21Khayo aya mahungu va nyi modego khayo Vajudha na nyi romo Nyumbani ga Nungungulu, va vbweta gu nyi songa. 22Aholu, Nungungulu a nyi vhikede kala litshigu la muhuno, nyi emidego avba, mbeli gwanu, nyi ninga wukustumunyu wangu ga enu mwatshavbo nya vadugwane ni vakhongolo. Esi nyi ganelago khiso si nga tiviswa khu vaprofeti ni Mosi pwani si na dugelela, 23mahungu nya gupwani Misiya emede gufa gasi a khale muthu nya guhegule gu wuga khu gufani, a emiswa kha nga wenengedzo nya guvbanyise vbakari nya Vajudha ni va nya mayigo." 24Pawulo, na nga gu ganela magana yaya, Festo a di khusa lito a ganela khuye: "U handrugide, Pawulo! Sihevbulo sago nya gulaphe si gu vbungude mapimo." 25Pawulo a di hakha khuye: "Kha nya handruga, mufumeli wangu. Nya gu ganela mahungu nya lisine ni gupima. 26Avba womo mufumeli Agripa a si tigo gwadi silo sesi; pima kholu nyi ganelago na nyi tshulegide mahoni gwago. Gimwalo na gimwegyo gi giridwego khu gisihaledza. 27Mufumeli Agripa, u ngu khodwa ga vaprofeti, gani? Eni nyi ngu dziti gu kheni u ngu khodwa." 28Khavbo avbo, mufumeli Agripa a di embela Pawulo khuye: "Nugunugu olu, wa gu vbweta gu nyi vbindrugedza nyi khala muKristo!" 29Pawulo a di mu hakha khuye: "Nya gu lomba ga Nungungulu gu kheni, gani nugunugu, gani khu matshigu ma ngu gutago, nasiri uwe basi, aholu mwatshavbo mu gomo avba mu nyi yingisa, mu vbindrugedza mu gu khala nga eni, na mu tshulegide nyambana dzitshinga dzedzi" 30Khavbo avbo, mufumeli Agripa a di khuga a ema, a khuga nuye Festo ni Bherenise ni vatshavbo va ngatago navo. 31Na va gu duga, va di ganela khu gyawe khavo: "Oyu mwama kha gira gilo nya guyele gu songwa mwendro gu khothedwa." 32Khavbo avbo, Agripa a di embela Festo khuye: "A di gu yela gu tshudwa, nari khasi khandri ga olu a lombidego gu lamudwa khu Sezari."

will be added

X\