MITHUMO 25

1Festo, na hakhide ndronga nya wufumu, a di vbedza matshigu mararu dhoropani ga Sezareya, a khuga khavbo a gwela Jerusalema. 2Vakhongolo nya vaphasi nya mhamba ni manganagana nya Vajudha va dita thela mahungu nya nandru wa Pawulo, 3Va lomba wuhindzi ga Festo gu khavo a ranisa Pawulo ata Jerusalema; Va di hungide gikungu nya gu mu songe ndzilani. 4Aholu, Festo a di va hakha khuye: "Pawulo khothedwe pasoni ga Sezareya. Eni nugunugu nyi na bwelela iyo. 5Ava va gu ni dzifanelo vbakari gwanu va na relela gumogo ni eni, gasi guya thela ketso mwama yoyo a gu bani a ghohide nandru." 6Festo a di khala Jerusalema gipimo nya livbandre na mararu mwendro likhumi matshigu. Khavbo avbo, a di bwelela Sezareya. Khu mindru gakone a diya khala phathani vbagikhalotunu nya gulamule, a ranisa Pawulo. 7Na bede Pawulo, a di randredwa khu Vajudha va ngata khu Jerusalema, va phela gu mu singedza silo nya singi nya gu thise. Aholu gima kha va dzi kodza gu tiyisa wufakazi wawe. 8Khavbo avbo, Pawulo a di hakha khuye: "Eni kha nya ghoha gilo khu Nayo wa Mosi ambari gu ghohela Nyumba ya Nungungulu, mwendro gu ghohela mufumeli Sezari." 9Khavbo avbo, Festo khu gufela gu tsakisa Vajudha, a di wudzisa Pawulo khuye: "U ngu dzina gu hongola Jerusalema uya lamuledwa iyo khu eni mahungu yaya, gani?" 10Pawulo a di hakha khuye: "Eni nyi womo phathani ga mufumeli wa Roma. Khavbo avba nyi gu na ni fanelo nya gu lamuledwe avbo. Kha nya wusa nandru ga Vajudha kha nga u dzitigo gwadi. 11Aholu, nya gu bani nyiri ni nandru, nya gu bani nyi ghohide gilo nya guyele gu songwa, eni kha nyi bombi gufa. Aholu a gu bani a siri lisine esi va nyi singedzago, mwalo muthu a na nyi ningelago mandzani gwawe. Nya gu lomba gu ya lamudwa khu Sezari." 12Khavbo avbo, Festo a di duga gihundla ni manganagana yaye, a vbedza a ganela khuye: "U lombide gu hongola ga Sezari, u na hongola ga Sezari" 13Na ma vbindride matshigu nya gukari, mufumeli Agripa ni Bherenise va di hongola Sezareya va ya losa ni gu wuyisa Festo. 14Va di vbedza iyo matshigu nya gukari. Festo a di embela mufumeli mahungu ya Pawulo, khuye: "Avba nyi na ni mwama moyo a nga tshidwa khu Felisi na khothedwe pasoni. 15Gikhati nyi nga hongola Jerusalema, vakhongolo nya vaphasi nya mhamba ni manganagana nya Vajudha va dita thela ketso gwangu, va lomba gu khavo nyi mu lamulela gufa. 16Eni nyi di va hakha kheni, vafumeli va Roma kha va oloveli gu lamulela gufa muthu, nyamba hegula khu gu rana vathuledzi vaye va ta mu thuledza na gupwa, gasi a mane nuye wulanga nya gu dzi vhikele. 17Na va dzude eno, nyi di vindrugela gukhala phathani nya mahungu, nyi gu ranisa mwama yoyo. 18Aholu vathuledzi vaye, na va emide va sasamedza mahungu, kha nya mana nandru nya khongolo, nya nga owu nyi nga bani nyi gu wu pimisa. 19Avo va gu mu thuledza khu mahungu nya wukhozeli wawe, ni kota ya mwama moyo nya gupwani khu Jesu a fudego, aholu Pawulo a tiyisago gu khuye a ngu vbanya. 20Khu gumba dziti gu kheni nyi na ma lamudzisa gu wani mahungu yaya, nyi di wudzisa Pawulo gu kheni mwendro a ngu dzina gu hongola Jerusalema a ya lamuledwa iyo. 21Aholu, Pawulo a di lomba guya lamudwa khu Sezari. Khavbo avbo, nyi di ruma gu mu khothela kala nyi gu mana mano nya gu mu rumele ga Sezari." 22Khavbo avbo, mufumeli Agripa a di embela Festo khuye: "Eni neni nyi di gu gola gu mupwa muthu yoyo." Festo a di hakha khuye: "Mindru avba gu gyago, u na mupwa." 23Na gugide, Agripa ni Bherenise va di vboha na va herephide. Va di bela phathani nya mahungu ni vathangeli nya dzinyimbi ni manganagana ya dhoropani. Khavbo avbo, Festo a di ranisa Pawulo, 24a ganela khuye: "Mufumeli Agripa, ni enu mwatshavbo manganagana mu tshanganidego avba! Mu ngu mu wonani oyu mwama! Khuye oyu Vajudha vatshavbo, gu khugela omu kala Jerusalema va mu wugelago va ta thela katso avba gwangu. Va sambanyide gu khavo oyu mwama mwalo fanelo nya guvbanye. 25Aholu, eni kha nyi woni gwaye nandru nya guyele gu songwa. Kha nga a lombago guya lamudwa khu Sezari, nyi na mu yisa ga Sezari. 26Gani olu, nyi si gu mani gilo nya gulovele Sezari khu mahungu yaya. Nyi ngu mu resa avba mbeli gwanu mwatshavbo, ngudzungudzu avba gwago uwe mufumeli Agripa, gasi khu vbasiwudzisotunu hi na mu girago, mwendro nyi na mana matshangu nya gulove lidangalila khu mahungu yaye. 27Nya gu wona gu kheni kha si yeli gu rumela gibotshwa nyambana lidangalila nya gu gi bikele khilo ni gu sasamedza nandru waye."

will be added

X\