MITHUMO 22

1"Vandriyangu ni enu vababe va na Israeli! Yingisani olu esi nyi gu naso gu mi embela khu gu dzi vhikela gwangu." 2Na va pwide gu khavo a gu ganela khu Giaramewu, vatshavbo va di degula, va mu yingisa khu githawo. Uye a di engedza khuye: 3"Eni nyi Mujudha, nyi givelegwa gya Tarsu, tigoni ga Silisiya. Aholu nyi dandrede dhoropani momu ga Jerusalema. Nyi hevbude gambe omu, ga Gamaliyeli, gu landrisa milayo ya vakokwe vathu khu githawo. Nyi di khathalela Nungungulu khu tshivba, nga edzi enu mwatshavbo mu mu khathalelago khidzo muhuno. 4Nyi di venga nyi dwanela gu songa valandreli nya Ndzila yeyi nya Mahungu nya Yadi ya Pfhumu. Nyi di mola, nyi hunga, nyi khothela mapasoni vama ni vanyamayi. 5Khongolo nya vaphasi nya mhamba ni madhota khavo dzifakazi nya silo sesi. Nyi hakhide khu mandzani gwawe malangalila nya gulovedwe vandruye va vbanyago dhoropani ga Dhamasko. Nyi hongode nawo gasi guya mola vakristo nyi va resa Jerusalema va ta tsayiswa. 6"Na nyiri vbakari nya ndzila nya guhongole Dhamasko, ni vbakari nya mihani, nyiri vbafuvbi nya guvbohe, nyi di wona guwenengedza nya gukhongolo ngudzu, guta khu ndzadzini, guta nyi fenengedza. 7Eni nyi di thega vbavbatshi, nyipwa lito li nyi embela khilo: 'Sawulo! Khu ginani u nyi tshanisago?' 8Eni nyi di wudzisa kheni: 'Khuwe mani, Pfhumu?' Lito li di nyi hakha khilo: 'Kheni Jesu wa Nazareta, oyu u mu sanisago!' 9Ava nyi nga bani nyiri navo va wonide guwenengedza gule, aholu lito nyi nga lipwago, avo gima kha va lipwa. 10Khavbo avbo, nyi di wudzisa kheni: 'Nyi rini olu, Pfhumu?' Pfhumu yi di nyi embela khiyo: 'Khuga u bele Dhamasko, iyo va na gu embela satshavbo esi u yelago gu si gira.' 11Nyi di khala gikhumu khu kota nya guwenengedze gule, nyi gu pharwa kunga khu avo nyi nga bani nyi gu endra navo, nyi gu bela dhoropani ga Dhamasko. 12"A di romo mwama moyo nya gupwani khu Ananiya, muthu nya ndruda khu Nayo. Vajudha vatshavbo va di gu ninga wukustumunyu khu wuwadi waye. 13A dita nyi vbweta. Na nyi mane, a dita ema vbafuvbi gwangu a nyi embela khuye 'Sawulo, ndriyangu, ma na tulege maho yago u wone.' Khu gikhati gyogyo, maho yangu ma di tulega, nyi wona. 14Uye a di khuye: 'Nungungulu wa vakokwe vathu a gu hathide gasi ufela guti guhaladza gwaye, u wona Mululami waye ni gupwa lito li dugago khu kanani gwaye. 15U na khala fakazi vbakari nya vathu vatshavbo nya esi u si wonego ni esi u si pwidego. 16U nga gu virela gambe ginani, khuga u bhapatiswe, u handzwe sighoho sago khu gulombelela khu lina laye.' 17Na nyi bwelede Jerusalema, nyiri Nyumbani ga Nungungulu nyi gira nombelo, nyi di beledwa khu liphuvbo, 18nyi wona Pfhumu na yi nyi embela khiyo: 'Vbiredza u duge khu Jerusalema, kholu vathu vava gima kha va na nga hakha esi u fakazago khu eni.' 19Aholu, eni nyi di hakha kheni: 'Pfhumu, avo va ngu dziti gu khavo nyi di gu gimbila khu nyumba ni nyumba nya nombelo, nyi gu ruma gu modwa va khothedwa mapasoni ni gu tshaniswa vatshavbo avo va khodwago gwago. 20Gikhati wu nga bani wu gu vbalaga novba wa Sitefane, fakazi yago, nyi di romo neni vbale nyi hengela nava va nga bani va gu mu songa, kheni nyi nga khala ni dzingandzu dzawe.' 21Uye a di nyi embela khuye: 'Indra, kholu nya gu vbweta gu gu rumela hwindzo, ga va nya mayigo.' " 22Va di mu yingisela kala a ganela magana yaya. Khavbo avbo; va di phela gu gulumela, khavo: "A na fuve muthu yoyu mafuni! Mwalo fanelo nya guvbanye." 23Va di gulumela, va gu tshula dzingandzu dzawe, va kudzudzela mafu vbatshani. 24Ndruna yi di ruma gu mu yisa phathani na gu pimisa gu mu wudzisa khu gu mu kwamula, gasi guti khu ginani va gulumelago kotani gwaye. 25Na va gu mu hunga khu makhetshe, Pawulo a di ganela ga muthangeli nya masotshwa khuye: "Ina mu ngu dzumedziswa gu kwamula givelegwa gya Roma nyamba hegula khu gu gi lamula, gani?" 26Na pwide magana yaya, muthangeli nya masotshwa a di vbweta ndruna a yi embela khuye: "Ginani u vbwetago gu gira? Oyu mwama givelegwa gya Roma." 27Khavbo avbo, ndruna yi di ta wudzisa Pawulo khiyo: "Nyi embele, ina u mu Roma uwe gani?" Uye a di hakha khuye: "Ina." 28Ndruna yi di engedza khiyo: "Eni nyi vbedzile dzitsapawu nya dzingi khu gufela gu ranwa givelegwa gya Roma." Pawulo khuye: "Gasi eni nyi Muroma khu mavelego." 29Khavbo avbo, vale va nga bani va gu vbweta gu mu wudzisa khu gu mu kwamula, va di duga va hongola; ndruna niyo yi di khala hwanga gikhati yi nga dziti gu khiyo Pawulo Muroma, kholu a di mu hungide khu makhetshe. 30Khu mindru gakone, na gu vbweta guti lisine nya nandru Vajudha va ningago Pawulo, a di mu tshula, a gu tombanisa vakhongolo nya vaphasi nya mhamba, ni madhota nya phatha nya Vajudha; a di rumela gu reswa Pawulo a mu vega vbakari gwawe.

will be added

X\