MITHUMO 2

1Na li vbohide litshigu nya Pentekosta, vatshavbo va di tshanganile wulanga wumowo. 2Khu githugedza, gu di gira ligwaha na li gu tshiga khu ndzadzini, gu di pwala gufurugedza liphuvbo nya tshivba li gu tadza nyumba va nga bani vari umo. 3Khavbo avbo, gu di tumbuluga kha nga malimi nya malavbelavbe nya nilo ma gu dzi kabanisela, gu mbaka limwedo vbatshani ga moyo ni moyo. 4Vatshavbo va di tala khu Liphuvbo nya gu Age, va gu phela gu ganela mambe malimi, kha nga idzo Liphuvbo li nga bani li va ruma gu ganela khidzo. 5Va di tshanganile Jerusalema vaJudha nya ndruda, nya gute khu mayigoni yatshavbo. 6Gikhati gu nga gira ligwaha, mwandra nya vathu wu di tshangana, wu tala khu gu liwuga, kholu muthu ni muthu a di vapwa na va gu ganela khu limi laye. 7Va di thuruga gumogo ni gu liwuga, va gu ganela khavo: "Ina vatshavbo ava va ganelago khandri Vagalileya, gani? 8Sa gu kodzega kharini gu muthu ni muthu a vapwa na va gu ganela khu limi laye nya mavelego? 9Vapartiya, Vamedesi, Vaelemita ni vathu va vbanyago Mesopotamiya ni Judheya ni Kapadokiya ni Ponto, ni Asiya, 10ni Frijiya ni Panfiliya, ni Egipito ni va gipandre gya Libhia, vbinganoni ni Sirene, ni vathu nya gute khu Roma; 11vaJudha nya mavelego ni vale va nga dzi vbindrugedza va dzi gira vaJudha, vathu va Kreta ni va Arabhiya, hatshavbo hi ngu vapwa na va gu huwelela siliwugiso sa Nungungulu khu malimi yathu." 12Vathu vatshavbo va di liwuga khavo: "Nari silo muni esi hi si wonago?" 13Gasi vambe va di gu hembulula khavo: "Ava vathu va di leva khu wadwa nya givhayi." 14Pedro, na emide gumogo ni vale nya likhumi na moyo, a di khusedza lito a gu ganela kharati: "Enu vathu va Judheya ni enu mwatshavbo mu vbanyago Jerusalema, khalani na mu gu dziti, gambe tulani gwadi dzindzeve mu yingisa magana yangu. 15Vama vava kha va leva nga idzo mu pimisago khidzo: Kha nga mu wonago, gu ngari dzimindru, gikhati nya wuraru nya litshigu (9 wora nya dzimindru). 16Aholu, ma gu tadzisega magana ya muprofeti Joeli a nga khuye: 17'Si na dugelela matshiguni nya guhegise,khu Pfhumu a ganelago,nyi na tshisa Liphuvbo langu vbatshani nya vathu vatshavbo,sanana sanu nya sikhwathana niso nya sagadzyana si na tivisa mahungu yangu madzaha yanu ma na wona siwonegiso ni sikhosane sanu si na lora dzindroro. 18Khu lisine nyi na tshisa Liphuvbo langu vbatshani nya sithumi sangu nya vama ni esi nya vanyamayi,va na tivisa mahungu yangu. 19Nyi na wonegisa siliwugiso vbatshani, ndzadzini,ni siwonegiso vbavbatshi, mafuni; Novba, nilo ni hunguva nya wutshi. 20Lidambo li na vbindrugedza li khala gidema gasi ngima wu na fuvila wu khala nga novba.Na li si gu vbohi litshigu la Pfhumu:Litshigu likhongolo, litshigu nya gidhumo. 21Muthu watshavbo a na lombago khu lina la Pfhumu a na vbanyiswa.' 22"Vama va na Israeli, yingisani gwadi magana yaya. Jesu wa Nazareta dandrisidwe vbakari gwanu khu mithumo nya tshivba, ni siliwugiso, ni siwonegiso esi Nungungulu a giridego khu uye vbakari gwanu, kha nga mu dzitigo gwadi. 23Mwama yoyu ningedwe khu gu dzina ni sihalo wa Nungungulu, gasi enu mu di mu ningela a khokhothedwa vbagihambanotunu khu mandza nya vathu nyambana nayo, mu mu songa. 24Aholu Nungungulu a mu wusile khu ga vafudego, a mu vbulugisa gusanisekani nya lufu, kholu a di si yedwi khu gu fumedwa khu tshivba nya lufu. 25Dhavide ganede khu mahungu yaye: 'Nyi di gu wona Pfhumu mbeli gwangu gikhati gyatshavbo Uye womo nyamudye gwangu gasi nyi si kanakani. 26Khavbo avbo, monyo wangu wu di tsaka ni lidimi langu li di nengela givili gyangu gi na hefemula khu gutumba 27Kholu khu na nga diga hefemulo wangu kovani nya lufu gambe khu na nga dzumedzisa gihathwa gyago gi wona guhina. 28U hi tulede guti dzindzila nya guvbanye. U na nyi tadzisa khu gutsaka nya guwone khovbe yago.' 29Vandruye, dzumelani nyi mi embeleni khu lisine langu latshavbo: Kokwe wathu Dhavide fude a gu dzingwa. Lithowo laye gambe li nga romo vbakari gwathu kala ni muhuno. 30Kha nga a nga bani ari muprofeti a di gu dziti nya gu khuye Nungungulu a di Mu tumbisile khu gusambanya, gu vega vbagikhalotunu gwaye nya wufumu gyanana nya melego waye. 31Khu kharato, kokwe Dhavide a di hegulela gu wona ni gu tivisa guwuga ga Kristo khu ga vafudego na gu ngari hwindzo. Khu lisine Kristo gima kha digwa kovani nya lufu, ni givili gyaye gambe gima kha gya wona guhina. 32Wonani gwadi, Nungungulu wusile Jesu khu ga vafudego, ethu avba mu hi wonago, hi dzifakazi nya mahungu yaya. 33Olu na khusedzidwe nyamudye ga Nungungulu hakhile Liphuvbo nya gu Age a nga tumbiswago khu Babe, a li rumela. Khiso esi mu si wonago ni gu sipwa. 34Kholu Dhavide gima kha gwela ndzadzini gambe a ngu fakaza khuye: 'Pfhumu a di embela Pfhumu yangu khuye:Khala khu nyamudye gwangu 35kala nyi gu vega valala vago vbavbatshi nya migondro yago.' 36Nyumba yatshavbo ya Israeli yi na khale na yi gu dziti khu lisine latshavbo nya gu khiyo Jesu yoyu mu nga mu khokhothela vbagihambanotunu, Nungungulu a mu dandrisile a khala Pfhumu ni Kristo." 37Na va pwide magana yaya va di garadzega myonyoni gwawe, va wudzisa Pedro ni vambe vapostoli khavo: "Vandruye, ginani hi fanelago gugira?" 38Pedro a di va hakha khuye: "Vbindrugedzami mavbanyelo, moyo ni moyo a bhapatiswa Linani ga Jesu gasi a tsetseledwa siwono. Khavbovbo mu na hakha giningwa gya Nungungulu a gu Liphuvbo nya gu Age. 39Kholu khu lisine gitumbiso gya gu lumba enu ni sanana sanu ni vatshavbo vale va guromo hwindzo; vatshavbo ava Nungungulu Pfhumu yathu a va ranago gwaye." 40Khu magana yaya ni mambe nya mangi, Pedro a di gu fakaza ni gu va tiyisele khuye: "Dzi vbanyiseni ga melana yoyu nya guwegele." 41Vale va nga hakhago magana yaye va di bhapatiswa. Litshigu lile va di bela tsawani nya vakhodwa gipimo nya magumi mararu mazana vathu. 42Avo va di gu khathala khu gu hengela gikhati gyatshavbo umo nya sihevbudzo nya Vapostoli ni umo nya pwanano nya wundruye, ni gukabana gibaba, ni milombelo. 43Githawo gi diri gingi myonyoni ga vatshavbo, kholu adiri singi siliwugiso ni siwonegiso si nga bani si gu girwa khu Vapostoli. 44Vakhodwa vatshavbo, va di khala dangamwedo ma gu hengela silo satshavbo; 45va di rengisa sipeto ni dzithomba dzawe va gu kabanisela tengo wakone gu khedza khu sigaradzo nya muthu ni muthu; 46Khu litshigu ni litshigu va di hengela monyo moyo, va hongola Nyumbani ga Nungungulu, va kabana gibaba, va hodza guhodza gwawe khu gutsaka ni gu nengela, myonyo yawe na yi tangade. 47Va di rungudza Nungungulu, va godwa khu vathu vatshavbo. Khu litshigu ni litshigu, Pfhumu a di engedzela tsawani gwawe tengo nya vale va na gu vbanyiswago.

will be added

X\